ನ್ಯಾಯಾಂಗ ಸುಧಾರಣೆ ಖಂಡಿಸಿ ಇಸ್ರೇಲ್‌ನಲ್ಲಿ ಹೋರಾಟ ತೀವ್ರ

ಜೆರುಸಲೇಂ: ಇಸ್ರೇಲ್‌ನಲ್ಲಿ ಪ್ರಧಾನಿ ಬೆಂಜಮಿನ್‌ ನೆತನ್ಯಾಹು ನೇತೃತ್ವದ ಸಮ್ಮಿಶ್ರ ಸರ್ಕಾರ ಭಾರೀ ನ್ಯಾಯಾಂಗೀಯ ಸುಧಾರಣೆಗಳನ್ನು ಮಾಡಲು ಉದ್ದೇಶಿಸಿದೆ. ಇದರ ವಿರುದ್ಧ ತೀವ್ರಗೊಂಡಿರುವ ಜನರ ಹೋರಾಟ, ಸತತ 10ನೇ ವಾರ ಪೂರೈಸಿದೆ. ದೇಶಾದ್ಯಂತ ಜನ ಶಾಂತಿಯುತವಾಗಿ ಹೋರಾಟ ಮಾಡುತ್ತಿದ್ದಾರೆ. ಶನಿವಾರ ಪ್ರತಿಭಟನೆ ತೀವ್ರಗೊಂಡಿದ್ದು, ಟೆಲ್‌ ಅವಿವ್‌ನಲ್ಲಿ ಇದೇ ಮೊದಲ ಬಾರಿಗೆ 1 ಲಕ್ಷಕ್ಕೂ ಅಧಿಕ ಮಂದಿ ಪ್ರತಿಭಟನೆ ನಡೆಸಿದ್ದಾರೆ. ಈ ಪೈಕಿ ಮೂವರನ್ನು ವಶಕ್ಕೆ ಪಡೆಯಲಾಗಿದೆ.

ಈ ವಾರ ನೆತನ್ಯಾಹು ನೇತೃತ್ವದ ಸರ್ಕಾರ ಸಂಸತ್ತಿನಲ್ಲಿ ನ್ಯಾಯಾಂಗ ಸುಧಾರಣೆಗಳಿಗೆ ಚಾಲನೆ ನೀಡಲಿದೆ. ಈ ಸುಧಾರಣೆಗಳು ಇಸ್ರೇಲ್‌ನ ಪ್ರಜಾಪ್ರಭುತ್ವವನ್ನು ತೀವ್ರವಾಗಿ ದುರ್ಬಲಗೊಳಿಸಲಿದೆ ಎನ್ನುವುದು ಜನರ ಆತಂಕ. ಆದ್ದರಿಂದ ಈ ಬಗ್ಗೆ ಚರ್ಚೆ ನಡೆಯಬೇಕೆಂದು ಜನರು ಆಗ್ರಹಿಸುತ್ತಿದ್ದಾರೆ. ಆದರೆ ಸರ್ಕಾರ ಮಾತ್ರ ಏನಾದರಾಗಲೀ ಸುಧಾರಣೆ ಶತಃಸಿದ್ಧ ಎಂದು ಪಟ್ಟುಹಿಡಿದು ಕುಳಿತಿದೆ.

ಏನೇನು ಸುಧಾರಣೆಗಳು?:
ಜನರಿಗೆ ಆತಂಕ ಮೂಡಿಸಿರುವುದು ಎರಡು ಮುಖ್ಯ ಸುಧಾರಣೆಗಳು. ನ್ಯಾಯಾಧೀಶರ ಆಯ್ಕೆ ಸಮಿತಿಯಲ್ಲಿ ಸರ್ಕಾರಕ್ಕೆ ಇನ್ನು ಗರಿಷ್ಠ ಹಿಡಿತವಿರುತ್ತದೆ. ಹಾಗೆಯೇ ಇಸ್ರೇಲ್‌ನ ಮೂಲಭೂತ ಕಾನೂನುಗಳಿಗೆ ಮಾಡುವ ಯಾವುದೇ ತಿದ್ದುಪಡಿಯನ್ನು ರದ್ದುಪಡಿಸುವ ಅಧಿಕಾರ ಇನ್ನು ಅಲ್ಲಿನ ಸರ್ವೋಚ್ಚ ಪೀಠಕ್ಕೆ ಇರುವುದಿಲ್ಲ. ಇದನ್ನು ಜಾರಿ ಮಾಡುವುದಕ್ಕೆ ನೆತನ್ಯಾಹು ಸರ್ಕಾರ ಹೊರಟಿದೆ.