Gujarat: ನಕಲಿ ಪೊಲೀಸ್‌ ಆಯ್ತು, ಅರೆಸ್ಟ್‌ ಆಯ್ತು.. ಈಗ ನಕಲಿ ಕೋರ್ಟ್‌!

ಅಹಮದಾಬಾದ್‌: ನಕಲಿ ಪೊಲೀಸ್‌ ಆಯ್ತು, ನಕಲಿ ಬಂಧನ ಆಯ್ತು.. ಈಗ ನಕಲಿ ಕೋರ್ಟ್‌ ಪತ್ತೆಯಾಗಿದೆ. ಗುಜರಾತ್‌ನ ಅಹಮದಬಾದ್‌ನಲ್ಲಿ ಈ ಬೆಳವಣಿಗೆ ನಡೆದಿದ್ದು, ನಕಲಿ ನ್ಯಾಯಾಧೀಶ ಮೋರಿಸ್‌ ಸ್ಯಾಮ್ಯುಯೆಲ್‌ ಕ್ರಿಶ್ಚಿಯನ್‌ ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರೆ. ಆತನೇ ನಕಲಿ ಕೋರ್ಟ್‌ ಸ್ಥಾಪನೆಯ ರೂವಾರಿಯಾಗಿದ್ದು, ನ್ಯಾಯಾಧೀಶರಂತೆ ಆದೇಶಗಳನ್ನು ನೀಡುತ್ತಿದ್ದ.

5 ವರ್ಷಗಳಿಂದ ಅದನ್ನು ನಡೆಸುತ್ತಿದ್ದ. ಅಲ್ಲಿ ಭೂ ವ್ಯಾಜ್ಯಗಳನ್ನು ಇಲ್ಲಿ ಬಗೆಹರಿಸಲಾಗುತ್ತಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ. ಭೂ ವಿವಾದ ಪ್ರಕರಣಗಳಲ್ಲಿ ನೇಮಕವಾದ ಮಧ್ಯಸ್ತಿಕೆದಾರ ಎಂದು ಬಿಂಬಿಸಿಕೊಂಡಿದ್ದ. ತನಗೆ ಹಣ ಕೊಟ್ಟವರ ಪರವಾಗಿ ತೀರ್ಪುಗಳನ್ನು ಹೊರಡಿಸಿ ಜನರನ್ನು ವಂಚಿಸುತ್ತಿದ್ದ. ಈ ಸಂಬಂಧ ಇಲ್ಲಿನ ಸಿಟಿ ಸಿವಿಲ್‌ ಕೋರ್ಟ್‌ನ ರಿಜಿಸ್ಟ್ರಾರ್‌ ನೀಡಿದ ದೂರಿನ ಮೇರೆಗೆ ಪೊಲೀಸರು ನಕಲಿ ಕೋರ್ಟನ್ನು ಪತ್ತೆ ಹಚ್ಚಿದ್ದಾರೆ.

2019ರಲ್ಲಿ ವ್ಯಕ್ತಿಯೊಬ್ಬ ಸರ್ಕಾರಿ ಜಮೀನಿನ ಮೇಲೆ ಹಕ್ಕು ಸಾಧಿಸಿ ಕಂದಾಯ ಇಲಾಖೆಯಲ್ಲಿ ತನ್ನ ಹೆಸರು ಸೇರಿಸಲು ಬಯಸಿದ್ದ. ಈ ಪ್ರಕರಣದಲ್ಲಿ ಹಣ ಪಡೆದು ಮೋರಿಸ್‌ ಆತನ ಪರವಾಗಿ ತೀರ್ಪು ನೀಡಿದ್ದ. ಈ ಆದೇಶ ಜಾರಿಗೆ ವಕೀಲರೊಬ್ಬರ ಮೂಲಕ ಅಹಮದಾಬಾದ್‌ ಸಿಟಿ ಸಿವಿಲ್‌ ಕೋರ್ಟಿಗೆ ಅರ್ಜಿ ಸಲ್ಲಿಸಿದ್ದ. ಈ ದಾಖಲೆ ಪರಿಶೀಲಿಸಿದಾಗ ರಿಜಿಸ್ಟ್ರಾರ್‌ಗೆ ಇದು ನಕಲಿ ತೀರ್ಪು ಎಂದು ಗೊತ್ತಾಗಿತ್ತು.