ಹೊಸದಿಲ್ಲಿ: ಕಾಮನ್‌ ವೆಲ್ತ್ ಗೇಮ್ಸ್ ಪದಕ ವಿಜೇತ, ಕುಸ್ತಿಪಟು ಅಂಶು ಮಲಿಕ್ ಅವರು ಕುಸ್ತಿ ಫೆಡರೇಶನ್ ಆಫ್ ಇಂಡಿಯಾದ ಅಧ್ಯಕ್ಷ ಬ್ರಿಜ್ ಭೂಷಣ್ ಸಿಂಗ್ ಅವರು ಕ್ಯಾಂಪಸ್ ನಲ್ಲಿ ಮತ್ತು ಸ್ಪರ್ಧೆಗಳ ವೇಳೆ ಪ್ರತಿಯೊಬ್ಬ ಹುಡುಗಿಯ ಜೊತೆ ಅನುಚಿತವಾಗಿ ವರ್ತಿಸಿದ್ದಾರೆ ಎಂದು ಆರೋಪಿಸಿದ್ದಾರೆ.
ಹೊಸದಿಲ್ಲಿಯಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಮಲಿಕ್ ಡಬ್ಲ್ಯುಎಫ್‌ಐ ಅಧ್ಯಕ್ಷರ ವಿರುದ್ಧ ಹೊಸ ಆರೋಪಗಳನ್ನು ಹೊರಿಸಿದರು. ಬ್ರಿಜ್ ಭೂಷಣ್ ಸಿಂಗ್ ಅವರು ಜೂನಿಯರ್ ಹುಡುಗಿಯರಂತೆ ಅದೇ ಹೋಟೆಲ್ ಮಹಡಿಯಲ್ಲಿ ಮಲಗುತ್ತಿದ್ದರು ಎಂದು ಹೇಳಿದರು.
ಡಬ್ಲ್ಯುಎಫ್‌ಐ ಅಧ್ಯಕ್ಷ ಸಿಂಗ್ ಜೂನಿಯರ್ ವರ್ಲ್ಡ್ ಚಾಂಪಿಯನ್‌ ಶಿಪ್‌ ನಲ್ಲಿ ಜೂನಿಯರ್ ಹುಡುಗಿಯರೊಂದಿಗೆ ಒಂದೇ ಮಹಡಿಯಲ್ಲಿ ಇದ್ದರು. ಅವರು ತನ್ನ ಕೋಣೆಯ ಬಾಗಿಲು ತೆರೆದೇ ಇಡುತ್ತಿದ್ದರು. ಹುಡುಗಿಯರಿಗೆ ಇದರಿಂದ ಮುಜುಗರ ಆಗುತ್ತಿತ್ತು” ಎಂದು 21 ವರ್ಷದ ಅಂಶು ಮಲಿಕ್ ಹೇಳಿದರು.
ಇದನ್ನೂ ಓದಿ:ಇನ್ಸ್ಟಾ ಮೆಸೇಜ್ ರಗಳೆ: ಬಿಜೈ ಅಪಾರ್ಟ್‌ಮೆಂಟ್‌ ನಲ್ಲಿ ಅಪ್ರಾಪ್ತ ವಯಸ್ಕ ಹುಡುಗರ ಜಗಳ
ಭಾರತದ ಅತ್ಯಂತ ಪ್ರಸಿದ್ಧ ಕುಸ್ತಿಪಟುಗಳಲ್ಲಿ ಒಬ್ಬರಾದ ವಿನೇಶ್ ಫೋಗಟ್ ಅವರು, ಅಧ್ಯಕ್ಷರ ವಿರುದ್ಧ ಪ್ರತಿಭಟನೆಯನ್ನು ಪ್ರಾರಂಭಿಸಿದಾಗಿನಿಂದ ಹೆಚ್ಚಿನ ಹುಡುಗಿಯರು ಬಂದಿದ್ದಾರೆ ಮತ್ತು ಪುರಾವೆಗಳನ್ನು ನೀಡಲು ಸಿದ್ಧರಾಗಿದ್ದಾರೆ ಎಂದು ಹೇಳಿದರು. ತಪ್ಪಿತಸ್ಥ ಬ್ರಿಜ್ ಭೂಷಣ್ ಸಿಂಗ್ ರಾಜೀನಾಮೆ ನೀಡಬೇಕು. ಇಲ್ಲದಿದ್ದರೆ ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ ಎಂದು ಫೋಗಟ್ ಹೇಳಿದರು.
