ಕೊಹ್ಲಿ ಪತ್ನಿ ಅನುಷ್ಕಾ ಚೆನ್ನೈ ಅಭಿಮಾನಿಯಾದರೇ?

ಹೊಸದಿಲ್ಲಿ: ಇತ್ತೀಚೆಗೆ ಸಾಮಾಜಿಕ ಜಾಲತಾಣಗಳು ಸುಳ್ಳು ಸುದ್ದಿ ಕೇಂದ್ರಗಳಾಗಿ ಬದಲಾಗುತ್ತಿವೆ. ಜನಪ್ರಿಯ ವ್ಯಕ್ತಿಗಳಂತೂ ಇಲ್ಲಿ ಬಗೆಬಗೆಯ ಕಾರಣಗಳಿಗಾಗಿ ಬಳಕೆಯಾಗುತ್ತಾರೆ. ಇಂಥದ್ದೇ ಅನುಭವ ಈಗ ವಿರಾಟ್‌ ಕೊಹ್ಲಿ ಪತ್ನಿ, ಅನುಷ್ಕಾ ಶರ್ಮ ಅವರಿಗಾಗಿದೆ.

ಇತ್ತೀಚೆಗೆ ಕೊಹ್ಲಿ ನಾಯಕತ್ವದ ಆರ್‌ಸಿಬಿ ತಂಡ ಸತತವಾಗಿ ಸೋಲುತ್ತಿರುವುದರಿಂದ ಅನುಷ್ಕಾ ಬೇಸತ್ತಿದ್ದಾರೆ. ಆದ್ದರಿಂದ ಅವರು ಚೆನ್ನೈ ಕಿಂಗ್ಸ್‌ ತಂಡದ ಟೀ ಶರ್ಟ್‌ ಧರಿಸಿ, ಪರೋಕ್ಷವಾಗಿ ಆರ್‌ಸಿಬಿಯನ್ನೇ ಅಣಕಿಸುತ್ತಿದ್ದಾರೆ ಎಂಬ ಸುದ್ದಿ ಜೋರಾಗಿ ಹಬ್ಬಿದೆ!

ಆದರೆ ಸಂಗತಿ ಬೇರೆಯೇ ಇದೆ. ಕಳೆದ ವರ್ಷ ಆರ್‌ಸಿಬಿ ಸೋತಾಗಲೇ ಅನುಷ್ಕಾ ಅವರ ಈ ಚಿತ್ರ ಭಾರೀ ಸದ್ದು ಮಾಡಿತ್ತು. ಆಗ ಅವರು ಹಳದಿ ಟೀ ಶರ್ಟ್‌ ಧರಿಸಿ ಅಭಿಮಾನಿಯೊಂದಿಗೆ ಕಾಣಿಸಿಕೊಂಡಿದ್ದರು. ಹಳದಿ ಚೆನ್ನೈ ಕಿಂಗ್ಸ್‌ ಸಮವಸ್ತ್ರದ ಬಣ್ಣ. ಆ ಚಿತ್ರಕ್ಕೆ ಯಾರೋ ಕಿತಾಪತಿ ಮಾಡಿ, ಚೆನ್ನೈ ತಂಡದ ಲೋಗೋವನ್ನು ಫೋಟೋಶಾಪ್‌ ಬಳಸಿ ಅಂಟಿಸಿದ್ದರು. ಅದರಿಂದ ಅಭಿಮಾನಿಗಳು ಬೇಸ್ತು ಬೀಳು ವುದು ಇವತ್ತಿಗೂ ನಿಂತಿಲ್ಲ!