ಕಾಶ್ಮೀರ ಶಾಲೆಗಳಲ್ಲಿ ಭಜನೆ, ಸೂರ್ಯ ನಮಸ್ಕಾರ ನಿಷೇಧಕ್ಕೆ ಒತ್ತಾಯ

ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರದ ಶಾಲೆಗಳಲ್ಲಿ ಸೂರ್ಯ ನಮಸ್ಕಾರ ಮತ್ತು ಭಜನೆಗಳನ್ನು ಹಾಡುವುದರ ಮೇಲೆ ನಿಷೇಧ ಹೇರಬೇಕು ಎಂದು ಮುತ್ತಾಹಿದಾ ಮಜಿಲಿಸ್‌-ಇ-ಉಲೇಮಾ ಎಂಬ ಸಂಘಟನೆ ಒತ್ತಾಯಿಸಿದೆ.

ಕೆಲವು ದಿನಗಳ ಹಿಂದೆ ಪಿಡಿಪಿ ಮುಖ್ಯಸ್ಥೆ ಮೆಹಬೂಬಾ ಮುಫ್ತಿ ಅವರು ಸರ್ಕಾರಿ ಶಾಲೆಗಳಲ್ಲಿ ಭಜನೆಗಳನ್ನು ಹಾಡುವಂತೆ ಮಾಡಲು ಬಿಜೆಪಿ ಹೆಚ್ಚು ಆದ್ಯತೆ ನೀಡುತ್ತಿದೆ ಎಂದು ಆರೋಪಿಸಿ ಟ್ವೀಟ್‌ ಮಾಡಿರುವಂತೆಯೇ ಈ ಒತ್ತಾಯ ಕೇಳಿ ಬಂದಿದೆ.

ಭಜನೆಗಳನ್ನು ಹಾಡುವುದರಿಂದ ಮತ್ತು ಸೂರ್ಯನಮಸ್ಕಾರ ಮಾಡುವುದರಿಂದ ಮುಸ್ಲಿಂ ಸಮುದಾಯದ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ಉಂಟು ಮಾಡುತ್ತದೆ ಎಂದು ಮುತ್ತಾಹಿದಾ ಮಜಿಲಿಸ್‌-ಇ-ಉಲೇಮಾ ಪ್ರತಿಪಾದಿಸಿದೆ.

ಮತ್ತೊಂದು ಕುತೂಹಲಕಾರಿ ಅಂಶವೆಂದರೆ ನ್ಯಾಷನಲ್‌ ಕಾನ್ಫರೆನ್ಸ್‌ನ ಲೋಕಸಭಾ ಸದಸ್ಯ ಡಾ.ಫಾರೂಕ್‌ ಅಬ್ದುಲ್ಲಾ ಅವರು ಮೆಹಬೂಬಾ ಮುಫ್ತಿ ಬೇಡಿಕೆಯನ್ನು ಟೀಕಿಸಿದ್ದಾರೆ. “ಒಬ್ಬ ಹಿಂದೂ ಅಜ್ಮೇರ್ ದರ್ಗಾಕ್ಕೆ ಹೋದರೆ ಆತ ಮುಸ್ಲಿಂ ಆಗಿ ಬದಲಾಗುತ್ತಾನೆಯೇ? ಎರಡು ದೇಶಗಳು ಎಂಬ ಸಿದ್ಧಾಂತದಲ್ಲಿ ನಂಬಿಕೆ ಇಟ್ಟವರು ನಾನಲ್ಲ. ನಾನೂ ಭಜನೆ ಮಾಡುತ್ತೇನೆ. ಅದರಲ್ಲಿ ತಪ್ಪೇನಿದೆ’ ಎಂದು ಪ್ರಶ್ನೆ ಮಾಡಿದ್ದಾರೆ. ಕಾಶ್ಮೀರದ ಜನರು ಮೆಹಬೂಬಾ ಅವರನ್ನು ತಿರಸ್ಕರಿಸಿದ್ದಾರೆ ಎಂದು ಅಬ್ದುಲ್ಲಾ ಹೇಳಿದ್ದಾರೆ.