ಉಕ್ರೇನ್‌ ಕಿಚ್ಚಿಗೆ ಅಮೆರಿಕ ತುಪ್ಪ

ಮಾಸ್ಕೋ/ಲಂಡನ್‌:  ಅಫ್ಘಾನಿಸ್ಥಾನದಲ್ಲಿ ತಾಲಿಬಾನ್‌ ಉಗ್ರರನ್ನು ಹೊಡೆದೋಡಿಸಲು ಇಪ್ಪತ್ತು ವರ್ಷಗಳ ಕಾಲ ತನ್ನ  ಹಾಗೂ ನ್ಯಾಟೋ ಸೇನೆಯನ್ನು ನಿಯೋಜಿಸಿ ಅಮೆರಿಕ ಈಗಾಗಲೇ ಮುಖಭಂಗ ಅನುಭವಿಸಿದೆ.

ಮತ್ತೆ ಅದೇ ತಪ್ಪನ್ನು ಉಕ್ರೈನ್‌ ವಿಚಾರದಲ್ಲಿ ಮಾಡಲು ಮುಂದಾಗಿದೆ. ಉಕ್ರೈನ್‌ ಬಿಕ್ಕಟ್ಟಿನ ವಿಚಾರದಲ್ಲಿ ಮಧ್ಯಪ್ರವೇಶ ಮಾಡುವುದು ಬೇಡವೆಂಬ ರಷ್ಯಾದ ಎಚ್ಚರಿಕೆಯ ನಡುವೆಯೇ 3 ಸಾವಿರ ಹೆಚ್ಚುವರಿ ಪಡೆಗಳನ್ನು ಐರೋಪ್ಯ ಒಕ್ಕೂಟದ ಪೂರ್ವ ಭಾಗದಲ್ಲಿ ನಿಯೋಜಿಸಿಲು ಅಮೆರಿಕ ಅಧ್ಯಕ್ಷ ಜೋ ಬೈಡೆನ್‌ ಸಮ್ಮತಿ ಸೂಚಿಸಿದ್ದಾರೆ. ಉಕ್ರೈನ್‌ಗೆ ತೆರಳುವ ಬದಲು ಅಮೆರಿಕದ ಯೋಧರು ಪೋಲಂಡ್‌ ಮತ್ತು ರೊಮೇನಿಯಾಗೆ ತೆರಳಲಿದ್ದಾರೆ ಎಂದು ಬೈಡೆನ್‌ ಸರಕಾರ ತಿಳಿಸಿದೆ.

ಎಚ್ಚರಿಕೆಯ ಹೊರತಾಗಿಯೂ ಐರೋಪ್ಯ ಒಕ್ಕೂಟದ ಪೂರ್ವ ಭಾಗದಲ್ಲಿ ಹೆಚ್ಚುವರಿ ಸೇನೆ ನಿಯೋಜಿಸಿದ ಕ್ರಮಕ್ಕೆ ರಷ್ಯಾ ಕಟುವಾಗಿ ಆಕ್ಷೇಪ ಮಾಡಿದೆ. ಈ ಕ್ರಮದಿಂದಾಗಿ ಅಮೆರಿಕದ ಜತೆಗೆ ಹೊಂದಿ ರುವ ಬಾಂಧವ್ಯದ ಮೇಲೆ ಪ್ರತಿಕೂಲ ಪರಿಣಾಮ ಬೀರಲಿದೆ ಎಂದು ರಷ್ಯಾದ ಉಪ ವಿದೇಶಾಂಗ ಸಚಿವ ಅಲೆಕ್ಸಾಂಡರ್‌ ಗ್ರಶ್ಕೋ ಹೇಳಿದ್ದಾರೆ. ರಷ್ಯಾ ಅಧ್ಯಕ್ಷ ವ್ಲಾದಿಮಿರ್‌ ಪುತಿನ್‌ ವಕ್ತಾರ ಡೆಮಿಟ್ರಿ ಪೆಸ್ಕೋವ್‌ ಮಾತನಾಡಿ ಅಮೆರಿಕ ತ್ವೇಷಮಯ ವಾತಾವರಣ ಹೆಚ್ಚಲು ನೆರವು ನೀಡಬಾರದು ಎಂದಿದ್ದಾರೆ.

ಅಣ್ವಸ್ತ್ರಯುಕ್ತ ಕ್ಷಿಪಣಿ: ಉಕ್ರೈನ್‌ ಮೇಲೆ  ದಾಳಿ ನಡೆಸಲು ರಷ್ಯಾ ಅಣ್ವಸ್ತ್ರ ಸಹಿತ ಕ್ಷಿಪಣಿಗಳನ್ನು ಬೆಲಾರೂಸ್‌ನಲ್ಲಿ ನಿಯೋ ಜನೆ ಮಾಡಿದೆ ಎಂದು ನ್ಯಾಟೋ ಆರೋ ಪಿಸಿದೆ. ಅದರ ಜತೆಗೆ 30 ಸಾವಿರ ಮಂದಿ ಹೆಚ್ಚುವರಿ ಸೇನಾ ಸಿಬಂದಿಯನ್ನು ಕ್ರೋಡೀಕರಿಸುತ್ತಿದೆ ಎಂದು ನ್ಯಾಟೋ ಪ್ರಧಾನ ಕಾರ್ಯದರ್ಶಿ ಜೆನ್ಸ್‌ ಸ್ಟಾಟೆನ್ಸ್‌ ಬರ್ಗ್‌ ಟೀಕಿಸಿದ್ದಾರೆ. ಇದರ ಜತೆಗೆ ಎಸ್‌- 400 ಕ್ಷಿಪಣಿ ನಿರೋಧಕ ವ್ಯವಸ್ಥೆಯನ್ನೂ ನಿಯೋಜನೆ ಮಾಡಿದೆ ಎಂದು ಹೇಳಿದ್ದಾರೆ.