ತೈಲೋತ್ಪನ್ನಗಳ ರಫ್ತು ತೆರಿಗೆ ಶೇ.11 ಇಳಿಕೆ

ನವದೆಹಲಿ: ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕಚ್ಚಾತೈಲ ದರ ಇಳಿಕೆಯಾಗಿರುವ ಹಿನ್ನೆಲೆಯಲ್ಲಿ ಪೆಟ್ರೋಲ್‌, ಡೀಸೆಲ್‌ ಮತ್ತು ವೈಮಾನಿಕ ಇಂಧನದ ರಫ್ತು ಮೇಲೆ ವಿಧಿಸಲಾಗುವ ಅನಿರೀಕ್ಷಿತ ಲಾಭ ತೆರಿಗೆ (ವಿಂಡ್‌ಫಾಲ್‌ ಟ್ಯಾಕ್ಸ್‌)ಯನ್ನು ಶೇ.11ರವರೆಗೆ ಇಳಿಕೆ ಮಾಡಲಾಗಿದೆ.

ಅದರಂತೆ, ಪ್ರತಿ ಲೀಟರ್‌ ಪೆಟ್ರೋಲ್‌ಗೆ 6 ರೂ. ರಫ್ತು ಶುಲ್ಕ ರದ್ದು ಮಾಡಲಾಗಿದೆ. ಪ್ರತಿ ಲೀಟರ್‌ ಪೆಟ್ರೋಲ್‌, ಡೀಸೆಲ್‌ ಮತ್ತು ವೈಮಾನಿಕ ಇಂಧನಕ್ಕೆ ಕ್ರಮವಾಗಿ 2 ರೂ., 11 ರೂ, 4 ರೂ. ತೆರಿಗೆ ಇಳಿಕೆ ಮಾಡಲಾಗಿದೆ ಎಂದು ಕೇಂದ್ರ ಸರ್ಕಾರ ಪ್ರಕಟಿಸಿದೆ.

ಕೇಂದ್ರ ಸರ್ಕಾರದ ಈ ನಿರ್ಧಾರದಿಂದಾಗಿ ದೇಶಿಯ ಮಾರುಕಟ್ಟೆಯಲ್ಲಿ ಪೆಟ್ರೋಲ್‌, ಡೀಸೆಲ್‌ ದರದ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ. ಇತರ ದೇಶಗಳಿಗೆ ಪೆಟ್ರೋಲಿಯಂ ಉತ್ಪನ್ನಗಳನ್ನು ರಫ್ತು ಮಾಡುವ ಕಂಪನಿಗಳ ಮೇಲೆ ಇದು ಪರಿಣಾಮ ಬೀರುತ್ತದೆ. ಕೇಂದ್ರ ಸರ್ಕಾರ ಜು.1ರಂದು ಅನಿರೀಕ್ಷಿತ ತೆರಿಗೆ (ವಿಂಡ್‌ಫಾಲ್‌ ಟ್ಯಾಕ್ಸ್‌) ಜಾರಿಗೊಳಿಸಿ ಆದೇಶ ನೀಡಿತ್ತು.