Gundlupete: ಹುರುಳಿ ಕಾವಲು ಕಾಯುತ್ತಿದ್ದ ರೈತನ ಮೇಲೆ ಆನೆ ದಾಳಿ; ಕೈ ಕುತ್ತಿಗೆಗೆ ಗಾಯ

ಗುಂಡ್ಲುಪೇಟೆ: ಹುರುಳಿ ಸೆತ್ತೆ ಕಾವಲು ಕಾಯುತ್ತಿದ್ದ ರೈತನ ಮೇಲೆ ಆನೆ ದಾಳಿ ನಡೆಸಿ ಗಾಯಗೊಳಿಸಿರುವ ಘಟನೆ ತಾಲೂಕಿನ ಬಂಡೀಪುರ ಅಭಯಾರಣ್ಯದ ಓಂಕಾರ ಅರಣ್ಯ ವಲಯದ ದೇಶಿಪುರ ಗ್ರಾಮದಲ್ಲಿ ನಡೆದಿದೆ.

ದೇಶಿಪುರ ಗ್ರಾಮದ ಸಿದ್ದರಾಜಶೆಟ್ಟಿ(48) ಎಡ ಗೈ ಹಾಗೂ ಕುತ್ತಿಗೆ ಭಾಗಕ್ಕೆ ಗಾಯವಾಗಿದೆ. ಗ್ರಾಮದ ರಸ್ತೆಯಲ್ಲಿ ಹುರುಳಿ ಒಕ್ಕಣೆ ಮಾಡಿ ಸಿದ್ದರಾಜಶೆಟ್ಟಿ ಹಾಗೂ ಮಹದೇವಶೆಟ್ಟಿ ಇಬ್ಬರು ಕಾಯುವ ಸಲುವಾಗಿ ಅಲ್ಲೇ ಟಾರ್ಪಲ್ ಹೊದ್ದು ಮಲಗಿದ್ದರು. ಶುಕ್ರವಾರ ಬೆಳಗಿನ ಜಾವ 4ರ ಸಮಯ ಕಾಡಾನೆ ಆಹಾರ ಅರಸಿ ನಾಡಿಗೆ ಬಂದದೆ. ಅಲ್ಲೇ ರಸ್ತೆ ಬದಿಯಲ್ಲಿದ್ದ ಹುರುಳಿ ಸೆತ್ತೆ ತಿಂದು ಸಾಗುತ್ತಿದ್ದ ವೇಳೆ ಮಲಗಿದ್ದ ಸಿದ್ದರಾಜ ಶೆಟ್ಟಿ ಕೈ ತುಳಿದಿದ್ದು, ಕುತ್ತಿಗೆ ಭಾಗವನ್ನು ಗಾಯಗೊಳಿಸಿದೆ. ಈ ಸಂದರ್ಭ ಜೊತೆಯಲ್ಲಿದ್ದ ಮಹದೇವ ಶೆಟ್ಟಿ ಪಾರಾಗಿ ಚೀರಿಕೊಂಡಿದ್ದಾರೆ. ನಂತರ ಆನೆ ಹೆದರಿ ಓಡಿ ಹೋಗಿದೆ.

ಮಾಹಿತಿ ಅರಿತ ಓಂಕಾರ ವಲಯದ ಅರಣ್ಯಾಧಿಕಾರಿಗಳು ಸ್ಥಳಕ್ಕೆ ದೌಡಾಯಿಸಿ ಗಾಯಾಳುವನ್ನು ತಾಲೂಕು ಸಾರ್ವಜನಿಕ ಆಸ್ಪತ್ರೆಗೆ ರವಾನಿಸಿ ಪ್ರಥಮ ಚಿಕಿತ್ಸೆ ಕೊಡಿಸಿದ್ದಾರೆ. ಹೆಚ್ಚಿನ ಚಿಕಿತ್ಸೆಗಾಗಿ ಚಾಮರಾಜನಗರ ಜಿಲ್ಲಾಸ್ಪತ್ರೆಗೆ ದಾಖಲಿಸಿದ್ದಾರೆ.

ಆಸ್ಪತ್ರೆಗೆ ಎಸಿಎಫ್ ಭೇಟಿ: ಆನೆ ದಾಳಿಯಿಂದ ಗಾಯಗೊಂಡು ಜಿಲ್ಲಾಸ್ಪತ್ರೆಗೆ ದಾಖಲಾಗಿದ್ದ ರೈತನ ಆರೋಗ್ಯವನ್ನು ಗುಂಡ್ಲುಪೇಟೆ ವಲಯ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ಸುರೇಶ್ ಹಾಗೂ ಸಿಬ್ಬಂದಿ ವಿಚಾರಿಸಿ ಚಿಕಿತ್ಸೆ ವೆಚ್ಚ ಭರಿಸುವುದಾಗಿ ತಿಳಿಸಿದ್ದಾರೆ.