1.43 ಲಕ್ಷ ಕೋಟಿ ರೂ. ಜಿಎಸ್‌ಟಿ ಸಂಗ್ರಹ

ಹೊಸದಿಲ್ಲಿ: ಕೊರೊನಾ ಕೇಸುಗಳು ಇಳಿಕೆಯಾದ ಮೇಲೆ ಆರ್ಥಿಕತೆ ಚೇತರಿಕೆಯ ಹಳಿಗೆ ಬರುತ್ತಿದೆ ಎಂಬುದಕ್ಕೆ ಸಾಕ್ಷಿ ಎಂಬಂತೆ ಸತತ ಆರನೇ ಬಾರಿಗೆ 1.43 ಲಕ್ಷ ಕೋಟಿ ರೂ. ಮೀರಿ ಜಿಎಸ್‌ಟಿ ಸಂಗ್ರಹವಾಗಿದೆ.

ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಶೇ. 28ರಷ್ಟು ಜಿಎಸ್‌ಟಿ ಸಂಗ್ರಹ ಹೆಚ್ಚಾಗಿದೆ. ಮಾರುಕಟ್ಟೆಯಲ್ಲಿ ಹೆಚ್ಚಿದ ಬೇಡಿಕೆ, ವಸ್ತುಗಳ ದರ ಏರಿಕೆ ಮತ್ತು ಹಬ್ಬದ ಖರೀದಿಯಿಂದಾಗಿ ಈ ಮಟ್ಟದ ಏರಿಕೆಯಾಗಿದೆ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಅಲ್ಲದೆ ಇದು ಆರ್ಥಿಕ ಚೇತರಿಕೆಯ ಲಕ್ಷಣಗಳಾಗಿವೆ ಎಂದು ಕೇಂದ್ರ ವಿತ್ತ ಸಚಿವಾಲಯ ಹೇಳಿದೆ.

1.43 ಲಕ್ಷ ಕೋಟಿಯಲ್ಲಿ 24,710 ಕೋಟಿ ಸಿಜಿಎಸ್‌ಟಿ, 30,951 ಎಸ್‌ಜಿಎಸ್‌ಟಿ, 77,782 ಕೋಟಿ ರೂ. ಐಜಿಎಸ್‌ಟಿ ಸೇರಿದೆ. ಈ ಐಜಿಎಸ್‌ಟಿಯಲ್ಲಿ 42,067 ಕೋಟಿ ರೂ. ವಸ್ತುಗಳ ಆಮದುವಿನಿಂದ, 10,168 ಕೋಟಿ ಸೆಸ್‌ನಿಂದ ಬಂದಿದೆ.

ಈ ಮಧ್ಯೆ ಆಗಸ್ಟ್‌ನಲ್ಲಿ ಕರ್ನಾಟಕವೂ ಜಿಎಸ್‌ಟಿ ಸಂಗ್ರಹದಲ್ಲಿ ಉತ್ತಮ ಸಾಧನೆ ಮಾಡಿದೆ. ಇಲ್ಲಿ ಶೇ. 29ರಷ್ಟು ಏರಿಕೆಯಾಗಿದೆ. ಮಿಜೋರಾಂನಲ್ಲಿ ಶೇ. 78 ಮತ್ತು ಗೋವಾದಲ್ಲಿ ಶೇ. 32ರಷ್ಟು ಏರಿಕೆಯಾಗಿದೆ.