ಮುಂಬಯಿ: ಕಿಂಗ್‌ ಖಾನ್ ಶಾರುಖ್ ಅವರಿಗಿಂದು 58ನೇ ಹುಟ್ಟುಹಬ್ಬದ ಸಂಭ್ರಮ. ಅಭಿಮಾನಿಗಳು ಹಾಗೂ ಅನೇಕ ಕಲಾವಿದರು ಕಿಂಗ್‌ ಖಾನ್ ಅವರಿಗೆ ಹುಟ್ಟುಹಬ್ಬದ ಶುಭಾಶಯವನ್ನು ಕೋರಿದ್ದಾರೆ. ಹುಟ್ಟುಹಬ್ಬದ ಪ್ರಯುಕ್ತ ಅವರ ಮುಂದಿನ ಸಿನಿಮಾ ʼಡಂಕಿʼ ಟೀಸರ್‌ ನ್ನು ರಿಲೀಸ್‌ ಮಾಡಲಾಗಿದೆ.
ʼಪಠಾಣ್‌ʼ, ʼಜವಾನ್‌ʼ ಬಳಿಕ ಶಾರುಖ್ ಖಾನ್ ʼಡಂಕಿʼ ಮೂಲಕ ಹ್ಯಾಟ್ರಿಕ್‌ ಹಿಟ್‌ ನೀಡುವ ನಿರೀಕ್ಷೆಯಲ್ಲಿದ್ದಾರೆ. ʼಮುನ್ನಾಭಾಯಿ ಎಂಬಿಬಿಎಸ್‌ʼ, ʼ3ಈಡಿಯೇಟ್ಸ್‌ʼ ನಂತಹ ಸೂಪರ್‌ ಹಿಟ್‌ ಸಿನಿಮಾಗಳನ್ನು ನೀಡಿರುವ ರಾಜಕುಮಾರ್‌ ಹಿರಾನಿ ಅವರೊಂದಿಗೆ ಶಾರುಖ್ ಸಿನಿಮಾ ಮಾಡುತ್ತಿರುವುದರಿಂದ ʼಡಂಕಿʼ ಬಗ್ಗೆ ನಿರೀಕ್ಷೆ ದುಪ್ಪಾಟ್ಟಾಗಿದೆ.
ಶಾರುಖ್ ಖಾನ್ ಅವರ ಹುಟ್ಟುಹಬ್ಬದ ಪ್ರಯುಕ್ತ ಸಿನಿಮಾದ ಟೀಸರ್‌ ರಿಲೀಸ್‌ ಮಾಡಲಾಗಿದೆ. ಟೀಸರ್‌ ಗೆ ʼಡ್ರಾಪ್‌ 1ʼ ಎಂದು ಹೆಸರಿಡಲಾಗಿದೆ. ನಾಲ್ವರು ಲಂಡನ್‌ ಹೋಗುವ ಕನಸನ್ನು ಹೊಂದಿರುತ್ತಾರೆ. ಆದರೆ ಲಂಡನ್‌ ಹೋಗಲು ಅವರ ಮನೆಗೆ ಅವರಿಗೆ ಇಷ್ಟವಿರುವುದಿಲ್ಲ.ಅಜ್ಞಾತ ಸ್ಥಳದಿಂದ ಲಂಡನ್‌ ಹೋಗಲು ಯತ್ನಿಸುವ ಅವರಿಗೆ ಸವಾಲೊಂದು ಎದುರಾಗುತ್ತದೆಂದು ಟೀಸರ್‌ ನಲ್ಲಿ ತೋರಿಸಲಾಗಿದೆ. ಸೋನು ನಿಗಮ್‌ ಅವರ ಧ್ವನಿಯಲ್ಲಿ ಬರುವ ಹಿನ್ನೆಲೆಯ ಹಾಡೊಂದು ಭಾವನಾತ್ಮಕವಾಗಿ ಸೆಳೆಯುತ್ತದೆ.
ಶಾರುಖ್ ಖಾನ್ ʼಹಾರ್ದಿʼ ಎನ್ನುವ ಪಾತ್ರದ ಮೂಲಕ ಕಾಣಿಸಿಕೊಳ್ಳಲಿದ್ದಾರೆ. ತಾಪ್ಸಿ ಪನ್ನು, ವಿಕ್ಕಿ ಕೌಶಲ್ ಸೇರಿದಂತೆ ಇತರೆ ಪ್ರಮುಖ ಪಾತ್ರದ ಹೆಸರನ್ನು ಟೀಸರ್‌ ನಲ್ಲಿ ರಿವೀಲ್‌ ಮಾಡಲಾಗಿದೆ. ಮೇಲ್ನೋಟಕ್ಕೆ ಇದೊಂದು ಹಾಸ್ಯ ಹಾಗೂ ಗಂಭೀರ ಎರಡು ವಿಷಯಗಳನ್ನು ಒಳಗೊಂಡಿರುವ ಸಿನಿಮಾ ಎನ್ನುವುದು ಗೊತ್ತಾಗುತ್ತದೆ. ʼಡ್ರಾಪ್‌ -2ʼ ಶೀಘ್ರದಲ್ಲಿ ಬರುವುದಾಗಿ ಚಿತ್ರತಂಡ ಹೇಳಿದೆ.
ಶಾರುಖ್, ತಾಪ್ಸಿ, ವಿಕ್ಕಿ ಕೌಶಲ್, ಬೊಮನ್ ಇರಾನಿ, ವಿಕ್ರಮ್ ಕೊಚ್ಚರ್ ಮತ್ತು ಅನಿಲ್ ಗ್ರೋವರ್ ಮುಂತಾದ ಕಲಾವಿದರು ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಅಂದಹಾಗೆ ಡಿಸೆಂಬರ್‌ 22 ರಂದುʼಡಂಕಿʼ ಸಿನಿಮಾ ರಿಲೀಸ್‌ ಆಗಲಿದೆ.
