ಸಚಿವ ರಾಧಾ ಮೋಹನ್‌ ಸಿಂಗ್‌ ಕಾರಿನ ಮೇಲೆ ಮೊಟ್ಟೆ ಎಸೆತ; ಐವರ ಬಂಧನ

ಭುವನೇಶ್ವರ : ಮಧ್ಯಪ್ರದೇಶದ ಮಂದ್‌ಸೋರ್‌ನಲ್ಲಿ ಐವರು ರೈತರು ಪೊಲೀಸರ ಗುಂಡಿಗೆ ಬಲಿಯಾಗಿರುವುದನ್ನು ಪ್ರತಿಭಟಿಸಲು ಇಲ್ಲಿನ ಸರಕಾರಿ ಗೆಸ್ಟ್‌ ಹೌಸ್‌ ಬಳಿ ನೆರೆದ ಯುವ ಕಾಂಗ್ರೆಸ್‌ ಕಾರ್ಯಕರ್ತರು ಕೇಂದ್ರ ಕೃಷಿ ಸಚಿವ ರಾಧಾ ಮೋಹನ ಸಿಂಗ್‌ ಅವರ ವಾಹನದ ಮೇಲೆ ಮೊಟ್ಟೆಗಳನ್ನು ಎಸೆದರಲ್ಲದೆ ಕರಿ ಬಾವುಟ ತೋರಿಸಿದರು. 

ಸಚಿವ ರಾಧಾ ಮೋಹನ ಸಿಂಗ್‌ ಅವರು ಜತನಿ ಎಂಬಲ್ಲಿ “ಸಬ್‌ ಕಾ ಸಾಥ್‌ ಸಬ್‌ ಕಾ ವಿಕಾಸ್‌’ ಕಾರ್ಯಕ್ರಮದಲ್ಲಿ ಭಾಗವಹಿಸಲು ತೆರಳುತ್ತಿದ್ದರು. 

ಕಾಂಗ್ರೆಸ್‌ ಕಾರ್ಯಕರ್ತರು ಎಸೆದ ಮೊಟ್ಟೆಗಳು ಸಚಿವರ ಮೇಲೆ ನೇರವಾಗಿ ಎರಗಲಿಲ್ಲವಾದರೂ ಕೆಲವು ಮೊಟ್ಟೆಗಳು ಅವರ ಕಾರಿನ ಮುಂಭಾಗದ ಮೇಲೆ ಬಿದ್ದವು ಎಂದು ಪ್ರತ್ಯಕ್ಷದರ್ಶಿಗಳು ಹೇಳಿದರು. 

ಈ ಘಟನೆ ಸಂಬಂಧ ಪೊಲೀಸರು ರಾಜ್ಯ ಯುವ ಕಾಂಗ್ರೆಸ್‌ ದಳದ ಅಧ್ಯಕ್ಷ ಲೋಕನಾಥ್‌ ಮಹಾರಥಿ ಸಹಿತ ಐವರನ್ನು ಬಂಧಿಸಿದರೆಂದು ಡಿಸಿಪಿ ಸತ್ಯವ್ರತ ಭೋಯಿ ತಿಳಿಸಿದ್ದಾರೆ.