Desi Swara: ಮಿಚಿಗನ್‌: ಪಂಪ ಕನ್ನಡ ಕೂಟ-ಕನ್ನಡಿಗರ ಹೃದಯ ಗೆದ್ದ ದೀಪೋತ್ಸವ

ಮಿಚಿಗನ್‌:ನವೆಂಬರ್‌ ತಿಂಗಳ ಚಳಿಗಾಲದ ಮಧ್ಯೆ, ಮಿಚಿಗನ್‌ನಲ್ಲಿ ಪಂಪ ಕನ್ನಡ ಕೂಟದ ದೀಪೋತ್ಸವ ಹಬ್ಬ ಕನ್ನಡಿಗರಿಗೆ ಹೊಸ ಚೈತನ್ಯವನ್ನು ತುಂಬಿ ಸಂತೋಷದ ನೆನಪುಗಳನ್ನು ನೀಡಿತು. ದೀಪಾವಳಿ ಮತ್ತು ಕರ್ನಾಟಕ ರಾಜ್ಯೋತ್ಸವದ ಸಂಭ್ರಮವು ದೀಪೋತ್ಸವವಾಗಿ ಸುಮಾರು 400ಕ್ಕೂ ಹೆಚ್ಚು ಕನ್ನಡಿಗರನ್ನು ಒಂದೆಡೆ ಸೇರಿಸಿ, ಹಬ್ಬದ ಸಾಂಸ್ಕೃತಿಕ ಪರಂಪರೆ, ಕೌಟುಂಬಿಕ ಸೌಹಾರ್ದತೆ ಮತ್ತು ಸಮುದಾಯದ ಏಕತೆಯ ಸ್ಫೂರ್ತಿಯನ್ನು ಪ್ರತಿಬಿಂಬಿಸಿತು.

ಹಬ್ಬದ ಆರಂಭವನ್ನು ಗಣೇಶ ಸ್ತುತಿಯ ಮೂಲಕ ಸಾಂಪ್ರದಾಯಿಕವಾಗಿ ಪ್ರಾರಂಭಿಸಿ ಅನಂತರ ಹಾಡಿದ ನಾಡಗೀತೆಯು ಪ್ರೇಕ್ಷಕರಲ್ಲಿ ಹೆಮ್ಮೆಯ ಭಾವನೆ ಮೂಡಿಸಿತು. ಅದಾದಮೇಲೆ ಅಮೆರಿಕ ಮತ್ತು ಭಾರತದ ರಾಷ್ಟ್ರಗೀತೆಗಳನ್ನು ಗೌರವದೊಂದಿಗೆ ಹಾಡಲಾಯಿತು.

ಈ ದೀಪೋತ್ಸವವು ಪಂಪ ಸದಸ್ಯರು ಪ್ರಸ್ತುತ ಪಡಿಸಿದ ಸಾಂಸ್ಕೃತಿಕ ಕಾರ್ಯಕ್ರಮಗಳೊಂದಿಗೆ ಭವ್ಯವಾಗಿ ಆರಂಭವಾಯಿತು. ಸಾಂಸ್ಕೃತಿಕ ಕಾರ್ಯಕ್ರಮಗಳು ಕನ್ನಡ ಸಂಸ್ಕೃತಿಯ ಜೀವಂತ ಚಿತ್ರದಂತಿದ್ದವು. ಚಿಕ್ಕ ಮಕ್ಕಳಿಂದ ಹಿಡಿದು ಹಿರಿಯರ ತನಕ, ಸುಮಾರು 140ಕ್ಕೂ ಹೆಚ್ಚು ಪ್ರತಿಭಾವಂತ ಕಲಾವಿದರು ವೈವಿಧ್ಯಮಯ ನೃತ್ಯಗಳ, ಹೃದಯಸ್ಪರ್ಶಿ ಗೀತೆಗಳ, ಮತ್ತು ಆಕರ್ಷಕ ನಾಟಕಗಳ ಮೂಲಕ ಕರ್ನಾಟಕದ ಸಂಸ್ಕೃತಿಯ ಶ್ರೀಮಂತ ಪರಂಪರೆಯನ್ನು ಜೀವಂತವಾಗಿ ಮೂಡಿಸಿದರು.

ಈ ಕಾರ್ಯಕ್ರಮಗಳು ಪಂಪ ಸಮುದಾಯದ ಸಂಯೋಜಕರ ಮತ್ತು ಕಲಾವಿದರ ಪ್ರತಿಭೆಯನ್ನು ಮಾತ್ರವಲ್ಲದೆ, ಕನ್ನಡ ಸಂಸ್ಕೃತಿಯೊಂದಿಗೆ ಇರುವ ಅವರ ಆಳವಾದ ಸಂಬಂಧವನ್ನು ಕೂಡ ಎತ್ತಿ ತೋರಿಸಿವೆ. ಪಂಪ ಯಂಗ್‌ ಮೈಂಡ್ಸ್‌ಸೈನ್ಸ್‌ ಫೇರ್‌ ಈ ಬಾರಿಯ ವಿಶೇಷ ಆಕರ್ಷಣೆಯಾಗಿತ್ತು. ಪಂಪ ಕನ್ನಡ ಕೂಟದ ಅಧ್ಯಕ್ಷರಾದ ಪ್ರಮೋದ್‌ ಗೋಪಾಲ್‌ ಅವರು ಭಾಗವಹಿಸಿದ ಪ್ರತಿಯೊಬ್ಬರನ್ನು ಗೌರವಿಸಿ ಅಭಿನಂದಿಸಿದರು. ಅವರ ಯೋಜನೆಗಳ ಕುರಿತು ವಿವರಿಸಲು ಪ್ರೋತ್ಸಾಹಿಸಿ ಒಂದು ಸಂವಾದಾತ್ಮಕ ಸಂದರ್ಶನವನ್ನು ನಡೆಸಿಕೊಟ್ಟರು. ಭಾಗವಹಿಸಿದ ಮಕ್ಕಳ ಕಲ್ಪನೆಯ ಪ್ರಪಂಚ, ವೈಜ್ಞಾನಿಕ ಚಾತುರ್ಯ ಮತ್ತು ಪೋಷಕರ ಸಹಭಾಗಿತ್ವ ಎದ್ದು ತೋರಿತು. ಸಂಭ್ರಮದಲ್ಲಿ ಮುಳುಗಿದ ಪ್ರೇಕ್ಷಕರು ತಮ್ಮ ಮೆಚ್ಚುಗೆಗಳನ್ನು ವ್ಯಕ್ತಪಡಿಸುತ್ತ, ಈ ಪ್ರಯತ್ನವನ್ನು ಪ್ರೋತ್ಸಾಹಿಸಿದರು.

ಸಾಂಸ್ಕೃತಿಕ ಕಾರ್ಯಕ್ರಮದ ಅನಂತರ ಹಬ್ಬದ ಸೊಬಗು ರಾತ್ರಿ ಪಟಾಕಿಗಳೊಂದಿಗೆ ಇನ್ನಷ್ಟು ಬೆಳಗಿತು. ಕತ್ತಲಿನ ಆಕಾಶಕ್ಕೆ ಹೊಳಪು ತೋರಿಸಿದ ಪಟಾಕಿಗಳ ವೈವಿಧ್ಯಮಯ ರಂಗುರಂಗಿನ ಬೆಳಕು, ಮಕ್ಕಳು ಮಾತ್ರವಲ್ಲದೆ, ನೆರೆದ ಎಲ್ಲರಿಗೂ ಸಂತಸ ನೀಡಿತು. ದೀಪಾವಳಿಯ ಖುಷಿಯ ಈ ಮೌಲ್ಯಯುತ ಕ್ಷಣಗಳು ಕನ್ನಡಿಗರನ್ನು ಒಂದು ಸಮುದಾಯವಾಗಿ ಬೆಸೆದವು.

ಈ ಎಲ್ಲ ತೃಪ್ತಿಕರ ಅನುಭವಗಳ ಅನಂತರ, ಎಲ್ಲರು ಕನ್ನಡ ನಾಡಿನ ರುಚಿಕರವಾದ ಭೋಜನಕ್ಕೆ ಸಿದ್ಧರಾಗಿದ್ದರು. ಪಂಪ ಆಹಾರ ಸಮಿತಿಯ ನಿಖರವಾದ ಆಯ್ಕೆಗಳು, ಸಮಯಪಾಲನೆ ಮತ್ತು ಉತ್ಸಾಹಭರಿತ ಸ್ವಯಂಸೇವಕರ ಶ್ರಮ, ಹಸಿದ ಹೊಟ್ಟೆ ಮತ್ತು ಸಂತೋಷಗೊಂಡ ಮನಸ್ಸಿಗೆ ತೃಪ್ತಿಯನ್ನು ನೀಡಿತು.

ಈ ಹಬ್ಬದ ವಿಶೇಷ ಭಾಗವಾಗಿ, ಪಂಪ ಕನ್ನಡ ಕೂಟದ ಪಿಕ್ನಿಕ್‌ ವೇಳೆ ಆಯೋಜಿಸಿದ್ದ ಚಿತ್ರಕಲೆ ಸ್ಪರ್ಧೆ ಮತ್ತು ದೀಪೋತ್ಸವ ಪ್ರಯುಕ್ತ ಇದ್ದ ಗೂಡುದೀಪ ಸ್ಪರ್ಧೆಯ ವಿಜೇತರಿಗೆ ಬಹುಮಾನ ವಿತರಣೆ ಮಾಡಲಾಯಿತು. ಮಕ್ಕಳು ಮತ್ತು ಮುದ್ದಾದ ಕನ್ನಡಿಗರು ತಮ್ಮ ಕಲೆ ಮತ್ತು ಕ್ರಿಯಾತ್ಮಕತೆಯಿಂದ ಅನೇಕ ಜನರ ಮೆಚ್ಚುಗೆಗೆ ಪಾತ್ರರಾದರು.

ಛಾಯಾ ಸಂಗೀತೋತ್ಸವ
ದೀಪೋತ್ಸವದ ಮುಖ್ಯ ಆಕರ್ಷಣೆಯಾಗಿ, ಪ್ರಖ್ಯಾತ ಗಾಯಕಿ ಬಿ.ಆರ್‌. ಛಾಯಾ ಅವರು ತಮ್ಮ ಮಧುರ ಧ್ವನಿಯಿಂದ ಪ್ರೇಕ್ಷಕರ ಹೃದಯ ಗೆದ್ದರು. ಅವರ ಆಯ್ಕೆ ಮಾಡಿದ ಹಲವು ಹಾಡುಗಳು, ಬಾಲ್ಯದ ಮಧುರ ನೆನಪನ್ನು ತಾಜಾ ಮಾಡುತ್ತ, ಪಂಪ ಸಮುದಾಯಕ್ಕೆ ಸಂಗೀತದ ಹೊಸ ಆನಂದವನ್ನು ನೀಡಿದವು. ಅವರ ಗಾನ ಕಛೇರಿಯು ಕಾರ್ಯಕ್ರಮದ ಸಂಭ್ರಮಕ್ಕೆ ಉತ್ಕೃಷ್ಟತೆ ತಂದು ಕೊಟ್ಟಿತ್ತು.

ಅವರೊಂದಿಗೆ ಅವರ ಪತಿ ಪದ್ಮಪಾಣಿ ಅವರು ತಮ್ಮ ಹಾಸ್ಯಮಯ ಮತ್ತು ಸೃಜನಾತ್ಮಕ ಕಥೆಗಳಿಂದ ಪ್ರೇಕ್ಷಕರನ್ನು ಹಾಸ್ಯ ಲೋಕಕ್ಕೆ ಒಯ್ದರು. ಅದಲ್ಲದೆ ಅವರು ಕೆಲವು ಹಾಡುಗಳನ್ನು ಹಾಡುವ ಮೂಲಕ, ಆ ಕಛೇರಿಗೆ ಇನ್ನಷ್ಟು ವೈವಿಧ್ಯತೆಯನ್ನು ಸೇರಿಸಿದರು. ಇದೇ ವೇದಿಕೆಯಲ್ಲಿ, ಪಂಪ ಮಕ್ಕಳ ತಂಡ, ಪುರುಷ ಹಾಗೂ ಮಹಿಳಾ ಗಾಯಕರು ತಮ್ಮ ಮನೋಜ್ಞ ಹಾಡುಗಳ ಮೂಲಕ ಪ್ರೇಕ್ಷಕರನ್ನು ರಂಜಿಸಿದರು. ಅವರ ಹಾಡುಗಳು ಕನ್ನಡ ಸಂಸ್ಕೃತಿಯ ವೈಭವವನ್ನು ಪ್ರತಿಬಿಂಬಿಸುತ್ತ, ಈ ದೀಪೋತ್ಸವದ ಮಧುರ ಕ್ಷಣಗಳನ್ನು ಮತ್ತಷ್ಟು ನೆನಪಿನಲ್ಲಿ ಉಳಿಯುವಂತೆ ಮಾಡಿತು.

ಹಬ್ಬದ ಹೀರೋಗಳು  ಸ್ವಯಂಸೇವಕರು ಮತ್ತು ಸಮಿತಿಗಳು:
ಈ ದೀಪೋತ್ಸವದ ಯಶಸ್ಸು ಪಂಪ ಸಮುದಾಯದ ಬಹುಮುಖ ಪ್ರತಿಭೆ, ಶ್ರಮ ಮತ್ತು ನಿಷ್ಠೆಗೆ ನೇರ ಸಾಕ್ಷಿಯಾಗಿದೆ. ಪ್ರತಿಯೊಂದು ವಿಭಾಗದಲ್ಲಿ ಸಹಕರಿಸಿದ ತಂಡಗಳು ಈ ಹಬ್ಬವನ್ನು ಯಶಸ್ವಿಯಾಗಿ ಪ್ರಸ್ತುತ ಪಡಿಸಲು ಅತ್ಯುತ್ತಮ ಶ್ರಮ ವಹಿಸಿದರು.

ಸಾಂಸ್ಕೃತಿಕ ಸಮಿತಿ: ಕಿಶೋರ್‌, ನೇತ್ರಾ, ಶಿಲ್ಪಾ ಮತ್ತು ಅಶ್ವಿ‌ನಿ ಅವರು ಸಾಂಸ್ಕೃತಿಕ ಕಾರ್ಯಕ್ರಮಗಳ ಪ್ರತಿಯೊಂದು ಅಂಶವನ್ನು ಯೋಜಿಸಿ, ಅದನ್ನು ಯಶಸ್ವಿಯಾಗಿ ಅನ್ವಯಿಸಿದರು. ಅವರ ಜತೆಗೆ, ಕಾರ್ಯಕ್ರಮದ ಹಿಂದೆ ಕಾರ್ಯನಿರ್ವಹಿಸಿದ ಎಲ್ಲ ಸ್ವಯಂ ಸೇವಕರಿಗೂ ಧನ್ಯವಾದಗಳು.

ವಿಜ್ಞಾನ ಮೇಳ: ಶರಣಮ್ಮ ಮತ್ತು ಕಿರಣ್‌ ಸೈನ್ಸ್‌ ಫೇರ್‌ ಸಂಯೋಜನೆ ಮತ್ತು ನಿರ್ವಹಣೆಯಲ್ಲಿ ಪ್ರಮುಖ ಪಾತ್ರ ವಹಿಸಿದರು.

ಅಲಂಕಾರ ಮತ್ತು ಫೋಟೋ ಬೂತ್‌: ಸ್ನೇಹಾ ಮತ್ತು ಪೂರ್ಣಿಮಾ ಅವರ ಕಲಾತ್ಮಕತೆಯಿಂದ ಪಂಪ ಫೋಟೋ ಬೂತ್‌ ಎಲ್ಲರ ಗಮನ ಸೆಳೆಯಿತು. ಈ ಬೂತ್‌ ಹಬ್ಬದ ನೆನಪುಗಳನ್ನು ಸೆರೆಹಿಡಿಯುವ ನೆಲೆ ಆಗಿತ್ತು.

ಆಹಾರ ಮತ್ತು ಸೇವೆ: ವಾಣಿ, ಶ್ರೀದೇವಿ, ಪ್ರಕಾಶ್‌, ಸತೀಶ್‌ ಮತ್ತು ಅನಿಲ್‌ ಅವರು ಪರಂಪರಾತ್ಮಕ ಊಟದ ಆಯ್ಕೆ ಮತ್ತು ಅದರ ಸಮರ್ಪಣೆಯನ್ನು ಅದ್ಭುತವಾಗಿ ನಿರ್ವಹಿಸಿದರು. ಹೃದಯಪೂರ್ವಕವಾಗಿ ಸೇವೆ ಮಾಡಿದ ಸ್ವಯಂಸೇವಕರ ಶ್ರಮಕ್ಕೆ ಕೂಡ ಶ್ರೇಷ್ಠ ಧನ್ಯವಾದಗಳು.

ಫೋಟೋಗ್ರಫಿ ಮತ್ತು ಮೀಡಿಯಾ: ರಾಜೇಶ್‌ ಎಂ.ಬಿ. ಅವರು ಪ್ರತ್ಯೇಕವಾಗಿ ದೃಶ್ಯಗಳನ್ನು ಸೆರೆಹಿಡಿದು ನೆನಪುಗಳನ್ನು ಅವಿಭಾಜ್ಯಗೊಳಿಸಿದರು. ದೀಪಕ್‌ ಮತ್ತು ಮಿಲನ್‌ (ಅM ಮೀಡಿಯಾ) ಅವರ ವೃತ್ತಿಪರತೆಯು ವೀಡಿಯೋ ಮತ್ತು ಫೋಟೋಗಳಲ್ಲಿ ಪ್ರತ್ಯಕ್ಷವಾಗಿ ಕಾಣಿಸಿತು.

ಸೌಂಡ್‌ ಎಂಜಿನಿಯರಿಂಗ್‌: ಕಿಶೋರ್‌ಎನ್‌.ಸಿ. ಅವರ ಶ್ರದ್ಧೆ ಮತ್ತು ತಾಂತ್ರಿಕ ಪರಿಣಿತಿಯು ಈ ಕಾರ್ಯಕ್ರಮದ ಶ್ರವ್ಯ ಅನುಭವವನ್ನು ಹೆಚ್ಚಿಸಿತು.

ಒಟ್ಟು ಸಂಯೋಜನೆ: ಕಾರ್ಯದರ್ಶಿ ವೆಂಕಟೇಶ್‌ ಪೊಳಲಿ ಅವರು ವ್ಯವಸ್ಥೆಗಳನ್ನು ನಿಭಾಯಿಸಿದರಷ್ಟೇ ಅಲ್ಲ, ಉಪಾಧ್ಯಕ್ಷ ನವೀನ್‌ ಹಟಪಕಿ ಅವರು ಮಾರ್ಗದರ್ಶನ ಒದಗಿಸಿದರು. ಖಜಾಂಚಿ ಅಶುತೋಷ್‌ ಅವರು ನೋಂದಣಿ ಮತ್ತು ಟಿಕೆಟ್‌ ಮಾರಾಟವನ್ನು ನಿರ್ವಹಿಸಿದರು.

ಪಂಪದ ಬೋರ್ಡ್‌ ಆಫ್‌ ಡೈರಕ್ಟರ್ ಚೆನ್ನ ರೆಡ್ಡಿ, ಪ್ರಶಾಂತ್‌ ಕಟ್ಟಿ, ರಾಘವೇಂದ್ರ ಕುಲ್ಕರ್ಣಿ, ಸುನಿತಾ ನಾಗಾನಂದ ಮತ್ತು ಸ್ವಾತಿ ಬಾಬು ಅವರ ಪ್ರೋತ್ಸಾಹ ಮತ್ತು ಮಾರ್ಗದರ್ಶನಕ್ಕೆ ಕಾರ್ಯಕಾರಿ ಸಮಿತಿಯಿಂದ ಧನ್ಯವಾದಗಳು. ಈ ಕಾರ್ಯಕ್ರಮ ಮತ್ತು ಸಂಭ್ರಮಾಚರಣೆಗೆ ಬೆಂಬಲ ನೀಡಿದ ಪ್ರಾಯೋಜಕರಾದ Kurry’s Troy, Sur Saptak Sangeeth Vidyalaya, Abhinaya School of Dance, Brighter Minds, Punjab Groceries, ಮತ್ತು AM Media ಅವರಿಗೆ ಪಂಪ ಕಾರ್ಯಕಾರಿ ಸಮೀತಿ ಹಾಗೂ ಎಲ್ಲ ಕನ್ನಡಿಗರಿಂದ ಹೃತ್ಪೂರ್ವಕವಾದ ಧನ್ಯವಾದಗಳು.

ವರದಿ: ವೆಂಕಟೇಶ್‌ ಪೊಳಲಿ, ಕಾರ್ಯದರ್ಶಿ, ಪಂಪ ಕನ್ನಡ ಕೂಟ ಮಿಚಿಗನ್‌