ಮಂಗಳೂರು/ಉಳ್ಳಾಲ: ತಲಪಾಡಿ ಟೋಲ್‌ಗೇಟ್‌ ಕ್ಯಾಂಟೀನ್‌ ಬಳಿ ಗುರುವಾರ ರಾತ್ರಿ ಎರಡು ಕಂಟೈನರ್‌ ಲಾರಿಗಳ ನಡುವೆ ಸಿಲುಕಿ ಲಾರಿ ಚಾಲಕ, ಹರ್ಯಾಣ ಮೂಲದ ಶಮೀಮ್‌ ಅಹಮ್ಮದ್‌ (38) ಮೃತಪಟ್ಟಿದ್ದಾರೆ.
ನಗರದಿಂದ ಕೇರಳದ ಕಡೆಗೆ ಹೋಗುತ್ತಿದ್ದ ಕಂಟೈನರ್‌ ಲಾರಿಗಳೆರಡು ಒಂದರ ಹಿಂದೆ ಒಂದು ಟೋಲ್‌ಗೇಟ್‌ ಕ್ಯಾಂಟೀನ್‌ ಬಳಿ ನಿಲ್ಲಿಸಿ ಇಬ್ಬರು ಚಾಲಕರು ಹಾಗೂ ಓರ್ವ ಕ್ಲೀನರ್‌ ಚಹಾ ಕುಡಿಯಲು ಹೋಗಿದ್ದಾರೆ.
ಚಹಾ ಕುಡಿದು ಬಂದು ಸಮೀಮ್‌ ಅಹಮ್ಮದ್‌ ಲಾರಿಯ ಗಾಜು ಕ್ಲೀನ್‌ ಮಾಡುತ್ತಿದ್ದು, ಈ ಸಂದರ್ಭ ಮುಂದೆ ನಿಲ್ಲಿಸಿದ್ದ ಲಾರಿಯ ಚಾಲಕ ವಾಸಿಮ್‌ ಅಕ್ರಮ್‌ ಏಕಾಏಕಿ ಲಾರಿಯನ್ನು ಹಿಂದಕ್ಕೆ ತಂದಿದ್ದು, ಹಿಂದೆ ನಿಂತಿದ್ದ ಕಂಟೈನರ್‌ ಲಾರಿಗೆ ಢಿಕ್ಕಿ ಹೊಡೆಸಿದ್ದಾನೆ. ಈ ಸಂದರ್ಭ ಲಾರಿ ಗ್ಲಾಸ್‌ ಕ್ಲೀನ್‌ ಮಾಡುತ್ತಿದ್ದ ಸಮೀಮ್‌ ಅಹಮ್ಮದ್‌ ಅವರು ಎರಡು ಲಾರಿಗಳ ನಡುವೆ ಸಿಲುಕಿ ಕಾಂಕ್ರೀಟ್‌ ರಸ್ತೆಗೆ ಬಿದ್ದಿದ್ದಾರೆ.
ಅವರ ಹೊಟ್ಟೆಗೆ ಗಂಭೀರ ಸ್ವರೂಪದ ಗಾಯವಾಗಿದ್ದು, ತತ್‌ಕ್ಷಣ ಅವರನ್ನು ಅಸ್ಪತ್ರೆಗೆ ಸಾಗಿಸಲಾಗಿದೆ. ಆದರೆ ಚಿಕಿತ್ಸೆ ಫ‌ಲಕಾರಿಯಾಗದೆ ಅವರು ಮೃತಪಟ್ಟಿದ್ದಾರೆ.
ಮೃತ ಶಮೀಮ್‌ ಹಾಗೂ ಅಪಘಾತಕ್ಕೀಡಾದ ಲಾರಿ ಚಾಲಕ ಸಹೋದರ ಸಂಬಂಧಿಗಳಾಗಿದ್ದಾರೆ. ಈ ಬಗ್ಗೆ ಸಂಚಾರಿ ದಕ್ಷಿಣ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
