ಚೆನ್ನೈ: ಇತ್ತೀಚಿನ ದಿನಗಳಲ್ಲಿ ಸೂಪರ್‌ ಹಿಟ್‌ ಸಿನಿಮಾಗಳು ರೀ – ರಿಲೀಸ್ ಆಗುವ ಟ್ರೆಂಡ್‌ ಹುಟ್ಟಿಕೊಂಡಿದೆ. ನಟರ ಹುಟ್ಟುಹಬ್ಬ ಅಥವಾ ಪ್ರೇಮಿಗಳ ದಿನ.. ಹೀಗೆ ವಿಶೇಷ ದಿನದಂದು ಆ ಕಾಲದಲ್ಲಿ ಹಿಟ್‌ ಆದ ಸಿನಿಮಾಗಳನ್ನು ರೀ – ರಿಲೀಸ್ ಮಾಡಲಾಗುತ್ತಿದೆ.
ಈ ಸಾಲಿಗೆ ದಳಪತಿ ವಿಜಯ್ ಅವರ ಸಿನಿಮಾವೊಂದು ಸೇರಿದೆ. ದಳಪತಿ ವಿಜಯ್ – ತ್ರಿಷಾ ಕೃಷ್ಣನ್‌ ಜೊತೆಯಾಗಿ ಕಾಣಿಸಿಕೊಂಡಿದ್ದ, 2004 ರಲ್ಲಿ ಬಂದ ʼಗಿಲ್ಲಿʼ ಸಿನಿಮಾ 20 ವರ್ಷದ ಬಳಿಕ ಥಿಯೇಟರ್‌ ನಲ್ಲಿ ಮತ್ತೆ ತೆರೆ ಕಾಣಲಿದೆ.
ದಳಪತಿ ವಿಜಯ್ ಅವರ ʼಗಿಲ್ಲಿʼ ಮಹೇಶ್‌ ಬಾಬು ಅವರ ʼಒಕ್ಕಡುʼ ಸಿನಿಮಾದ ರಿಮೇಕ್‌ ಸಿನಿಮಾವಾಗಿದೆ. ಆದರೆ ರಿಮೇಕ್‌ ಆದರೂ ಸಿನಿಮಾ ಕಾಲಿವುಡ್ ಭರ್ಜರಿ ಯಶಸ್ಸು ಕಂಡಿತ್ತು. ಕಬಡ್ಡಿ ಆಟಗಾರನಾಗಿ ಗ್ಯಾಂಗ್‌ ಸ್ಟರ್‌ ವಿರುದ್ಧ ಹೋರಾಡುವ ದಳಪತಿ ವಿಜಯ್ , ತ್ರಿಷಾ ಜೊತೆ ರೊಮ್ಯಾಂಟಿಕ್‌ ಜೋಡಿಯಾಗಿ ಗಮನ ಸೆಳೆದಿದ್ದರು.
ವಿದ್ಯಾಸಾಗರ್‌ ಅವರ ಅದ್ಭುತ ಮ್ಯೂಸಿಕ್‌ ಹಾಗೂ ವಿಜಯ್, ತ್ರಿಷಾ ಹಾಗೂ ಪ್ರಕಾಶ್‌ ರಾಜ್‌ ಅವರ ಅಭಿನಯ ಪ್ರೇಕ್ಷಕರಿಗೆ ಮೋಡಿ ಮಾಡಿತ್ತು. ಈ ಸಿನಿಮಾವನ್ನು ಧರಣಿ ಅವರು ನಿರ್ದೇಶನ ಮಾಡಿದ್ದರು.
ಇದೇ ಏಪ್ರಿಲ್‌ 20 ರಂದು ಥಿಯೇಟರ್‌ ನಲ್ಲಿ ಸ್ಪೋರ್ಟ್ಸ್‌ ಆ್ಯಕ್ಷನ್ ʼಗಿಲ್ಲಿʼ ಸಿನಿಮಾ ಮರು ಬಿಡುಗಡೆ ಆಗಲಿದೆ ಎಂದು ಚಿತ್ರತಂಡ ಹೇಳಿದೆ.
ಆಶಿಶ್ ವಿದ್ಯಾರ್ಥಿ, ಧಮು, ಮಾಯಿಲ್‌ಸಾಮಿ, ಜಾನಕಿ ಸಬೇಶ್, ನ್ಯಾನ್ಸಿ ಜೆನ್ನಿಫರ್ ಮುಂತಾದವರು ಸಿನಿಮಾದಲ್ಲಿ ಪ್ರಧಾನ ಪಾತ್ರದಲ್ಲಿ ಕಾಣಸಿಕೊಂಡಿದ್ದರು.
