ಬಿಜೆಪಿ ಪಿತೂರಿಯಿಂದ ತೇಜ್‌ ಬಹಾದ್ದೂರ್‌ ನಾಮಪತ್ರ ತಿರಸ್ಕೃತ: ಎಸ್‌ಪಿ ನಾಯಕ

ಆಜಂಗಢ : ‘ವಾರಾಣಸಿಯಲ್ಲಿ ಅಸಲಿ ಚೌಕೀದಾರ್‌ ತನ್ನ ಎದುರು ಸ್ಪರ್ಧೆಗೆ ನಿಂತರೆ ತಾನು ಸೋಲುವೆನೆಂಬ ನಕಲಿ ಚೌಕೀದಾರನ ಭಯದ ಕಾರಣದಿಂದಲೇ ಎಸ್‌ಪಿ ಅಭ್ಯರ್ಥಿ, ಮಾಜಿ ಬಿಎಸ್‌ಎಫ್ ಜವಾನ, ತೇಜ್‌ ಬಹಾದ್ದೂರ್‌ ನಾಮಪತ್ರ ತಿರಸ್ಕೃತವಾಯಿತು’ ಎಂದು ಸಮಾಜವಾದಿ ಪಕ್ಷದ ನಾಯಕ ಮತ್ತು ಸಂಸದ ಧರ್ಮೇಂದ್ರ ಯಾದವ್‌ ಇಂದು ಶುಕ್ರವಾರ ಹೇಳಿದ್ದಾರೆ.

‘ವಾರಾಣಸಿ ಕ್ಷೇತ್ರದಿಂದ ಲೋಕಸಭೆಗೆ ಸ್ಪರ್ಧಿಸಲಿದ್ದ ಎಸ್‌ಪಿ ಅಭ್ಯರ್ಥಿ ತೇಜ್‌ ಬಹಾದ್ದೂರ್‌ ನಾಮಪತ್ರ ತಿರಸ್ಕೃತವಾಗುವುದರ ಹಿಂದೆ ಬಿಜೆಪಿಯ ಪಿತೂರಿ ಇದೆ. ನಕಲಿ ಚೌಕೀದಾರನಿಗೆ ತಾನು ಅಸಲಿ ಚೌಕೀದಾರನ ಎದುರು ಸೋಲುವೆನೆಂಬ ಭಯವಿತ್ತು. ಹಾಗಾಗಿ ಬಿಜೆಪಿಯ ಇಡಿಯ ತಂಡವೇ ಅಂದು ಚುನಾವಣಾ ಆಯೋಗದ ಕಚೇರಿಯಲ್ಲಿ ಕುಳಿತಿತ್ತು ಮತ್ತು ಬಿಜೆಪಿ ಅಧ್ಯಕ್ಷ ಅಮಿತ್‌ ಶಾ ಮತ್ತು ಯುಪಿ ಸಿಎಂ ಯೋಗಿ ಆದಿತ್ಯನಾಥ್‌ ಅವರು ವಾರಾಣಸಿಯಲ್ಲಿ ಪ್ರಚಾರ ನಿರತರಾಗಿದ್ದರು’ ಎಂದು ಯಾದವ್‌ ಹೇಳಿದರು.