ಕೆಲದಿನಗಳ ಹಿಂದಷ್ಟೇ ಬಾಲಿವುಡ್‌ ನಟಿ ದೀಪಿಕಾ ಪಡುಕೋಣೆ ಅಭಿನಯದ ಛಪಾಕ್‌ ಸಿನಿಮಾ ಅದ್ದೂರಿಯಾಗಿ ತೆರೆಗೆ ಬಂದಿತ್ತು. ಆದರೆ, ಛಪಾಕ್‌ ಸಿನಿಮಾ ಬಿಡುಗಡೆಗೂ ಮೊದಲು ಸದ್ದು ಮಾಡಿದಷ್ಟು, ಬಿಡುಗಡೆಯ ನಂತರ ಸದ್ದು ಮಾಡಲಿಲ್ಲ. ಅದರಲ್ಲೂ ಛಪಾಕ್‌ ಸಿನಿಮಾ ನಿರೀಕ್ಷಿತ ಗೆಲುವು ಕಾಣದಿರಲು ದೀಪಿಕಾ ಪಡುಕೋಣೆ ಅವರೇ ನೇರ ಕಾರಣ ಎನ್ನುವುದು ಅನೇಕ ಬಾಲಿವುಡ್‌ ಮಂದಿಯ ಅಭಿಪ್ರಾಯ. ತಮ್ಮ ಮದುವೆಯ ನಂತರ ತೆರೆಗೆ ಬಂದ ಛಪಾಕ್‌ ಸಿನಿಮಾದ ಮೇಲೆ ದೀಪಿಕಾಗೂ ಸಾಕಷ್ಟು ನಿರೀಕ್ಷೆಯಿತ್ತು. ಈಗ ಛಪಾಕ್‌ ಸಿನಿಮಾದ ಸೋಲಿನಿಂದ ದೀಪಿಕಾ ಕೂಡ ಕಂಗೆಟ್ಟಿದ್ದಾರೆ ಎನ್ನಲಾಗುತ್ತಿದೆ.
ಬಾಲಿವುಡ್‌ ಮೂಲಗಳ ಪ್ರಕಾರ, ಛಪಾಕ್‌ ಸಿನಿಮಾದ ನಂತರ ದೀಪಿಕಾ ಪಡುಕೋಣೆ ಅವರು ಬಂಗಾಲಿ ಮೂಲದ ನಟಿ, ಗಾಯಕಿ ಬಿನೋದಿನಿ ದಾಸಿ ಅವರ ಬಯೋಪಿಕ್‌ನಲ್ಲಿ ಅಭಿನಯಿಸಬೇಕಿತ್ತು. ಆದರೆ, ಛಪಾಕ್‌ ಸೋಲಿನ ನಂತರ ದೀಪಿಕಾ ಅವರು ಬಿನೋದಿನಿ ದಾಸಿ ಅವರ ಬಯೋಪಿಕ್‌ ಮಾಡಲು ಹಿಂದೇಟು ಹಾಕುತ್ತಿದ್ದಾರಂತೆ.
ಈ ಮೊದಲು ಬಿನೋದಿನಿ ದಾಸಿ ಅವರ ಕಥೆ ಮತ್ತು ಸ್ಕ್ರಿಪ್ಟ್ ಓದಿ ಸಿನಿಮಾ ಮಾಡಲು ಓಕೆ ಎಂದಿದ್ದ ದೀಪಿಕಾ ಈಗ ಆ ಬಯೋಪಿಕ್‌ನಲ್ಲಿ ಅಭಿನಯಿಸಲು ಆಸಕ್ತಿ ತೋರಿಸುತ್ತಿಲ್ಲ ಎಂಬ ಮಾತುಗಳು ಕೇಳಿ ಬರುತ್ತಿವೆ. ಇನ್ನು ದೀಪಿಕಾ ಅವರಿಂದ ಸಕಾರಾತ್ಮಕ ಪ್ರತಿಕ್ರಿಯೆಗಳು ಬಾರದಿದ್ದರಿಂದ ಬೇಸತ್ತ ಚಿತ್ರತಂಡ, ಬಿನೋದಿನಿ ದಾಸಿ ಬಯೋಪಿಕ್‌ನಲ್ಲಿ ಅಭಿನಯಿಸುವಂತೆ ಐಶ್ವರ್ಯಾ ರೈ ಅವರಿಗೆ ಆಫ‌ರ್‌ ನೀಡಿದೆಯಂತೆ. ಬಿನೋದಿನಿ ದಾಸಿ ಅವರ ಕಥೆ ಮತ್ತು ಸಿನಿಮಾದ ಸ್ಕ್ರಿಪ್ಟ್ ನೋಡಿರುವ ಐಶ್ವರ್ಯಾ ರೈ ಈ ಬಯೋಪಿಕ್‌ನಲ್ಲಿ ನಟಿಸಲು ಗ್ರೀನ್‌ ಸಿಗ್ನಲ್‌ ನೀಡಿದ್ದಾರಂತೆ. ಪ್ರದೀಪ್‌ ಸರ್ಕಾರ್‌ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಬಿನೋದಿನಿ ದಾಸಿ ಅವರ ಬಯೋಪಿಕ್‌ನ ಪೂರ್ವ ತಯಾರಿ ಕೆಲಸಗಳು ಭರದಿಂದ ನಡೆಯುತ್ತಿದ್ದು, ಚಿತ್ರ ಇದೇ ಫೆಬ್ರವರಿ ವೇಳೆಗೆ ಸೆಟ್ಟೇರುವ ಸಾಧ್ಯತೆ ಇದೆ.
ಒಟ್ಟಾರೆ ದೀಪಿಕಾ ಪಡುಕೋಣೆ ಮತ್ತೂಂದು ಬಯೋಪಿಕ್‌ ಕೈ ಬಿಟ್ಟಿರುವುದಕ್ಕೆ ಬಾಲಿವುಡ್‌ ಅಂಗಳದಲ್ಲಿ ಅನೇಕ ಅನಿಸಿಕೆ, ಅಭಿಪ್ರಾಯಗಳು ವ್ಯಕ್ತವಾಗುತ್ತಿವೆೆ. ಬಯೋಪಿಕ್‌ ಚಿತ್ರವನ್ನು ಮಾಡುವುದರಿಂದ, ಒಂದು ಸಮುದಾಯ ಅಥವಾ ಒಂದು ಜನಾಂಗದಿಂದ ವಿವಾದಕ್ಕೆ ಒಳಗಾಗಬಹುದು ಎಂಬ ಆತಂಕ ಮೂಡಿರಬಹುದು. ಅದಕ್ಕಾಗಿ ಬಯೋಪಿಕ್‌ ಚಿತ್ರಕ್ಕೆ ದೀಪಿಕಾ ಆಸಕ್ತಿ ತೋರಿಲ್ಲ ಎನ್ನಲಾಗುತ್ತಿದೆ. ಅದೇನೆ ಇರಲಿ, ಕೆಲವರ್ಷಗಳ ಹಿಂದೆ ಬಾಲಿವುಡ್‌ನ ಹಲವು ನಟಿಯರು ರಿಜೆಕ್ಟ್ ಮಾಡಿದ್ದ ಬಯೋಪಿಕ್‌ ಚಿತ್ರಗಳನ್ನ ಕೈಗೆತ್ತಿಕೊಂಡು ನಟಿಸಿ, ಯಶಸ್ಸು ಕಂಡಿದ್ದ ದೀಪಿಕಾ ಪಡುಕೋಣೆ ಈಗ ತಾನೇ ಮಾಡಬೇಕಾದ ಬಯೋಪಿಕ್‌ ಕೈಬಿಟ್ಟಿದ್ದು ವಿಪರ್ಯಾಸವೇ ಸರಿ.
