ಪಚೌರಿ ವಿರುದ್ಧ ನ್ಯಾಯಾಲಯದಿಂದ ಲೈಂಗಿಕ ಕಿರುಕುಳ ದೋಷಾರೋಪ

ಹೊಸದಿಲ್ಲಿ : ಪರಿಸರವಾದಿ, ತೇರಿ ಮುಖ್ಯಸ್ಥ ಆರ್‌ ಕೆ ಪಚೌರಿ ವಿರುದ್ಧ ದಿಲ್ಲಿ ನ್ಯಾಯಾಲಯ ಇಂದು ಶನಿವಾರ ಲೈಂಗಿಕ ಕಿರುಕುಳದ ದೋಷಾರೋಪವನ್ನು ದಾಖಲಿಸಿದೆ.

ಪಚೌರಿ ವಿರುದ್ಧ ಆತನ ಸಹೋದ್ಯೋಗಿಯೇ ಲೈಂಗಿಕ ಕಿರುಕುಳದ ಆರೋಪ ಮಾಡಿದ್ದರು. ಮೆಟ್ರೋಪಾಲಿಟನ್‌ ಮ್ಯಾಜಿಸ್ಟ್ರೇಟ್‌ ಚಾರು ಗುಪ್ತಾ ಅವರು ಐಪಿಸಿ ಸೆ.354, ಮತ್ತು ಸೆ.509ರಡಿ ದಂಡಿಸಬಹುದಾದ ಅಪರಾಧಗಳ ಬಗ್ಗೆ ಪಚೌರಿಯನ್ನು  ವಿಚಾರಣೆಗೆ ಗುರಿಪಡಿಸಿದರು. 

ನ್ಯಾಯಾಲಯದಲ್ಲಿ ಹಾಜರಿದ್ದ ಪಚೌರಿ ಅವರು ತಾನು ನಿರಪರಾಧಿ ಎಂದೂ ವಿಚಾರಣೆಗೆ ಸಿದ್ಧ ಎಂದೂ ಹೇಳಿದ್ದನ್ನು ಅನುಸರಿಸಿ ನ್ಯಾಯಾಧೀಶರು ದೋಷಾರೋಪ ದಾಖಲಿಸಿಕೊಂಡರು. ಮುಂದಿನ ವಿಚಾರಣೆಯನ್ನು 2019ರ ಜನವರಿ 4ಕ್ಕೆ ನಿಗದಿಸಲಾಗಿದೆ.