ಗಣೇಶ್‌ ನಾಯಕರಾಗಿರುವ “99′ ಚಿತ್ರ ತೆರೆಕಂಡಿರೋದು ನಿಮಗೆ ಗೊತ್ತೇ ಇದೆ. ಹೊಸ ಬಗೆಯ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಗಣೇಶ್‌ ಮುಖದಲ್ಲಿ ಈಗ ನಗು ಮೂಡಿದೆ. ಅದಕ್ಕೆ ಕಾರಣ ಸಿನಿಮಾ ನೋಡಿದವರಿಂದ ಸಿಗುತ್ತಿರುವ ಪ್ರತಿಕ್ರಿಯೆ.
ಹೌದು, ಗಣೇಶ್‌ ಅವರ ಗೆಟಪ್‌, ಪಾತ್ರ ಪೋಷಣೆ ಮಾಡಿದ ರೀತಿಗೆ ಮೆಚ್ಚುಗೆ ವ್ಯಕ್ತವಾಗುವ ಮೂಲಕ ಗಣೇಶ್‌ ಅವರ ಯಶಸ್ಸಿನ ಪಾತ್ರಗಳ ಲಿಸ್ಟ್‌ಗೆ “99′ ಕೂಡಾ ಸೇರ್ಪಡೆಗೊಂಡಿದೆ. ಯಾವುದಕ್ಕೂ ತಲೆಕೆಡಿಸಿಕೊಳ್ಳದ ಅಲೆಮಾರಿ ಪಾತ್ರದಲ್ಲಿ ಗಣೇಶ್‌ ಕಾಣಿಸಿಕೊಂಡಿದ್ದಾರೆ.
ಟ್ರಾವೆಲ್‌ ಫೋಟೋಗ್ರಾಫ‌ರ್‌ ಪಾತ್ರ. ಫೋಟೋಗ್ರಫಿ ಹೇಗೆ ಮಾಡುವುದು ಎಂದು ಸಲಹೆ ಕೊಡುವವನ ಜೀವನದ ಕಥೆ. ಆ ಕಥೆ ಪ್ರತಿಯೊಬ್ಬರಿಗೂ ರಿಲೇಟ್‌ ಆಗುವಷ್ಟರ ಮಟ್ಟಿಗೆ ಪರಿಣಾಮ ಬೀರುತ್ತಿದ್ದು, ಸಿನಿಮಾ ನೋಡಿದವರಿಗೆ ತಮ್ಮ ಸ್ಕೂಲ್‌ ಡೇಸ್‌ ನೆನಪಾಗುತ್ತಿದೆ.
ನನ್ನ ಮಟ್ಟಿಗೆ ಇದು ಹೊಸ ಬದಲಾವಣೆಯ ಸಿನಿಮಾ. ಜನ ಮೆಚ್ಚಿಕೊಂಡು, ಖುಷಿಪಟ್ಟಿದ್ದಾರೆ. ಚಿತ್ರದ ಹಾಡುಗಳನ್ನು ಕೂಡಾ ಜನ ಇಷ್ಟಪಟ್ಟಿದ್ದಾರೆ. ಸಿನಿಮಾ ಹೆಸರು 99 ಆಗಿರಬಹುದು. ಆದರೆ, ಪ್ರೇಕ್ಷಕರಿಂದ 100 ಪರ್ಸೆಂಟ್‌ ಪ್ರತಿಕ್ರಿಯೆ ಸಿಗುತ್ತಿದೆ ಎನ್ನುವುದು ಗಣೇಶ್‌ ಮಾತು.
ಇನ್ನು, ನಿರ್ಮಾಪಕ ರಾಮು ಕೂಡಾ ಚಿತ್ರದ ಬಗ್ಗೆ ಖುಷಿಯಾಗಿದ್ದಾರೆ. ಕಲೆಕ್ಷನ್‌ ವಿಷಯದಲ್ಲೂ ಚಿತ್ರ ಹಿಂದೆ ಬಿದ್ದಿಲ್ಲ. ಒಳ್ಳೆಯ ಕನ್ನಡ ಸಿನಿಮಾಗಳನ್ನು ಕನ್ನಡ ಪ್ರೇಕ್ಷಕ ಕೈ ಬಿಡಲ್ಲ ಎನ್ನುವುದು ಮತ್ತೂಮ್ಮೆ ಸಾಬೀತಾಗಿದೆ ಎನ್ನುವುದು ಅವರ ಮಾತು.
ಗಣೇಶ್‌ ನಾಯಕರಾಗಿರುವ ಈ ಚಿತ್ರದಲ್ಲಿ ಭಾವನಾ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಅರ್ಜುನ್‌ ಜನ್ಯಾ ಸಂಗೀತದ 100 ಸಿನಿಮಾವಿದು. ಗಣೇಶ್‌ ಮತ್ತು ಭಾವನಾ ಈಗಾಗಲೇ “ರೊಮಿಯೋ’ ಎಂಬ ಯಶಸ್ಸಿನ ಚಿತ್ರ ಕೊಟ್ಟವರು.
ನಿರ್ದೇಶಕ ಪ್ರೀತಂ ಗುಬ್ಬಿ ಮತ್ತು ಗಣೇಶ್‌ ಕಾಂಬಿನೇಷನ್‌ನಲ್ಲಿ “ಮಳೆಯಲಿ ಜೊತೆಯಲಿ’ ಕೂಡ ಯಶಸ್ಸು ಪಡೆದಿತ್ತು. ಈಗ ಅದೇ ಸಕ್ಸಸ್‌ ಕಾಂಬಿನೇಷನ್‌ನಲ್ಲಿ “99′ ಬಿಡುಗಡೆಯಾಗಿದ್ದು, ಯಶಸ್ಸಿನತ್ತ ದಾಪುಗಾಲು ಹಾಕುತ್ತಿದೆ. ನಿರ್ಮಾಪಕ ರಾಮು ಬ್ಯಾನರ್‌ನಲ್ಲಿ ಗಣೇಶ್‌ ಅವರ ಮೊದಲ ಸಿನಿಮಾವಿದು.
