ದಾನಿಗಳು ನೀಡಿದ ಮೂರು ಹಾಪರ್‌ ಟಿಪ್ಪರ್‌ ಸೇವೆಗೆ 

ಉಡುಪಿ: ಉಡುಪಿ ನಗರಸಭೆಯ ವ್ಯಾಪ್ತಿಯಲ್ಲಿ ಪ್ರಾಥಮಿಕ ಕಸ ಸಂಗ್ರಹಣೆ ಮಾಡಲು ಮೂವರು ದಾನಿಗಳು ನೀಡಿದ ಟಾಟಾ ಏಸ್‌ ಮಾದರಿಯ ಮೂರು ಹಾಪರ್‌ ಟಿಪ್ಪರ್‌ಗಳನ್ನು ಸೆ.5ರಂದು ಉಡುಪಿ ನಗರಸಭೆಯ ಆವರಣದಲ್ಲಿ ಸೇವೆಗೆ ಸಮರ್ಪಿಸಲಾಯಿತು. 

ಉಡುಪಿ ಜಿಲ್ಲಾ ಉಸ್ತುವಾರಿ ಸಚಿವ ಪ್ರಮೋದ್‌ ಮಧ್ವರಾಜ್‌ ಅವರು ಮಾತನಾಡಿ, ಕಸ ರಹಿತ ಉಡುಪಿಯನ್ನಾಗಿ ಮಾಡಲು ಇನ್ನಷ್ಟು ಟಿಪ್ಪರ್‌ಗಳ ಅವಶ್ಯಕತೆ ಇದೆ. ದಾನಿಗಳು ತಮ್ಮ ಸಿಎಸ್‌ಆರ್‌ ನಿಧಿಯಿಂದ ದೇಣಿಗೆ ನೀಡಬೇಕೆಂದು ಕೋರಿದರು. ಉಡುಪಿ ನಗರಸಭೆಯ ಪೌರಾಯುಕ್ತ ಎಂ. ಮಂಜುನಾಥಯ್ಯ ಮಾತನಾಡಿ, “ಕಾರ್ಪೊರೇಶನ್‌ ಬ್ಯಾಂಕ್‌, ಭಾರತ್‌ ಇನ್‌ಫ್ರಾಸ್ಟ್ರಕ್ಚರ್‌ನ ಯು. ಪ್ರಫ‌ುಲ್ಲಚಂದ್ರ ರಾವ್‌ ಹಾಗೂ ವಿನಿತ್‌ ಅಮಿನ್‌ ದಾನಿಗಳು ಮೂರು ಟಿಪ್ಪರ್‌ಗಳನ್ನು ದಾನವಾಗಿ ನೀಡಿದ್ದಾರೆ. ಇದರಿಂದ ಉಡುಪಿ ನಗರಸಭೆಯಲ್ಲಿ ಎಂಟು ಟಿಪ್ಪರ್‌ಗಳು ಸೇವೆಗೆ ಲಭ್ಯವಾಗುತ್ತಿವೆ’ ಎಂದು ವಿವರ ನೀಡಿದರು. ನಗರಸಭೆಯ ಅಧ್ಯಕ್ಷರಾದ ಮೀನಾಕ್ಷಿ ಮಾಧವ ಬನ್ನಂಜೆ, ಸ್ಥಾಯಿ ಸಮಿತಿಯ ಅಧ್ಯಕ್ಷೆ ಶೋಭಾ ಪೂಜಾರಿ, ಕಾರ್ಪೋರೇಶನ್‌ ಬ್ಯಾಂಕಿನ ಎಜಿಎಂ ಲಕ್ಷ್ಮಣ್‌ ಪ್ರಭು ಮತ್ತಿತರ ನಗರಸಭೆಯ ಸದಸ್ಯರು ಉಪಸ್ಥಿತರಿದ್ದರು.