ಹದಗೆಟ್ಟ ತಡೋಳಾ-ಮಟಕಿ ರಸ್ತೆ

ಆಳಂದ: ಹಿಂದಿನ ಶಾಸಕರ ಅವಧಿಯಲ್ಲಿ ತಾಲೂಕಿನ ಗಡಿಭಾಗದ ತಡೋಳಾ, ಮಟಕಿ ಮಾರ್ಗದ ಐದು ಕಿ.ಮೀ ರಸ್ತೆ ನಿರ್ಮಾಣವಾದರೂ ಬದಿಯಲ್ಲಿ ಬೆಳೆದ ಮುಳ್ಳು, ಕಂಟಿ ತೆರವುಗೊಳಿಸಲು ಸಂಬಂಧಿತ ಅಧಿಕಾರಿಗಳು ಮತ್ತು ಕಾಮಗಾರಿ ನಡೆಸಿದ ಗುತ್ತಿಗೆದಾರರು ನಿರ್ಲಕ್ಷ್ಯ ವಹಿಸುತ್ತಿದ್ದಾರೆ ಎಂದು ಹೋರಾಟಗಾರ ರಾಮಮೂರ್ತಿ ಗಾಯಕವಾಡ ಆರೋಪಿಸಿದ್ದಾರೆ.

ರಸ್ತೆ ಬದಿಯಲ್ಲಿ ಬೆಳೆದ ಮುಳ್ಳುಕಂಟಿಗಳಿಂದಾಗಿ ಎದುರಿಗೆ ವಾಹನ ಬಂದರೆ ಬದಿಗೆ ಮತ್ತೊಂದು ವಾಹನ ಸಂಚರಿಸದಂತೆ ಆಗಿದೆ. ಅಲ್ಲದೇ, ದ್ವಿಚಕ್ರವಾಹನ ಸಂಚಾರರು ಹಾಗೂ ಪಾದಯಾತ್ರಿಗಳು ಕೂಡಾ ಪರದಾಡುವಂತೆ ಆಗಿದೆ. ಈ ಕುರಿತು ಸಂಬಂಧಿತ ಇಲಾಖೆ ಅಧಿಕಾರಿಗಳ ಗಮನಕ್ಕೆ ತಂದರೂ ಯಾವುದೇ ಕ್ರಮ ಕೈಗೊಂಡಿಲ್ಲ.

ಕಾಮಗಾರಿ ನಡೆದ ಮೂರು ವರ್ಷದ ವರೆಗೆ ಗುತ್ತಿಗೆ ಹಿಡಿದವರೇ ರಸ್ತೆ ನಿರ್ವಹಣೆ ಕೈಗೊಳ್ಳಬೇಕು. ಆದರೆ ನಿರ್ವಹಣೆ ಹಣ ಎತ್ತಿಹಾಕಿ ರಸ್ತೆ ನಿರ್ವಹಣೆ ಕೈಗೊಳ್ಳದೆ ದಿನದೊಡುತ್ತಿರುವುದರಿಂದ ಸಾರ್ವಜನಿಕರು ತೊಂದರೆ ಎದುರಿಸುತ್ತಿದ್ದಾರೆ. ಕೂಡಲೇ ರಸ್ತೆ ಬದಿ ಗಿಡ, ಕಂಟಿಗಳನ್ನು ತೆರುವುಗೊಳಿಸಬೇಕು ಎಂದು ಒತ್ತಾಯಿಸಿದ ಗಾಯಕವಾಡ, ಹೀಗೆ ದಿನದೂಡಿದರೆ ಸಾರ್ವಜನಿಕರೊಂದಿಗೆ ಹೋರಾಟ ಕೈಗೊಳ್ಳಲಾಗುವುದು ಎಂದು ಹೇಳಿಕೆಯಲ್ಲಿ ಎಚ್ಚರಿಕೆ ನೀಡಿದ್ದಾರೆ.