ಭಾರತದ ಮಾಜಿ ಫ‌ುಟ್ಬಾಲಿಗ ಮನಿತೋಂಬಿ ಸಿಂಗ್‌ ನಿಧನ

ಇಂಫಾಲ: ಭಾರತ ತಂಡದ ಮಾಜಿ ಡಿಫೆಂಡರ್‌, ಮೋಹನ್‌ ಬಗಾನ್‌ ಫ‌ುಟ್‌ಬಾಲ್‌ ತಂಡದ ಮಾಜಿ ನಾಯಕ ಮನಿತೋಂಬಿ ಸಿಂಗ್‌ ಅಕಾಲ ಮೃತ್ಯುವಿಗೀಡಾಗಿದ್ದಾರೆ. ಅವರಿಗೆ ಕೇವಲ 39 ವರ್ಷವಾಗಿತ್ತು.

ಕಳೆದ ಕೆಲವು ದಿನಗಳಿಂದ ಅನಾರೋಗ್ಯದಿಂದ ನರಳುತ್ತಿದ್ದ ಮನಿತೋಂಬಿ ಸಿಂಗ್‌ ರವಿವಾರ ಇಂಫಾಲ ಸಮೀಪದ ತಮ್ಮ ನಿವಾಸದಲ್ಲಿ ಕೊನೆಯುಸಿರೆಳೆದರು. ಪತ್ನಿ, 8 ವರ್ಷದ ಪುತ್ರ ಹಾಗೂ ಅಪಾರ ಅಭಿಮಾನಿಗಳನ್ನು ಅವರು ಅಗಲಿದ್ದಾರೆ. ಮಾಜಿ ನಾಯಕನ ನಿಧನಕ್ಕೆ ಮೋಹನ್‌ ಬಗಾನ್‌ ಪರಿವಾರ ಶೋಕ ವ್ಯಕ್ತಪಡಿಸಿದೆ.

2002ರ ಏಶ್ಯಾಡ್‌ ವೇಳೆ ಮನಿತೋಂಬಿ ಸಿಂಗ್‌ ಭಾರತ ತಂಡದ ಸದಸ್ಯರಾಗಿದ್ದರು. 2003ರ ಕಲ್ಕತ್ತಾ ಫ‌ುಟ್‌ಬಾಲ್‌ ಲೀಗ್‌ನ ಪ್ರೀಮಿಯರ್‌ ಡಿವಿಷನ್‌ ಕೂಟದ ವೇಳೆ ಅವರು ಮೋಹನ್‌ ಬಗಾನ್‌ ತಂಡವನ್ನು ಮೊದಲ ಸಲ ಪ್ರತಿನಿಧಿಸಿದ್ದರು. 2004ರ ಆಲ್‌ ಏರ್‌ಲೈನ್ಸ್‌ ಗೋಲ್ಡ್‌ಕಪ್‌ ಜಯಭೇರಿಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. 2015-16ರಲ್ಲಿ ಕೊನೆಯ ಸಲ ಮಣಿಪುರ ರಾಜ್ಯ ಲೀಗ್‌ ಪಂದ್ಯಾವಳಿಯಲ್ಲಿ ಆಡಿದ್ದರು.