ಲಲಿತ್‌ ಮೋದಿ, ಪತ್ನಿಯ ಸ್ವಿಸ್‌ ಬ್ಯಾಂಕ್‌ ವಿವರಕ್ಕೆ ಸೂಚನೆ

ಹೊಸದಿಲ್ಲಿ: ಐಪಿಎಲ್‌ ವಂಚನೆಗೆ ಸಂಬಂಧಿಸಿದಂತೆ ಮಾಜಿ ಆಯುಕ್ತ ಲಲಿತ್‌ ಮೋದಿ, ಪತ್ನಿ ಮಿನಾಲ್‌ ಹೊಂದಿರುವ ಬ್ಯಾಂಕ್‌ ವಿವರ ನೀಡುವಂತೆ ಸ್ವಿಜರ್ಲೆಂಡ್‌ ಸರಕಾರ ಸೂಚನೆ ನೀಡಿದೆ. ಉಭಯ ದೇಶಗಳ ಮಾಹಿತಿ ವರ್ಗಾವಣೆ ಒಪ್ಪಂದಕ್ಕೆ ಅನುಗುಣವಾಗಿ ಭಾರತವು ಸ್ವಿಜರ್ಲೆಂಡ್‌ ಸರಕಾರಕ್ಕೆ ಈ ಆಗ್ರಹ ಮಾಡಿತ್ತು.

ಈ ಹಿನ್ನೆಲೆಯಲ್ಲಿ ಈ ಮಾಹಿತಿಯನ್ನು ನೀಡುವಂತೆ ಅ.1 ರಂದು ಸ್ವಿಜರ್ಲೆಂಡ್‌ ಸರಕಾರವು ಲಲಿತ್‌, ಮಿನಾಲ್‌ಗೆ ನೋಟಿಸ್‌ ನೀಡಿದ್ದು, 10 ದಿನಗಳಲ್ಲಿ ಮಾಹಿತಿ ನೀಡುವಂತೆ ಸೂಚಿಸಿದೆ. ಇದೇ ರೀತಿಯ ನೋಟಿಸ್‌ ಅನ್ನು 2016ರಲ್ಲೂ ಸ್ವಿಸ್‌ ಸರಕಾರ ಹೊರಡಿಸಿತ್ತಾದರೂ, ಆಗ ಬ್ಯಾಂಕ್‌ ಖಾತೆ ವಿವರಗಳನ್ನು ಹಂಚಿಕೊಳ್ಳಲಾಗಿದೆಯೇ ಎಂಬುದು ತಿಳಿದುಬಂದಿಲ್ಲ. ವಿದೇಶಗಳಲ್ಲಿ ಇರುವ ಕಪ್ಪು ಹಣ ಸಂಗ್ರಹಿಸುವುದನ್ನು ತಡೆಯುವ ನಿಟ್ಟಿನಲ್ಲಿ ಭಾರತವು ಕೈಗೊಂಡಿರುವ ಕಠಿಣ ಕ್ರಮಗಳಿಗೆ ಪೂರಕವಾಗಿ ಈ ಮನವಿ ಮಾಡಿಕೊಳ್ಳಲಾಗಿದೆ. 2010ರಲ್ಲಿ ದೇಶ ಬಿಟ್ಟು ಪರಾರಿಯಾಗಿರುವ ಲಲಿತ್‌ ಮೋದಿ ಲಂಡನ್‌ನಲ್ಲಿ ನೆಲೆಸಿದ್ದಾರೆ ಎಂದು ಹೇಳಲಾಗುತ್ತಿದೆ.