ಸಿಡ್ನಿ: ಆಸ್ಟ್ರೇಲಿಯದ ಎಡಗೈ ಓಪನರ್ ಡೇವಿಡ್ ವಾರ್ನರ್ 9 ವರ್ಷಗಳ ಬಳಿಕ “ಬಿಗ್ ಬಾಶ್ ಲೀಗ್’ನಲ್ಲಿ ಆಡಲಿದ್ದಾರೆ.
“ಬಿಗ್ ಬಾಶ್ಗೆ ಮರಳಲು ಬಹಳ ಖುಷಿಯಾಗುತ್ತಿದೆ. ನಾನು ಕ್ರಿಕೆಟ್ ಆರಂಭಿಸಿದ ಕ್ಲಬ್ ಪರವಾಗಿ ಮತ್ತೆ ಆಡಲಿರುವುದು ಹೆಮ್ಮೆಯ ಸಂಗತಿ’ ಎನ್ನುವ ಮೂಲಕ ಡೇವಿಡ್ ವಾರ್ನರ್ ತಮ್ಮ ಪುನರಾಗಮನವನ್ನು ಸಾರಿದರು.
ಡೇವಿಡ್ ವಾರ್ನರ್ ಪ್ರತಿನಿಧಿಸಲಿರುವ ತಂಡ “ಸಿಡ್ನಿ ಥಂಡರ್’. ಇದಕ್ಕೂ ಮೊದಲು, ಆರಂಭದ ಹಾಗೂ ಮೂರನೇ ಬಿಬಿಎಲ್ನಲ್ಲಿ ಅವರು ಈ ತಂಡದ ಪರವಾಗಿ ಆಡಿದ್ದರು.
ಸಿಡ್ನಿ ಥಂಡರ್ ಈ ಬಾರಿ ನೂತನ ನಾಯಕನನ್ನು ಕಾಣಬೇಕಿದೆ. ಈ ತಂಡದ ಕ್ಯಾಪ್ಟನ್ ಆಗಿದ್ದ ಉಸ್ಮಾನ್ ಖ್ವಾಜಾ ಈ ಬಾರಿ ಬ್ರಿಸ್ಬೇನ್ ಹೀಟ್ ಪಾಲಾಗಿದ್ದಾರೆ.
12ನೇ ಆವೃತ್ತಿಯ ಬಿಬಿಎಲ್ ಡಿ. 13ರಿಂದ ಫೆ. 4ರ ತನಕ ನಡೆಯಲಿದೆ. ಆಟಗಾರರ ಯಾದಿ ಆ. 28ರಂದು ಬಿಡುಗಡೆಯಾಗಲಿದೆ. ರಶೀದ್ ಖಾನ್, ಕೈರನ್ ಪೊಲಾರ್ಡ್, ಡ್ವೇನ್ ಬ್ರಾವೊ ಮೊದಲಾದ ವಿದೇಶಿ ಸ್ಟಾರ್ ಆಟಗಾರರು ಈ ಯಾದಿಯಲ್ಲಿದ್ದಾರೆ ಎನ್ನಲಾಗಿದೆ.