ಎಫ್ಐಎಚ್‌ ವರ್ಷದ ಶ್ರೇಷ್ಠ ಆಟಗಾರ ಪ್ರಶಸ್ತಿ: ಹರ್ಮನ್‌ಪ್ರೀತ್‌ ಹೆಸರು ಶಿಫಾರಸು

ಲಾಸನ್ನೆ: ಭಾರತದ ಸ್ಟಾರ್‌ ಡ್ರ್ಯಾಗ್‌ ಫ್ಲಿಕರ್‌ ಹರ್ಮನ್‌ಪ್ರೀತ್‌ ಸಿಂಗ್‌ ಸಹಿತ ಐವರ ಹೆಸರನ್ನು ಎಫ್ಐಎಚ್‌ ವರ್ಷದ ಶ್ರೇಷ್ಠ ಆಟಗಾರ ಪ್ರಶಸ್ತಿಗೆ ಶಿಫಾರಸು ಮಾಡಲಾಗಿದೆ.

ಇದೇ ವೇಳೆ ಎಫ್ಐಎಚ್‌ ಹಾಕಿ ತಾರೆ ಪ್ರಶಸ್ತಿಗಳಲ್ಲಿ ಶ್ರೇಷ್ಠ ಪುರುಷ ಮತ್ತು ಮಹಿಳಾ ಗೋಲ್‌ಕೀಪರ್‌ ಪ್ರಶಸ್ತಿಗೆ ಭಾರತದ ಪಿ.ಆರ್‌. ಶ್ರೀಜೇಶ್‌ ಮತ್ತು ಸವಿತಾ ಪೂನಿಯಾ ಅವರ ಹೆಸರನ್ನು ಶಿಫಾರಸು ಮಾಡಲಾಗಿದೆ.

ಹರ್ಮನ್‌ಪ್ರೀತ್‌ ಅವರಲ್ಲದೇ ಬೆಲ್ಜಿಯಂನ ಆರ್ಥರ್‌ ಡತಿ , ಟಾಮ್‌ ಬೂನ್‌, ಜರ್ಮನಿಯ ನಿಕ್ಲಾಸ್‌ ವೆಲ್ಲೆನ್‌ ಮತ್ತು ನೆದೆರ್ಲೆಂಡ್‌ನ‌ ಥಿಯೆರಿ ಬ್ರಿಂಕ್ಮನ್‌ ಅವರ ಹೆಸರನ್ನು ಶ್ರೇಷ್ಠ ಪುರುಷ ಆಟಗಾರ ಪ್ರಶಸ್ತಿಗೆ ಶಿಫಾರಸು ಮಾಡಲಾಗಿದೆ. ಆದರೆ ಶ್ರೇಷ್ಠ ಮಹಿಳಾ ಆಟಗಾರ್ತಿ ಪ್ರಶಸ್ತಿಗೆ ಭಾರತದ ಯಾವುದೇ ಆಟಗಾರ್ತಿಯ ಹೆಸರನ್ನು ಶಿಫಾರಸು ಮಾಡಲಾಗಿಲ್ಲ.

ಹರ್ಮನ್‌ಪ್ರೀತ್‌ ಕಳೆದ ವರ್ಷ ಈ ಪ್ರತಿಷ್ಠಿತ ಪ್ರಶಸ್ತಿಯನ್ನು ಪಡೆದಿದ್ದರು. ಟೋಕಿಯೊ ಒಲಿಂಪಿಕ್ಸ್‌ನಲ್ಲಿ ನೀಡಿದ ಮಹೋನ್ನತ ಸಾಧನೆ ಹಿನ್ನೆಲೆಯಲ್ಲಿ ಭಾರತೀಯ ಆಟಗಾರರು ಮತ್ತು ಕೋಚ್‌ ಪ್ರಶಸ್ತಿ ಜಯಿಸಿದ್ದರು. ಪುರುಷರ ತಂಡದ ಕೋಚ್‌ ಗ್ರಹಾಂ ರೀಡ್‌, ಶ್ರೀಜೇಶ್‌ ಮತ್ತು ಸವಿತಾ ಪ್ರಶಸ್ತಿ ಗೆದ್ದವರಲ್ಲಿ ಸೇರಿದ್ದರು.