ಹಿಂದಿಯಲ್ಲಿ ಪ್ರತಿವರ್ಷ ನೂರಾರು ಸೂಪರ್‌ ಹಿಟ್‌ ಚಿತ್ರಗೀತೆಗಳು ರಿಮಿಕ್ಸ್‌ ಆಗಿ ಹೊಸ ರೂಪದಲ್ಲಿ ಸಿನಿಪ್ರಿಯರ ಮುಂದೆ ಬರುತ್ತಿರುತ್ತವೆ. ಆದರೆ ಕನ್ನಡದಲ್ಲಿ ಇಂಥ ಚಿತ್ರಗೀತೆಗಳು ರಿಮಿಕ್ಸ್‌ ರೂಪದಲ್ಲಿ ಬಿಡುಗಡೆಯಾಗುವುದು ತುಂಬ ವಿರಳ. ಈಗ ಸ್ಯಾಂಡಲ್‌ವುಡ್‌ನ ಅಂಥದ್ದೇ ಜನಪ್ರಿಯ ಗೀತೆಯೊಂದು ರಿಮಿಕ್ಸ್‌ ರೂಪದಲ್ಲಿ ಸಿನಿಪ್ರಿಯರ ಗಮನ ಸೆಳೆಯುತ್ತಿದೆ.
ಹೌದು, ಇತ್ತೀಚೆಗಷ್ಟೇ ಹ್ಯಾಟ್ರಿಕ್‌ ಹೀರೋ ಶಿವರಾಜಕುಮಾರ್‌ ಅಭಿನಯದ “ಅಣ್ಣಾವ್ರ ಮಕ್ಕಳು’ ಸಿನಿಮಾದ “ಹೋಗಬೇಡ ಹುಡುಗಿ ನನ್ನ ಬಿಟ್ಟು…’ಹಾಡು ರಿಮಿಕ್ಸ್‌ ಆಗಿದ್ದು, ಯು-ಟ್ಯೂಬ್‌ ನಲ್ಲಿ ಬಿಡುಗಡೆಯಾಗಿದೆ. ಈ ಹಿಂದೆ “ನಿನ್ನಗುಂಗಲ್ಲಿ, ಪ್ರೀತಿಯೇ…’ ಎಂಬ ವೈರಲ್ ಹಾಡನ್ನು ಕೊಟ್ಟ ಅಧ್ವಿಕ್‌, ಈಗ ಶಿವಣ್ಣ ಅವರ “ಅಣ್ಣಾವ್ರ ಮಕ್ಕಳು’ ಸಿನಿಮಾದಸೂಪರ್‌ ಹಿಟ್‌ ಹಾಡನ್ನು ರಿಮಿಕ್ಸ್‌ ಮಾಡಿಹೊಸ ರೂಪದಲ್ಲಿ ಸಿನಿಪ್ರಿಯರಿಗೆ ತಲುಪಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ತಮ್ಮ ಇಂಥದ್ದೊಂದು ಪ್ರಯತ್ನದ ಬಗ್ಗೆ ಮಾತನಾಡುವ ಅಧ್ವಿಕ್‌, “ಬೇರೆ ಭಾಷೆಗೆಹೋಲಿಸಿದರೆ, ಕನ್ನಡದಲ್ಲಿ ರಿಮಿಕ್ಸ್‌ ಟ್ರೆಂಡ್‌ ಕಡಿಮೆಯಿದೆ. ನಮ್ಮಲ್ಲೂ ಅಂಥದ್ದೊಂದು ಪ್ರಯತ್ನ ಮಾಡೋಣ ಅಂಥ ಈ ಸಾಂಗ್‌ ಮಾಡಿದ್ದೇವೆ. ಫ‌ುಟ್‌ ಟ್ಯಾಪಿಂಗ್‌ ಬೀಟ್ಸ್‌ ಮತ್ತು ಹೊಸ ವರ್ಶನ್‌ನಲ್ಲಿ ಹಳೆಯೇಹಿಟ್‌ ಸಾಂಗ್‌ನ ಕೇಳುಗರಿಗೆ ರಿಮಿಕ್ಸ್‌ ರೂಪದಲ್ಲಿ ನೀಡಬೇಕೆಂಬ ಉದ್ದೇಶದಿಂದ ಈ ಸಾಂಗ್‌ ಮಾಡಿದ್ದೇವೆ. ನಮ್ಮ ಪ್ರಯತ್ನಕ್ಕೆ ಒಳ್ಳೆಯ ರೆಸ್ಪಾನ್ಸ್‌ ಸಿಗುತ್ತಿದ್ದು, ಎಲ್ಲರಿಗೂ ಇಷ್ಟವಾಗುತ್ತಿದೆ’ ಎನ್ನುತ್ತಾರೆ.
ಇನ್ನು “ಹೋಗಬೇಡ ಹುಡುಗಿ ನನ್ನ ಬಿಟ್ಟು…’ ರಿಮಿಕ್ಸ್‌ ಹಾಡಿಗೆ ಅಧ್ವಿಕ್‌ ಸಂಗೀತ ನೀಡಿರುವುದರ ಜೊತೆ ಹಾಡಿಗೆ ಧ್ವನಿಯಾಗಿದ್ದು, ತೆರೆಮೇಲೂ ಹಾಡಿಗೆ ಸ್ಟೆಪ್ಸ್‌ ಹಾಕಿದ್ದಾರೆ. ಹಾಡಿನಲ್ಲಿ ಅಧ್ವಿಕ್‌ಗೆ ಕಾಜೋಲ್‌ ಮುಖರ್ಜಿ ಜೋಡಿಯಾಗಿ ಕಾಣಿಸಿಕೊಂಡಿದ್ದಾರೆ. “ಆಫ್ಟರ್‌ ಶಾಟ್‌ ಸ್ಟುಡಿಯೋ’ ನಿರ್ಮಿಸಿದ ಈ ಹಾಡನ್ನು ಸುಹಾಸ್‌ ಅಮೀನ್‌ ನಿರ್ದೇಶಿಸಿದ್ದಾರೆ. ಗೀತೆಗೆ ಮೋಹೀಶ್‌ ಛಾಯಾಗ್ರಹಣವಿದೆ.
