Israel-Hamas war ಟಾರ್ಗೆಟ್‌ ಆಗಲಿವೆಯೇ ಗಾಜಾ ಆಸ್ಪತ್ರೆಗಳು?

ಖಾನ್‌ ಯೂನಿಸ್‌:ಇಸ್ರೇಲ್‌ನ ಪಡೆಗಳು ಸೋಮವಾರ ಉತ್ತರ ಮತ್ತು ಮಧ್ಯ ಗಾಜಾದತ್ತ ಸಂಚಾರ ಆರಂಭಿಸಿದ್ದು, ಜನಜಂಗುಳಿಯಿಂದ ಕೂಡಿರುವ ಗಾಜಾದ ಆಸ್ಪತ್ರೆಗಳ ಸಮೀಪ ಯಾವ ಕ್ಷಣದಲ್ಲಾದರೂ ವೈಮಾನಿಕ ದಾಳಿಯಾಗುವ ಭೀತಿ ಆವರಿಸಿದೆ ಎಂದು ವಿಶ್ವಸಂಸ್ಥೆ ಸಿಬ್ಬಂದಿ ಹೇಳಿದ್ದಾರೆ.

ಆಸ್ಪತ್ರೆಗಳಲ್ಲಿ ಮಕ್ಕಳು ಸೇರಿದಂತೆ ಸಾವಿರಾರು ಪ್ಯಾಲೆಸ್ತೀನಿಯರು ಚಿಕಿತ್ಸೆ ಪಡೆಯುತ್ತಿದ್ದು, ಲಕ್ಷಕ್ಕೂ ಅಧಿಕ ಮಂದಿ ಆಶ್ರಯ ಪಡೆದಿದ್ದಾರೆ. ಸೋಮವಾರ ಗಾಜಾದ ಉತ್ತರ-ದಕ್ಷಿಣ ಹೆದ್ದಾರಿಯನ್ನು ಇಸ್ರೇಲ್‌ ಪಡೆ ಮುಚ್ಚಿದ್ದು, ದಾಳಿಯ ಆತಂಕ ಹೆಚ್ಚಾಗಿದೆ. ಅಲ್ಲದೆ, ಗಾಜಾದಲ್ಲಿ ಸದ್ಯ 10 ಆಸ್ಪತ್ರೆಗಳು ಮಾತ್ರವೇ ಕಾರ್ಯನಿರ್ವಹಿಸುತ್ತಿದ್ದು, ಈ ಎಲ್ಲ ಆಸ್ಪತ್ರೆಗಳಿಗೂ “ಕೂಡಲೇ ಸ್ಥಳಾಂತರಗೊಳ್ಳಿ’ ಎಂಬ ಎಚrರಿಕೆ ಸಂದೇಶ ರವಾನೆಯಾಗಿದೆ. ಇದೊಂದು ಕಳವಳಕಾರಿ ಸಂಗತಿ ಎಂದೂ ವಿಶ್ವಸಂಸ್ಥೆ ಸಿಬ್ಬಂದಿ ಹೇಳಿಕೊಂಡಿದ್ದಾರೆ. ಪ್ರಮುಖ ಆಸ್ಪತ್ರೆಗಳನ್ನೇ ಉಗ್ರರು ತಮ್ಮ ನಿಯಂತ್ರಣಾ ಕೇಂದ್ರಗಳಾಗಿ ಬಳಸುತ್ತಿದ್ದಾರೆ ಎಂದು ಇತ್ತೀಚೆಗೆ ಇಸ್ರೇಲ್‌ ವಿಡಿಯೋ ಸಾಕ್ಷ್ಯ ಬಿಡುಗಡೆ ಮಾಡಿತ್ತು.

ಇದೇ ವೇಳೆ, ಈಜಿಪ್ಟ್ ನಿಂದ ಔಷಧ ಸೇರಿದಂತೆ ಪರಿಹಾರ ಸಾಮಗ್ರಿಗಳನ್ನು ಹೊತ್ತ 33 ಟ್ರಕ್‌ಗಳು ಸೋಮವಾರ ಗಾಜಾ ಪ್ರವೇಶಿಸಿವೆ. ಮತ್ತೂಂದೆಡೆ, ಲೆಬನಾನ್‌ನ ಹೆಜ್ಬುಲ್ಲಾ ಉಗ್ರರ ನೆಲೆಗಳ ಮೇಲೆ ಇಸ್ರೇಲ್‌ ಬಾಂಬ್‌ ದಾಳಿ ನಡೆಸಿದೆ.

ಈ ನಡುವೆ, ಯುದ್ಧವು ಹೀಗೆಯೇ ಮುಂದುವರಿದರೆ ತೈಲ ದರವು ಗಗನಕ್ಕೇರುವ ಎಲ್ಲ ಸಾಧ್ಯತೆಯೂ ಇದೆ. ಇದು ಜಗತ್ತಿನಾದ್ಯಂತ ಆಹಾರವಸ್ತುಗಳ ದರ ಹೆಚ್ಚಳಕ್ಕೂ ಕಾರಣವಾಗಲಿದೆ ಎಂದು ವಿಶ್ವಬ್ಯಾಂಕ್‌ ಎಚ್ಚರಿಸಿದೆ.

ಯಹೂದಿಯರಿಗಾಗಿ ರಷ್ಯಾ ವಿಮಾನ ನಿಲ್ದಾಣಕ್ಕೆ ನುಗ್ಗಿದರು!
ಇಸ್ರೇಲ್‌ನಿಂದ ರಷ್ಯಾದ  ಡಾಗೆಸ್ತಾನ್‌ ವಿಮಾನ ನಿಲ್ದಾಣಕ್ಕೆ ಭಾನುವಾರ ವಿಮಾನವೊಂದು ಬಂದಿಳಿಯಿತು. ಈ ವೇಳೆ, ಪ್ಯಾಲೆಸ್ತೀನ್‌ ಬೆಂಬಲಿಸಿ ನೂರಾರು ಮುಸ್ಲಿಮರು ವಿಮಾನ ನಿಲ್ದಾಣದಲ್ಲಿ ಜಮಾಯಿಸಿದ್ದರು. ಮಖಚಲಾ ಮುಸ್ಲಿಂ ಬಾಹುಳ್ಯದ ಪ್ರದೇಶ. ಪ್ರತಿಭಟನಾಕಾರರು ಭದ್ರತೆಯನ್ನು ಭೇದಿಸಿ, ವಿಮಾನ ನಿಲ್ದಾಣದೊಳಗೆ ನುಗ್ಗಿದರು. ಇಸ್ರೇಲ್‌ ವಿರುದ್ಧ ಘೋಷಣೆಗಳನ್ನು ಕೂಗಿದರು. ಕೆಲವರು ಕೈನಲ್ಲಿ ಬಂದೂಕು ಮತ್ತು ದೊಣ್ಣೆಗಳನ್ನು ಹಿಡಿದು, ಭದ್ರತಾ ಸಿಬ್ಬಂದಿ ಅಳವಡಿಸಿದ್ದ ಬ್ಯಾರಿಕೇಡ್‌ಗಳನ್ನು ತಳ್ಳಿ, ಒಳ ಪ್ರವೇಶಿಸಿದರು. “ನಾವು ಯಹೂದಿಯರಿಗಾಗಿ ಬಂದಿದ್ದೇವೆ. ಅವರನ್ನು ಕೊಲ್ಲುತ್ತೇವೆ. ಅಲ್ಲಾಹು ಅಕºರ್‌’ ಎಂದು ಘೋಷಣೆಗಳನ್ನು ಕೂಗಿದರು.

ಯಹೂದಿಯರಿಗಾಗಿ ಹುಡುಕಾಟ ನಡೆಸಿದರು. ಈ ವೇಳೆ ಸ್ಥಳದಲ್ಲಿ ಬಿಗುವಿನ ವಾತಾವರಣ ನಿರ್ಮಾಣವಾಯಿತು. ಘರ್ಷಣೆಯಲ್ಲಿ 9 ಪೊಲೀಸರು ಸೇರಿದಂತೆ ಕನಿಷ್ಠ 20 ಮಂದಿ ಗಾಯಗೊಂಡರು. ಈ ಪೈಕಿ ಇಬ್ಬರ ಸ್ಥಿತಿ ಚಿಂತಾಜನಕವಾಗಿದೆ. 60 ಮಂದಿ ಪ್ರತಿಭಟನಾಕಾರರನ್ನು ಪೊಲೀಸರು ಬಂಧಿಸಿದ್ದಾರೆ. ಸದ್ಯ ಪರಿಸ್ಥಿತಿ ಹತೋಟಿಯಲ್ಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಜರ್ಮನ್‌ ಯುವತಿ ಶವ ಪತ್ತೆ !
ಇಸ್ರೇಲ್‌ ಮೇಲಿನ ದಾಳಿ ಸಂದರ್ಭದಲ್ಲಿ ಹಮಾಸ್‌ ಉಗ್ರರು ಅಪಹರಿಸಿ, ವಿಕೃತವಾಗಿ ಮೆರವಣಿಗೆ ನಡೆಸಿದ್ದ ಜರ್ಮನ್‌ ಮೂಲದ ಟ್ಯಾಟೂಯಿಸ್ಟ್‌ ಶಾನಿಲೌಕ್‌ ಅವರ ಮೃತದೇಹ ಪತ್ತೆಯಾಗಿದೆ. ಶಾನಿ ಅವರ ದೇಹದ ಗುರುತು ಪತ್ತೆಹಚ್ಚಿದ ಬಳಿಕ ಈ ಕುರಿತು ಇಸ್ರೇಲ್‌ ಸರ್ಕಾರ ಟ್ವೀಟ್‌ ಮಾಡಿದ್ದು,” ಶಾಂತಿಗಾಗಿ ನಡೆಯುತ್ತಿದ್ದ ಸಂಗೀತ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದ ಶಾನಿ ಅವರನ್ನು ಹಮಾಸ್‌ ಉಗ್ರರು ಅಪಹರಿಸಿ, ಚಿತ್ರಹಿಂಸೆ ನೀಡಿ, ಗಾಜಾದ ತುಂಬಾ ಮೆರವಣಿಗೆ ನಡೆಸಿದರು. ಶಾನಿ ಅನುಭವಿಸಿದ ಚಿತ್ರಹಿಂಸೆಗಳು ನಮ್ಮ ಹೃದಯಗಳನ್ನು ವಿದ್ರಾವಕಗೊಳಿಸಿವೆ. ಅವರ ಆತ್ಮಕ್ಕೆ ಶಾಂತಿ ಸಿಗಲಿ’ ಎಂದಿದೆ.