ಬರಿದಾಗಿದೆ ಎಂದೂ ಬತ್ತದ ಅಂಬಾಗಿಲುಕೆರೆ

ಕೋಟ: ಸುಮಾರು ಎರಡು-ಮೂರು ದಶಕಗಳಿಂದೀಚೆಗೆ ಎಂದೂ ಬರಿದಾಗದ ಕೋಟದ ಅಂಬಾಗಿಲು ಕೆರೆ ಈ ಬಾರಿ ಸಂಪೂರ್ಣ ಬತ್ತಿ ಬರಿದಾಗಿದೆ.

ಕೋಟ ಕಣ್ಣಿನ ಆಸ್ಪತ್ರೆ ಹಿಂಬದಿಯಲ್ಲಿ ಒಂದು ಎಕ್ರೆಗೂ ಹೆಚ್ಚು
ವಿಸ್ತೀರ್ಣದಲ್ಲಿರುವ ಈ ಕೆರೆಯಲ್ಲಿ ಸದಾ ಕಾಲ ನೀರು ಶೇಖರಣೆಯಾಗಿರುತಿತ್ತು.

ಇದರಿಂದ ಇಲ್ಲಿನ ಅಕ್ಕ-ಪಕ್ಕದ ಬಾವಿಗಳಲ್ಲಿ ಉತ್ತಮ ನೀರು ಹಾಗೂ ಅಂತರ್ಜಲಮಟ್ಟ ಉತ್ತಮವಾಗಿರುತಿತ್ತು. ಈಗ ಕೆರೆ ಬತ್ತಿರುವುದರಿಂದ ಬಾವಿಯ ನೀರು ಕೂಡ ಇಳಿಮುಖವಾಗಿದ್ದು, ಮುಂದೆ ನೀರಿನ ಸಮಸ್ಯೆ ಎದುರಾಗಲಿದೆ.

ಕಾಯಕಲ್ಪಕ್ಕೆ ಮನವಿ
ಕೆರೆಯಲ್ಲಿ ಸುಮಾರು ಮೂರು ಫೀಟ್‌ಗಿಂತ ಹೆಚ್ಚು ಹೂಳು ತುಂಬಿದೆ. ಹೀಗಾಗಿ ನೀರು ಶೇಖರಣೆಗೆ ಸಮಸ್ಯೆಯಾಗುತ್ತಿದೆ. ಆದ್ದರಿಂದ ಸ್ಥಳೀಯಾಡಳಿತ ಈ ಕುರಿತು ಗಮನಹರಿಸಿ ಹೂಳನ್ನು ಮೇಲೆತ್ತಲು ಕ್ರಮಕೈಗೊಳ್ಳಬೇಕು ಎನ್ನುವುದು ಸ್ಥಳೀಯರ ಆಗ್ರಹವಾಗಿದೆ.

ಹೂಳೆತ್ತಿ ಅಭಿವೃದ್ಧಿಪಡಿಸಿ
ಈ ಕೆರೆಯ ನೀರು ಇಷ್ಟು ಪ್ರಮಾಣದಲ್ಲಿ ಬತ್ತಿದ ಉದಾಹರಣೆ ಇಲ್ಲ. ಕೆರೆಯಲ್ಲಿ ಹೂಳು ಸಂಗ್ರಹವಾಗಿರುವುದು ನೀರು ಬೇಗ ಬತ್ತಲು ಕಾರಣವಾಗಿದೆ. ಮುಂದೆ ಅಕ್ಕ-ಪಕ್ಕದ ಬಾವಿಗಳಲ್ಲಿ ನೀರು ಖಾಲಿಯಾಗಲಿದೆ. ಆದ್ದರಿಂದ ಸ್ಥಳೀಯಾಡಳಿತ ಕೆರೆಯ ಹೂಳೆತ್ತಲು ಕ್ರಮ ಕೈಗೊಳ್ಳಬೇಕು.
– ಕೃಷ್ಣಮೂರ್ತಿ ಮರಕಾಲ, ಸ್ಥಳೀಯರು