ಗಡಿಪಿಲ: ಅಪಾಯಕಾರಿ ರೈಲು ಕಂಬಿ ತೆರವು

ನರಿಮೊಗರು: ಕಾಣಿಯೂರು-ಮಂಜೇಶ್ವರ ಹೆದ್ದಾರಿಯ ಮಧ್ಯೆ ನರಿಮೊಗರು ಸಮೀಪದ ಗಡಿಪಿಲ ಉದ್ದಮಜಲುವಿನಲ್ಲಿ ರೈಲು ಕಂಬಿಗಳು ದ್ವಿಚಕ್ರ ವಾಹನ ಸವಾರರಿಗೆ ಮೃತ್ಯುಪಾಶವಾಗಿ ಪರಿಣಮಿಸಿತ್ತು. ಈ ಬಗ್ಗೆ ‘ಉದಯವಾಣಿ’ ಸುದಿನ ವರದಿ ಪ್ರಕಟಿಸಿದ್ದು, ರೈಲ್ವೆ ಇಲಾಖೆಯವರು ಅಪಾಯಕಾರಿ ಕಂಬಿಗಳನ್ನು ತೆರವು ಮಾಡಿದ್ದಾರೆ.

ಈ ಹಿಂದೆ ರಸ್ತೆ ಕಿರಿದಾಗಿದ್ದ ಸಂದರ್ಭ ರೈಲು ಹಳಿ ಸಾಗುವ ಕಾರಣ ಸಣ್ಣ ಅಂತರವಿರುವ ರೈಲು ಕಂಬಿಗಳನ್ನು ಹಾಕಲಾಗಿತ್ತು. ಆದರೆ ಈಗ ರಸ್ತೆ ಅಭಿವೃದ್ಧಿಯಿಂದಾಗಿ ಹಿರಿದಾಗಿದ್ದು, ಹೊಸದಾಗಿ ಈಗಿನ ರಸ್ತೆಗೆ ಅನುಗುಣವಾಗಿ ಕಂಬಿಗಳನ್ನೂ ಹಾಕಲಾಗಿತ್ತು. ಆದರೆ ಈ ಹಿಂದೆ ಹಾಕಲಾಗಿದ್ದ ಕಂಬಿಗಳನ್ನು ತೆರವು ಮಾಡದೆ ಹಾಗೇ ಬಿಟ್ಟಿದ್ದರಿಂದ ವಾಹನ ಸವಾರರಿಗೆ ಅಪಾಯಕಾರಿಯಾಗಿ ಪರಿಣಮಿಸಿತ್ತು.

ಈ ಸಮಸ್ಯೆಯ ಕುರಿತು ಸುದಿನ ಸಚಿತ್ರ ವರದಿ ಪ್ರಕಟಿಸಿ ಸಂಬಂಧಪಟ್ಟವರ ಗಮನ ಸೆಳೆದಿತ್ತು.
ರಸ್ತೆಯಲ್ಲಿ ಅಪಾಯಕಾರಿ ಸ್ಥಿತಿಯಲ್ಲಿದ್ದ ರೈಲು ಕಂಬಿಗಳನ್ನು ರೈಲ್ವೆ ಇಲಾಖೆ ತೆರವುಗೊಳಿಸುವ ಮೂಲಕ ಅಪಾಯವನ್ನು ದೂರ ಮಾಡಿದೆ. ಹಾಗೆಯೇ ಈಗಿರುವ ರೈಲು ಕಂಬಿಗೆ ರಿಫ್ಲೆಕ್ಟರ್‌ ಅನ್ನು ಅಳವಡಿಸಿದ್ದಾರೆ.