Desi Swara: “ಶೈನಿಂಗ್‌ ಮಂಗಳೂರು’ ತಂಡ ಚಾಂಪಿಯನ್‌

ಕುವೈಟ್‌: ಫಾಹೀಲ್‌ ಕ್ರಿಕೆಟ್‌ ಕ್ಲಬ್ಸ್ ವತಿಯಿಂದ ನಡೆದ ಕುವೈಟ್‌ ಫಾಹೀಲ್‌ ಸಾಟರ್ಡೆ ಲೀಗ್‌ ಸೀಸನ್‌-4ರ ಲೀಗ್‌ ಮತ್ತು ನಾಕ್‌ಔಟ್‌ ಮಾದರಿಯ ಪಂದ್ಯಾವಳಿಯಲ್ಲಿ ಮಂಗಳೂರಿನ “ಶೈನಿಂಗ್‌ ಮಂಗಳೂರು’ ತಂಡ ಚಾಂಪಿಯನ್‌ ಆಗಿ ಹೊರಹೊಮ್ಮಿದೆ.

ಫಾಹೀಲ್‌ ಸ್ಟ್ರೈಕರ್ಸ್‌ ಮತ್ತು ಶೈನಿಂಗ್‌ ಮಂಗಳೂರು ನಡುವೆ ನಡೆದ ಸೆಮಿಫೈನಲ್‌ನಲ್ಲಿ ಶೈನಿಂಗ್‌ ಮಂಗಳೂರು ತಂಡ ಜಯಗಳಿಸಿ ಫೈನಲ್‌ ಪ್ರವೇಶಿಸಿತು. ಚೇಸಿಂಗ್‌ ಬೌನ್ಸರ್‌ ತಂಡದ ವಿರುದ್ಧ ನಡೆದ ಫೈನಲ್‌ ಪಂದ್ಯದಲ್ಲಿ ಶೈನಿಂಗ್‌ ಮಂಗಳೂರು ತಂಡ ಗೆದ್ದು ಪ್ರಶಸ್ತಿ ಮುಡಿಲಿಗೇರಿಸಿತು. ಯುವ ಉದ್ಯಮಿ ಮಹಮ್ಮದ್‌ ಶರೀಫ್ ನಾಯಕತ್ವ ವಹಿಸಿದ್ದರು.

ಫೈನಲ್‌ ಪಂದ್ಯದ ಪಂದ್ಯಶ್ರೇಷ್ಠ ಪ್ರಶಸ್ತಿ ರಾಣಾ ಗಳಿಸಿದರೆ, ಟೂರ್ನಮೆಂಟ್‌ನ ಉತ್ತಮ ಬ್ಯಾಟ್ಸ್‌ಮನ್‌ ಶೈನಿಂಗ್‌ ಮಂಗಳೂರು ತಂಡದ ರಿಫಾಝ್ ಮಲಿಕ್‌ ಮತ್ತು ಉತ್ತಮ ಎಸೆತಗಾರ ನಸಿಫ್‌ ಉಳ್ಳಾಲ ಅವರು ತಮ್ಮದಾಗಿಸಿಕೊಂಡರು.

ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಸ್ಪಾರ್ಕ್‌ ಜನರೇಟರ್‌ ಕುವೈಟ್‌ನ ಮಾಲಕ ನೂರ್‌ ಮಹಮ್ಮದ್‌, ಅರಫಾ ಸೂಪರ್‌ ಮಾರ್ಕೆಟ್‌ನ ಇಬ್ರಾಹಿಂ ಕಣ್ಣೂರ್‌ ಬಹುಮಾನ ವಿತರಿಸಿದರು. ತಂಡದ ಕೋಚ್‌ ನಾಸಿರ್‌ ಕುತ್ತಾರ್‌, ವ್ಯವಸ್ಥಾಪಕ ನವೀನ್‌ ಡಿ’ಸೋಜಾ, ಮಾರ್ಗದರ್ಶಕ ಬದ್ರುದ್ದೀನ್‌ ಮುನೀರ್‌ ಉಪಸ್ಥಿತರಿದ್ದರು. ಶೈನಿಂಗ್‌ ಮಂಗಳೂರು ತಂಡದ ಮ್ಯಾನೇಜರ್‌ ತಮೀಮ್‌ ಉಳ್ಳಾಲ ಸಹಕರಿಸಿದರು.