ಐಡಿ ನಿರೀಕ್ಷೆಯಲ್ಲಿ ಲಕ್ಷ ಮಂದಿ

ಬೆಂಗಳೂರು: ಬೆಂಗಳೂರು ನಗರದ ಜಿಲ್ಲೆಯ 28 ವಿಧಾನಸಭಾ ಕ್ಷೇತ್ರಗಳಲ್ಲಿನ ಮತದಾರರ ಪಟ್ಟಿಗೆ ಹೊಸದಾಗಿ 3.50 ಲಕ್ಷ ಜನರು ಸೇರ್ಪಡೆಯಾಗಿದ್ದು, ಆ ಪೈಕಿ 1 ಲಕ್ಷಕ್ಕೂ ಹೆಚ್ಚಿನ ಮತದಾರರಿಗೆ ಹಾಲೋಗ್ರಾಂ ಕೊರತೆಯಿಂದ ಗುರುತಿನ ಚೀಟಿ ಸಿಕ್ಕಿಲ್ಲ. ಬೆಂಗಳೂರು ನಗರದ ಜಿಲ್ಲೆಯ 28 ವಿಧಾನಸಭಾ ಕ್ಷೇತ್ರಗಳಲ್ಲಿ ಒಟ್ಟು 88 ಲಕ್ಷ ಮತದಾರರಿದ್ದು, ಆ ಪೈಕಿ 3.50 ಲಕ್ಷಕ್ಕೂ ಅಧಿಕ ಜನರು ಹೊಸದಾಗಿ ಪಟ್ಟಿಗೆ ಸೇರ್ಪಡೆಗೊಂಡಿ ದ್ದಾರೆ. ಇದರೊಂದಿಗೆ ವಿಳಾಸ ಬದಲಾವಣೆ, ಕ್ಷೇತ್ರ ಬದಲಾವಣೆ, ಪಟ್ಟಿಯಲ್ಲಿನ ದೋಷಗಳ ಬದಲಾವಣೆ ಕಾರಣಗಳಿಂದಾಗಿ 1.5 ಲಕ್ಷಕ್ಕೂ ಹೆಚ್ಚಿನ ಅರ್ಜಿಗಳು ಸಲ್ಲಿಕೆಯಾಗಿವೆ. ಆ ಪೈಕಿ ಈಗಾಗಲೇ 3.50 ಲಕ್ಷ ಜನರಿಗೆ ಗುರುತಿನ ಚೀಟಿ ವಿತರಿಸಲಾಗಿದ್ದು, ಹೊಸದಾಗಿ ಸೇರ್ಪಡೆಗೊಂಡಿರುವವರಿಗೆ ಗುರುತಿನ ಚೀಟಿ ದೊರೆಯಬೇಕಿದೆ.

ಗುರುತಿನ ಚೀಟಿಯನ್ನು ನಕಲು ಮಾಡಬಾರದೆಂಬ ಉದ್ದೇಶದಿಂದ ಪ್ರತಿ ಗುರುತಿನ ಚೀಟಿಯಲ್ಲಿ ಹಾಲೋಗ್ರಾಂ ಅಳವಡಿಸಲಾಗುತ್ತದೆ. ಆದರೀಗ, ಆ ಹಾಲೋಗ್ರಾಂ ಕೊರತೆಯುಂಟಾಗಿರುವುದರಿಂದ ಹೊಸದಾಗಿ ಪಟ್ಟಿಗೆ ಸೇರ್ಪಡೆಯಾದವರಿಗೆ ಬೆಂಗಳೂರು ಒನ್‌ ಕೇಂದ್ರ, ಬಿಬಿಎಂಪಿ ಕಚೇರಿಗಳಲ್ಲಿ ಗುರುತಿನ ಚೀಟಿ ದೊರೆಯುತ್ತಿಲ್ಲ ಎಂಬ ದೂರುಗಳು ಕೇಳಿಬರುತ್ತಿವೆ.

ಬೆಂಗಳೂರು ದಕ್ಷಿಣ, ಪದ್ಮನಾಭನಗರ, ಯಶವಂತಪುರ, ಕೆ.ಆರ್‌.ಪುರ ಸೇರಿದಂತೆ ನಗರದ ಹಲವು ಕ್ಷೇತ್ರಗಳಲ್ಲಿ ಹಾಲೋಗ್ರಾಂ ಕೊರತೆಯಿಂದ ಗುರುತಿನ ಚೀಟಿ ವಿತರಣೆಯಾಗಿಲ್ಲ. ಈ ಬಗ್ಗೆ ಕೇಂದ್ರಗಳ ಸಿಬ್ಬಂದಿಯನ್ನು ಕೇಳಿದರೆ, ಹಾಲೋಗ್ರಾಂ ಕೊರತೆಯಿರುವುದರಿಂದ ಹೊಸದಾಗಿ ಮತದಾರರ ಗುರುತಿನ ಚೀಟಿ ನೀಡಲಾಗುತ್ತಿಲ್ಲ ಎಂದು ಹೇಳುತ್ತಿದ್ದಾರೆ.