ಐವರು ಸುಲಿಗೆಕೋರರ ಸೆರೆ

ಬೆಂಗಳೂರು: ವೈಟ್‌ಫೀಲ್ಡ್‌ ಸೇರಿ ಸುತ್ತಮುತ್ತಲ ಭಾಗಗಳಲ್ಲಿ ರಾತ್ರಿ ವೇಳೆ ಪಿಸ್ತೂಲ್‌ ತೋರಿಸಿ, ಹೆದರಿಸಿ ದರೋಡೆ ಮಾಡುತ್ತಿದ್ದ ಐವರು ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಶಿವರಾಜ್‌, ಮಂಜುನಾಥ್‌, ಶಿವಶಂಕರ್‌, ಸಂತೋಷ್‌, ದೇವರಾಜ್‌ ಬಂಧಿತರು.

ಆರೋಪಿಗಳ ಪೈಕಿ ಈ ಹಿಂದೆ ಕೊಲೆ ಪ್ರಕರಣದಲ್ಲಿ ಜೈಲುಸೇರಿದ್ದ ರೌಡಿಶೀಟರ್‌ ಶಿವರಾಜ್‌ ಕೆಲದಿನಗಳ ಹಿಂದೆ ಜಾಮೀನಿನ ಮೇಲೆ ಬಿಡುಗಡೆಗೊಂಡಿದ್ದಾನೆ. ಉಳಿದ ಆರೋಪಿಗಳ ಜತೆ ಸೇರಿಕೊಂಡು ಎಚ್‌ಎಎಲ್‌ ಸೇರಿ ಇನ್ನಿತರೆ ಭಾಗಗಳಲ್ಲಿ ನಿರ್ಜನ ಪ್ರದೇಶಗಳಲ್ಲಿ ನಾಡಪಿಸ್ತೂಲ್‌, ಮಾರಕಾಸ್ತ್ರಗಳನ್ನು ಇಟ್ಟುಕೊಂಡು ದಾರಿಹೋಕರ ಬಳಿ ಚಿನ್ನಾಭರಣ ದರೋಡೆ ಮಾಡುವ ಕೃತ್ಯಗಳಲ್ಲಿ ಭಾಗಿಯಾಗಿದ್ದ.

ಅದೇ ರೀತಿ ನ.20ರಂದು ರಾತ್ರಿ ದೊಡ್ಡನೆಕ್ಕುಂದಿ ಸಮೀಪದ ದಾರಿಯಲ್ಲಿ ಆರೋಪಿಗಳು ದರೋಡೆಗೆ ಹೊಂಚು ಹಾಕುತ್ತಿದ್ದ ಮಾಹಿತಿ ಆಧರಿಸಿ ಮಹದೇವಪುರ ಠಾಣೆ ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದಾರೆ. ಆರೋಪಿಗಳ ಬಳಿಯಿದ್ದ ನಾಡಪಿಸ್ತೂಲ್‌, ಮೂರು ಜೀವಂತ ಗುಂಡುಗಳು, ಎರಡು ಲಾಂಗ್‌ ಸೇರಿ ಇನ್ನಿತರೆ ಮಾರಕಾಸ್ತ್ರಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಎಚ್‌ಎಎಲ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.