ದಿಗಂತ್‌ಗೆ ಪೂಜಾ ಜೋಡಿ

ದಿಗಂತ್‌ ಹೊಸ ಸಿನಿಮಾ ಮಾಡುತ್ತಿದ್ದು, ಈ ಚಿತ್ರವನ್ನು   ಸೆನ್ನಾ ಹೆಗಡೆ ನಿರ್ದೇಶಿಸುತ್ತಾರೆ ಹಾಗೂ ಪುಷ್ಕರ್‌ ಹಾಗೂ ರಕ್ಷಿತ್‌ ಶೆಟ್ಟಿ ಸೇರಿ ನಿರ್ಮಿಸುತ್ತಾರೆಂಬ ಸುದ್ದಿಯನ್ನು ನೀವು ಈ ಹಿಂದೆ ಇದೇ ಬಾಲ್ಕನಿಯಲ್ಲಿ ಓದಿದ್ದೀರಿ. ಆದರೆ ಆಗ ಚಿತ್ರಕ್ಕೆ ನಾಯಕಿಯ ಆಯ್ಕೆಯಾಗಿರಲಿಲ್ಲ ಈಗ ಚಿತ್ರಕ್ಕೆ ನಾಯಕಿ ಸಿಕ್ಕಿದ್ದಾಳೆ.

ಆಕೆ ಪೂಜಾ ದೇವರಿಯಾ. ಯಾರೀ ಪೂಜಾ ಎಂದು ನೀವು ಕೇಳಿದರೆ ತಮಿಳು ಚಿತ್ರರಂಗದತ್ತ ಕೈ ತೋರಿಸಬೇಕಾಗುತ್ತದೆ. ತಮಿಳಿನಲ್ಲಿ “ಮಾಯಕ್ಕಂ ಎನ್ನ’, “ಇರೈವಿ’, “ಕುಟ್ರಮೆ ತಂದಾನೈ’ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿರುವ ಪೂಜಾ ಈಗ ದಿಗಂತ್‌ ಸಿನಿಮಾ ಮೂಲಕ ಕನ್ನಡಕ್ಕೆ ಬರುತ್ತಿದ್ದಾರೆ. ಚಿತ್ರದಲ್ಲಿ ಪೂಜಾಗೆ ಒಳ್ಳೆಯ ಪಾತ್ರವಿದೆಯಂತೆ.

ಪೂಜಾಗೆ ಆಫ್ಬೀಟ್‌ ತರಹದ ಸಿನಿಮಾಗಳಲ್ಲಿ ನಟಿಸುವ ಆಸೆ ಇತ್ತಂತೆ. ಈ ಚಿತ್ರದ ಪಾತ್ರ ಹಾಗೂ ಅದರ ಮಹತ್ವದಿಂದ ಖುಷಿಯಾದ ಪೂಜಾ ನಟಿಸಿಲು ಒಪ್ಪಿಕೊಂಡರಂತೆ. ಇನ್ನು, ನಟ ದಿಗಂತ್‌ ಅವರ ಮ್ಯಾನರೀಸಂಗೆ ತಕ್ಕಂತೆ ಈ ಸಿನಿಮಾ ಇದ್ದು, “ಪಂಚರಂಗಿ’ ನಂತರ ದಿಗಂತ್‌ ಅವರಿಲ್ಲಿ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರಂತೆ.

ಇದೊಂದು ರೊಮ್ಯಾಂಟಿಕ್‌-ಕಾಮಿಡಿ ಚಿತ್ರವಾಗಿದ್ದು, ದಿಗಂತ್‌ ಕೆರಿಯರ್‌ನಲ್ಲಿ ವಿಭಿನ್ನ ಚಿತ್ರವಾಗಲಿದೆ ಎಂಬ ವಿಶ್ವಾಸ ಚಿತ್ರತಂಡಕ್ಕಿದೆ. ಪುಷ್ಕರ್‌ ಫಿಲಂಸ್‌ ಹಾಗೂ ಪರಂವಾ ಸ್ಟುಡಿಯೋ ಸಾಲು ಸಾಲು ಚಿತ್ರಗಳನ್ನು ಮಾಡುತ್ತಿದ್ದು, ಹೊಸ ಹೊಸ ನಿರ್ದೇಶಕರ ಕಥೆಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಿದೆ. ಅದರಲ್ಲಿ ದಿಗಂತ್‌ ಸಿನಿಮಾ ಕೂಡಾ ಒಂದು. ಚಿತ್ರ ನವೆಂಬರ್‌ನಿಂದ ಆರಂಭವಾಗಲಿದೆ.