ಏಕದಿನಕ್ಕೆ ಮರಳುವರೇ ಹಾರ್ದಿಕ್‌ ಪಾಂಡ್ಯ?

ಹೊಸದಿಲ್ಲಿ: ಆಲ್‌ರೌಂಡರ್‌ ಹಾರ್ದಿಕ್‌ ಪಾಂಡ್ಯ ಕಳೆದ ಕೆಲವು ತಿಂಗಳಿಂದ ಟೀಮ್‌ ಇಂಡಿಯಾದಿಂದ ಬೇರ್ಪಟ್ಟಿದ್ದಾರೆ. ಕಳೆದ ಏಶ್ಯ ಕಪ್‌ ಕ್ರಿಕೆಟ್‌ ಕೂಟದ ವೇಳೆ ಗಾಯಾಳಾದುದೇ ಇದಕ್ಕೆ ಕಾರಣ. ಇದರಿಂದ ಅವರು ಆಸ್ಟ್ರೇಲಿಯ ಪ್ರವಾಸದ ಮೊದಲ ಹಂತವನ್ನು ತಪ್ಪಿಸಿಕೊಂಡಿದ್ದಾರೆ. ಕೊನೆಯಲ್ಲಿ ನಡೆಯುವ ಏಕದಿನ ಸರಣಿಯ ವೇಳೆ ತಂಡಕ್ಕೆ ಆಯ್ಕೆಯಾಗಬಹುದೇ ಎಂಬುದೊಂದು ನಿರೀಕ್ಷೆ.

ಆದರೆ ಇದಕ್ಕಾಗಿ ಹಾರ್ದಿಕ್‌ ಪಾಂಡ್ಯ ಪ್ರಸಕ್ತ ಋತುವಿನ ರಣಜಿ ಪಂದ್ಯಾವಳಿಯಲ್ಲಿ ಆಡಿ ಫಿಟ್‌ನೆಸ್‌ ಪರೀಕ್ಷಿಸಬೇಕೆಂದು ಬಿಸಿಸಿಐ ಸೂಚಿಸಿದೆ. ಹೀಗಾಗಿ ಅವರು ಬರೋಡ ಪರ ರಣಜಿ ಪಂದ್ಯ ಆಡುವ ಸಾಧ್ಯತೆ ಇದೆ.

ಇತ್ತೀಚೆಗೆ ಸಾಮಾಜಿಕ ಜಾಲತಾಣದಲ್ಲಿ ತಮ್ಮ ಫಿಟ್‌ನೆಸ್‌ ಸುಧಾರಣೆಗೊಂಡ ಬಗ್ಗೆ ಹಾರ್ದಿಕ್‌ ಪಾಂಡ್ಯ ಪೋಸ್ಟ್‌ ಹಾಕಿದ್ದರು. ಬಳಿಕ ಅವರನ್ನು ನ್ಯೂಜಿಲ್ಯಾಂಡ್‌ “ಎ’ ವಿರುದ್ಧ ಡಿ. 7ರಿಂದ ನಡೆಯುವ 3 ಪಂದ್ಯಗಳ ಏಕದಿನ ಸರಣಿಗಾಗಿ ಭಾರತ “ಎ’ ತಂಡಕ್ಕೆ ಆಯ್ಕೆ ಮಾಡಲಾಗಿತ್ತು. ಆದರೆ ಇನ್ನೂ ಸಂಪೂರ್ಣ ಫಿಟ್‌ನೆಸ್‌ಗೆ ಮರಳದ ಕಾರಣ ಪಾಂಡ್ಯ ಅವರನ್ನು ತಂಡದಿಂದ ಕೈಬಿಡಲಾಗಿದೆ.

ಡಿ. 14ರಿಂದ ಮುಂಬಯಿ ವಿರುದ್ಧ ನಡೆಯುವ ರಣಜಿ ಪಂದ್ಯದಲ್ಲಿ ಹಾರ್ದಿಕ್‌ ಪಾಂಡ್ಯ ಬರೋಡವನ್ನು ಪ್ರತಿನಿಧಿಸಲಿದ್ದಾರೆ ಎಂದು ತಿಳಿದು ಬಂದಿದೆ. ಅವರು 2016-17ರ ಋತುವಿನಲ್ಲಿ ಕೊನೆಯ ಸಲ ಪ್ರಥಮ ದರ್ಜೆ ಪಂದ್ಯವಾಡಿದ್ದರು.