ಮುದ್ದೇಬಿಹಾಳದಲ್ಲಿ ಸರಣಿ ಕಳ್ಳತನ: 7 ಮನೆಗಳ ಬೀಗ ಮುರಿದು ನಗ ನಾಣ್ಯ ದೋಚಿದ ಕಳ್ಳರು

ಮುದ್ದೇಬಿಹಾಳ: ಪಟ್ಟಣದ ಸುಶೀಕ್ಷಿತರ ಬಡಾವಣೆ ಎಂದೇ ಗುರ್ತಿಸಿಕೊಳ್ಳುವ ಮಾರುತಿನಗರ ಬಡಾವಣೆಯಲ್ಲಿ ರವಿವಾರ ಮಧ್ಯರಾತ್ರಿಯಿಂದ ಬೆಳಗಿನ ಜಾವದವರೆಗೆ 7 ಮನೆಗಳ ಸರಣಿ ಕಳ್ಳತನ ನಡೆದ ಘಟನೆ ಬೆಳಿಗ್ಗೆ ಬೆಳಕಿಗೆ ಬಂದಿದೆ.

ಒಂದೇ ಮಾದರಿಯಲ್ಲಿ ಬೀಗ ಹಾಕಿದ್ದ ಮನೆಗಳನ್ನೇ ಗುರಿಯಾಗಿಸಿಕೊಂಡು, ಮುಖ್ಯ ಬಾಗಿಲಿನ ಕೊಂಡಿ ಮುರಿದು ಒಳನುಗ್ಗಿರುವ ಕಳ್ಳರು ಯಾರೂ ಇಲ್ಲದ ಮನೆಗಳಲ್ಲಿ ನಗ ನಾಣ್ಯ ಬೆಲೆಬಾಳುವ ವಸ್ತು ದೋಚಿರುವ ಶಂಕೆ ಇದೆ.

ಮುದ್ದೇಬಿಹಾಳ ಪೊಲೀಸರು ಆಯಾ ಮನೆಗಳಿಗೆ ತೆರಳಿ ಕಳ್ಳತನ ಪರಿಶೀಲಿಸಿ ವರದಿ ಸಂಗ್ರಹಿಸುವಲ್ಲಿ ನಿರತರಾಗಿದ್ದಾರೆ. ತನಿಖೆ ಪೂರ್ಣಗೊಂಡ ನಂತರವೇ ಕಳ್ಳತನವಾದ ನಗ ನಾಣ್ಯದ ಮೌಲ್ಯ ತಿಳಿದು ಬರಲಿದೆ.

ಇತ್ತೀಚೆಗೆ ಪಟ್ಟಣದಲ್ಲಿ ಉತ್ತರ ಪ್ರದೇಶ ಮೂಲದವರು ಬಡಾವಣೆಗಳಲ್ಲೆಲ್ಲ ಊಲನ್ ಕಾರ್ಪೆಟ್, ಬ್ಲ್ಯಾಂಕೇಟ್ ಮಾರಲು ತಿರುಗಾಡಿದ್ದು ಅವರ ಮೇಲೆಯೇ ಸಂಶಯ ಕೇಂದ್ರೀಕೃತಗೊಂಡಿದೆ.