ಮುಂಬೈ: ವಡಾ ಪಾವ್ ಯಾರಿಗೆ ಗೊತ್ತಿಲ್ಲ ಹೇಳಿ. ಮೃದುವಾದ ಪಾವ್ ನಡುವೆ ಬಿಸಿ ಬಿಸಿ ವಡಾ ಇರಿಸಿ ತಿನ್ನುವ ಗಮ್ಮತ್ತಿಗೆ ಮನಸೋಲದವರಿಲ್ಲ. ಇಂಡಿಯನ್ ಬರ್ಗರ್ ಎಂದೇ ಖ್ಯಾತವಾಗಿರುವ ವಡಾ ಪಾವ್ ಅನ್ನು ಹಲವರು ಹೊಸ ಹೊಸ ಬಗೆಯಲ್ಲಿ ತಯಾರಿಸಿದ್ದು, ಇದರ ಮುಂದುವರಿದ ಭಾಗವೇ ಗುಲಾಬ್ ಜಾಮೂನ್ ಪಾವ್!
ಹೌದು, ಕ್ಯಾಟಿ ಸ್ಟಾರ್ಕ್ ಎಂಬವರು ಟ್ವಿಟ್ಟರ್ ನಲ್ಲಿ ಈ ಗುಲಾಬ್ ಜಾಮೂನ್ ಪಾವ್ ನ ಫೋಟೋವನ್ನು ಹಂಚಿಕೊಂಡಿದ್ದು ಸಖತ್ ವೈರಲ್ ಆಗಿದೆ. ಕ್ಯಾಟಿ ಹಂಚಿಕೊಂಡಿರುವ ಫೋಟೋದಲ್ಲಿ ಪಾವ್ ಮಧ್ಯೆ ಎಂದು ಜಾಮೂನು ಇರಿಸಲಾಗಿದ್ದು, ಎದುರಿರುವ ಪಾತ್ರೆಯಲ್ಲಿ ಮತ್ತಷ್ಟು ಗುಲಾಬ್ ಜಾಮೂನುಗಳು ತುಂಬಿದೆ.
ಕ್ಯಾಟಿ ಸ್ಟಾರ್ಕ್ ಟ್ವಿಟ್ಟರ್ ಪೋಸ್ಟ್ ಗೆ ಮಿಶ್ರ ಪ್ರತಿಕ್ರಿಯೆ ಎದುರಾಗಿದ್ದು, ಹಲವರು ಚೆನ್ನಾಗಿಲ್ಲ ಎಂದರೆ ಮತ್ತೆ ಕೆಲವು ಒಮ್ಮೆ ರುಚಿ ನೋಡಬೇಕು ಎಂದು ಇಂಗಿತ ವ್ಯಕ್ತಪಡಿಸಿದ್ದಾರೆ.
ಆದರೆ ಓರ್ವ ಟ್ವಿಟ್ಟರ್ ಬಳಕೆದಾರ ಮಾತ್ರ ವಡಾ ಪಾವ್ ಅನ್ನು ಹಾಳು ಮಾಡಬೇಡಿ ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ. ಅಂದಹಾಗೆ ಈ ಗುಲಾಬ್ ಜಾಮೂನ್ ಪಾವ್ ಮಾಡುವ ಅಂಗಡಿ ಎಲ್ಲಿದೆ ಎಂದು ಮಾತ್ರ ಇನ್ನೂ ಬಯಲಾಗಿಲ್ಲ.
