ಛತ್ತೀಸ್‌ಗಢ ಎನ್‌ಕೌಂಟರ್‌: 6 ನಕ್ಸಲೀಯರ ಹತ್ಯೆ ಅಸುನೀಗಿದವರಲ್ಲಿ ಇಬ್ಬರು ಮಹಿಳೆಯರು

ಬಿಜಾಪುರ (ಛತ್ತೀಸ್‌ಗಢ): ಛತ್ತೀಸ್‌ಗಢದ ಬಿಜಾಪುರ ಜಿಲ್ಲೆಯಲ್ಲಿ ಇಬ್ಬರು ಮಹಿಳಾ ನಕ್ಸಲರು ಸೇರಿದಂತೆ 6 ಮಂದಿಯನ್ನು ಕೊಲ್ಲಲಾಗಿದೆ. ಸಿಆರ್‌ಪಿಎಫ್ ಮತ್ತು ಜಿಲ್ಲಾ ಮೀಸಲು ಪಡೆ ಜತೆಗಿನ ಎನ್‌ಕೌಂಟರ್‌ನಲ್ಲಿ ಅವರು ಜೀವಕಳೆದುಕೊಂಡಿದ್ದಾರೆ. ಚಿಪುರಬತ್ತಿ ಎಂಬಲ್ಲಿ ನಕ್ಸಲರು ಅಡಗಿದ್ದಾರೆ ಎಂಬ ಸುಳಿವಿನ ಹಿನ್ನೆಲೆಯಲ್ಲಿ ಪಡೆಗಳು ಶೋಧ ನಡೆಸುತ್ತಿದ್ದವು.

ಭದ್ರತಾ ಪಡೆ ಮತ್ತು ನಕ್ಸಲರ ನಡುವೆ ಗುಂಡಿನ ಚಕಮಕಿ ನಡೆಯಿತು. ಈ ಸಂದರ್ಭದಲ್ಲಿ ಇಬ್ಬರು ಮಹಿಳೆಯರು ಸೇರಿ 6 ನಕ್ಸಲರು ಸಾವಿಗೀಡಾಗಿದ್ದಾರೆ. ಏ.19ರಂದು ನಡೆಯುವ ಮೊದಲ ಹಂತದ ಲೋಕಸಭಾ ಚುನಾವಣೆ ವೇಳೆಯಲ್ಲಿಯೇ ಬಿಜಾಪುರ ಜಿಲ್ಲೆಯಲ್ಲಿ ಮತದಾನ ನಡೆಯಲಿರುವಂತೆಯೇ ಈ ಪ್ರಕರಣ ನಡೆದಿದೆ.

ದಾಳಿಯ ನಂತರ ಭಾರೀ ಪ್ರಮಾಣದ ಶಸ್ತ್ರಾಸ್ತ್ರಗಳು, ಸ್ಫೋಟಕಗಳನ್ನು ಸ್ಥಳದಿಂದ ವಶಪಡಿಸಿಕೊಳ್ಳಲಾಗಿದೆ. ಮೃತಪಟ್ಟ ನಕ್ಸಲರ ಗುರುತಗಳು ಇನ್ನೂ ಸಿಕ್ಕಿಲ್ಲ. ಅವರ ಪತ್ತೆಗೆ ಯತ್ನ ಸಾಗಿದೆ. ಸ್ಥಳದಲ್ಲಿ ಇನ್ನೂ ಹಲವು ನಕ್ಸಲರು ಅಡಗಿದ್ದಾರೆಂಬ ಸುದ್ದಿಯಿದ್ದು, ಅವರ ಪತ್ತೆಗೆ ಶೋಧ ನಡೆದಿದೆ.

ಚತ್ತೀಸಗಢ, ಜಾರ್ಖಂಡ್‌ಗಳಲ್ಲಿ ಮುಂಚಿನಿಂದಲೂ ನಕ್ಸಲ್‌ ಚಟುವಟಿಕೆಗಳು ಜಾಸ್ತಿ. ಪ್ರತೀ ಬಾರಿ ಇಲ್ಲಿ ಒಂದೋ ಭದ್ರತಾ ಸಿಬ್ಬಂದಿ, ಇಲ್ಲ ನಕ್ಸಲರು ಸಾವಿಗೀಡಾಗುತ್ತಲೇ ಇರುತ್ತಾರೆ. ಪ್ರಸ್ತುತ ಪೀಪಲ್ಸ್‌ ಲಿಬರೇಶನ್‌ ಗೆರಿಲ್ಲಾ ಆರ್ಮಿಗೆ ಸೇರಿದ 10ನೇ ನಂಬರ್‌ ಪ್ಲಟೂನ್‌ನ ನಕ್ಸಲರು ಸಾವಿಗೀಡಾಗಿದ್ದಾರೆ.