Divine Iheme: 10.3 ಸೆಕೆಂಡ್‌ನ‌ಲ್ಲಿ 100 ಮೀ. ಓಡಿದ 14 ವರ್ಷದ ಬಾಲಕ

ಲಂಡನ್‌: ಬ್ರಿಟನ್‌ನ 14 ವರ್ಷದ ಬಾಲಕನೊಬ್ಬ ಕೇವಲ 10.3 ಸೆಕೆಂಡ್‌ಗಳಲ್ಲಿ 100 ಮೀ. ಓಡುವ ಮೂಲಕ ವಿಶ್ವದಾಖಲೆ ನಿರ್ಮಿಸಿದ್ದಾನೆ. ಲಂಡನ್‌ ನ ಲೀ ವ್ಯಾಲಿಯಲ್ಲಿ ನಡೆದ ಕೂಟದಲ್ಲಿ ಡಿವೈನ್‌ ಐಹೆಮೆ (Divine Iheme) ಈ ದಾಖಲೆ ನಿರ್ಮಿಸಿದ್ದಾನೆ.

ಈ ವರ್ಷದ ನಡೆದ ಇತರ ಕ್ರೀಡಾ ಕೂಟಗಳಲ್ಲಿ 10.46, 10.48, 10.49 ಸೆಕೆಂಡ್‌ ಗಳಲ್ಲಿ ಓಟ ಪೂರೈಸಿ ಜಗತ್ತಿನ ಗಮನ ಸೆಳೆದಿದ್ದ ಐಹೆಮೆ ತನ್ನ ಸಾಧನೆಯನ್ನು ಉತ್ತಮ ಪಡಿಸಿಕೊಳ್ಳುವ ಮೂಲಕ ಅ-15 ವಿಶ್ವದಾಖಲೆಯನ್ನು ತನ್ನದಾಗಿಸಿಕೊಂಡಿದ್ದಾನೆ. ಈ ಮೂಲಕ ಜಮೈಕಾದ ಸಚಿನ್‌ ಡೆನೀಸ್‌ ದಾಖಲೆಯನ್ನು ಮುರಿದಿದ್ದಾನೆ.

ತಂದೆಯೇ ಮೊದಲ ಗುರು: ಡಿವೈನ್‌ ಐಹೆಮ್‌ ಅವರ ತಂದೆ ಇನ್ನೋಸೆಂಟ್‌ ಥೀಮ್‌ ನೈಜಿರೀಯಾ ತಂಡವನ್ನು ಪ್ರತಿನಿಧಿಸಿದ್ದರು. ಇವರೇ ಮೊದಲ ಗುರುವಾಗಿ ಮಾರ್ಗದರ್ಶನ ನೀಡಿದ್ದಾರೆ.

ಬೋಲ್ಟ್ ದಾಖಲೆ ಮುರಿಯಲು ಶಕ್ತ: 100 ಮೀ. ಓಟದಲ್ಲಿ ವಿಶ್ವದಾಖಲೆ ಹೊಂದಿರುವ ಉಸೇನ್‌ ಬೋಲ್ಟ್ ಅವರನ್ನು ನೋಡುತ್ತಾ ಬೆಳೆದ ಐಹೆಮ್‌, ಇದೀಗ ಬೋಲ್ಟ್ ದಾಖಲೆ ಮುರಿಯಲು ಶಕ್ತರಾಗಿದ್ದಾರೆ ಎನ್ನಲಾಗುತ್ತಿದೆ. 14ನೇ ವಯಸ್ಸಿಗೇ ಇಷ್ಟು ವೇಗ ಹೊಂದಿರುವ ಐಹೆಮ್‌ ಕೆಲವು ವರ್ಷಗಳ ಬಳಿಕ, ಮಾಂಸ ಖಂಡಗಳು ಮತ್ತಷ್ಟು ಬಲಿಷ್ಠವಾದರೆ, ಬೋಲ್ಟ್ ದಾಖಲೆಯನ್ನು ಮುರಿಯಲಿದ್ದಾರೆ ಎಂದು ಕ್ರೀಡಾತಜ್ಞರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.