Gundlupete: ಅಕ್ರಮವಾಗಿ 3 ಕೆ.ಜಿ. 100 ಗ್ರಾಂ ಗಾಂಜಾ ಸಾಗಣೆ: ಬಂಧನ

ಗುಂಡ್ಲುಪೇಟೆ(ಚಾಮರಾಜನಗರ): ಕಾರಿನಲ್ಲಿ ಅಕ್ರಮವಾಗಿ 3 ಕೆ.ಜಿ 100 ಗ್ರಾಂ ಗಾಂಜಾ ಸಾಗಣೆ ಮಾಡುತ್ತಿದ್ದ ಆರೋಪಿಯನ್ನು ಗುಂಡ್ಲುಪೇಟೆ ಠಾಣೆ ಪೊಲೀಸರು ಪಟ್ಟಣದ ಹೊರ ವಲಯದ ಗುಂಡ್ಲುಪೇಟೆ-ಮೈಸೂರು ಹೆದ್ದಾರಿಯ ಕೆಬ್ಬೆಕಟ್ಟೆ ಶನೇಶ್ವರ ದೇವಾಲಯದ ಬಳಿ ಮಾಲು ಸಮೇತ ಹಿಡಿದು ಬಂಧಿಸಿದ ಘಟನೆ ಜ.5ರ ರವಿವಾರ ನಡೆದಿದೆ.

ಹನೂರು ತಾಲೂಕಿನ ಮಂಚಾಪುರ ಗ್ರಾಮದ ಗೋಪಾಲಕೃಷ್ಣ(47) ಬಂಧಿತ ಆರೋಪಿ. ಈತ ಲಾರಿ ಡ್ರೈವರ್ ಆಗಿದ್ದು, ಪ್ರಸ್ತುತ ಬೆಂಗಳೂರಿನ ರಾಜರಾಜೇಶ್ವರಿ ನಗರದ ವಾಸಿಯಾಗಿದ್ದಾನೆ.

ಆರೋಪಿಯು ಗಾಂಜಾ ಸಾಗಣೆ ಮಾಡುತ್ತಿದ್ದ ಖಚಿತ ಮಾಹಿತಿ ಮೇರೆಗೆ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಕವಿತಾ, ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ಶಶಿಧರ್ ಹಾಗೂ ಪೊಲೀಸ್ ಉಪಾಧೀಕ್ಷಕ ಲಕ್ಷ್ಮಯ್ಯ ಮಾರ್ಗದರ್ಶನದಲ್ಲಿ ಗುಂಡ್ಲುಪೇಟೆ ಠಾಣೆ ಆರಕ್ಷಕ ನಿರೀಕ್ಷಕ ಎಸ್.ಪರಶಿವಮೂರ್ತಿ ನೇತೃತ್ವದ ತಂಡ ಮೈಸೂರು ಕಡೆಯಿಂದ ಬರುತ್ತಿದ್ದ ಕಾರನ್ನು ತಡೆದು ಪರಿಶೀಲನೆ ನಡೆಸಿದಾಗ 3 ಕೆ.ಜಿ 100 ಗ್ರಾಂ ಒಣ ಗಾಂಜಾ ಪತ್ತೆಯಾಗಿದೆ.

ನಂತರ ಆತನನ್ನು ಬಂಧಿಸಿ, ಮಾಲು ಸಮೇತ ಕಾರನ್ನು ವಶಕ್ಕೆ ಪಡೆಯಲಾಗಿದೆ. ಈ ಸಂಬಂಧ ಗುಂಡ್ಲುಪೇಟೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಕಾರ್ಯಾಚರಣೆಯಲ್ಲಿ ಸಬ್ ಇನ್ಸ್ ಪೆಕ್ಟರ್ ಸಾಹೇಬಗೌಡ, ಪೇದೆಗಳಾದ ಗಂಗಾಧರ್, ಚಿನ್ನಸ್ವಾಮಿ, ಮಂಜುನಾಥ, ಶಶಿಧರಮೂರ್ತಿ, ಮಹೇಶ, ಸುಬ್ರಮಣ್ಯ, ಲಕ್ಷ್ಮಣ ಗೊಳಸಂಗಿ, ಚಾಮರಾಜನಗರ ಡಿಎಸ್‍ಬಿ ಶಾಖೆಯ ಸಿಬ್ಬಂದಿ ನಾಗರಾಜು, ಜಯಶಂಕರಮೂರ್ತಿ, ಜಯಕುಮಾರ್ ಇತರರು ಭಾಗವಹಿಸಿದ್ದರು.