World Chess Championship: ಗುಕೇಶ್‌-ಲಿರೆನ್‌ 5ನೇ ಪಂದ್ಯ ಡ್ರಾ

ಸಿಂಗಾಪುರ: ಇಲ್ಲಿ ಚೀನಾ ಗ್ರ್ಯಾಂಡ್‌ ಮಾಸ್ಟರ್‌ ಡಿಂಗ್‌ ಲಿರೆನ್‌ ಮತ್ತು ಭಾರತ ಗ್ರ್ಯಾಂಡ್‌ ಮಾಸ್ಟರ್‌ ಡಿ.ಗುಕೇಶ್‌ ಮಧ್ಯೆ ನಡೆಯುತ್ತಿರುವ ವಿಶ್ವ ಚೆಸ್‌ ಚಾಂಪಿಯನ್‌ಶಿಪ್‌ ಪಂದ್ಯಾವಳಿ ದಿನ ದಿನಕ್ಕೂ ಕುತೂಹಲಕಾರಿ ತಿರುವು ಪಡೆಯುತ್ತಿದೆ. ಕಾರಣ, ಇಬ್ಬರ ನಡುವಿನ 5ನೇ ಪಂದ್ಯ ಡ್ರಾದೊಂದಿಗೆ ಅಂತ್ಯಗೊಂಡಿದ್ದು, ಇಬ್ಬರೂ ತಲಾ 2.5 ಅಂಕದೊಂದಿಗೆ ಸಮಬಲ ಸಾಧಿಸಿದ್ದಾರೆ. 14 ಪಂದ್ಯಗಳ ಈ ಸರಣಿಯಲ್ಲಿ ಮೊದಲು 7.5 ಅಂಕ ಗಳಿಸುವ ಸ್ಪರ್ಧಿ ವಿಶ್ವ ಚಾಂಪಿಯನ್‌ ಆಗುತ್ತಾರೆ.

ಶನಿವಾರದ 5ನೇ ಸ್ಪರ್ಧೆಯಲ್ಲಿ ಕಪ್ಪು ಕಾಯಿಯೊಂದಿಗೆ ಆಡಿದ ಡಿಂಗ್‌ ಲಿರೆನ್‌ ಮತ್ತು ಬಿಳಿ ಕಾಯಿಯೊಂದಿಗೆ ಆಡಿದ ಡಿ.ಗುಕೇಶ್‌ ತಮ್ಮ 40ನೇ ನಡೆಯಲ್ಲಿ  ಪಂದ್ಯವನ್ನು ಡ್ರಾಗೊಳಿಸಿಕೊಂಡರು. ಡ್ರಾ ಪಂದ್ಯಕ್ಕೆ ಅರ್ಧ ಅಂಕ ಸಿಗುವ ಕಾರಣ, ತಲಾ 2 ಅಂಕ ಪಡೆದಿದ್ದ ಇಬ್ಬರೂ ಒಟ್ಟಾರೆ 2.5 ಅಂಕದೊಂದಿಗೆ ಸಮಬಲದೊಂದಿಗೆ ಪಂದ್ಯಾವಳಿಯಲ್ಲಿ ಮುಂದುವರಿಸಿದ್ದಾರೆ.

ಆರಂಭದಿಂದಲೂ ಜಿದ್ದಾಜಿದ್ದಿ ಸೆಣಸಾಟ:

ಟೂರ್ನಿ ಆರಂಭದಿಂದಲೂ ಜಿದ್ದಾಜಿದ್ದಿ ಹಂತದಲ್ಲೇ ಸಾಗುತ್ತಿರುವುದು ವಿಶೇಷ. ಆರಂಭಿಕ ಪಂದ್ಯದಲ್ಲಿ ಲಿರೆನ್‌ ಗೆದ್ದು 1-0ಯ ಮುನ್ನಡೆ ಸಾಧಿಸಿದ್ದರು. ಮುಂದಿನ ಪಂದ್ಯ ಡ್ರಾ ಎನಿಸಿತು. ಬಳಿಕ ಗುಕೇಶ್‌ ಗೆದ್ದು ಅಂಕವನ್ನು ತಲಾ 1.5ಕ್ಕೆ ತಂದರು. ಮುಂದಿನ ಎರಡೂ ಪಂದ್ಯ ಡ್ರಾಗೊಂಡಿದ್ದರಿಂದ ಸಮಬಲದ ಹೋರಾಟ ಮುಂದುವರಿಸಿದೆ. ಒಂದು ವೇಳೆ 14 ಪಂದ್ಯಗಳ ಬಳಿಕ ಅಂಕ ಟೈ ಎನಿಸಿದರೆ ಟೈ ಬ್ರೇಕರ್‌ ನಡೆಸಿ ವಿಜೇತರನ್ನು ನಿರ್ಧರಿಸಲಾಗುತ್ತದೆ.