ಕೋಗಿಲ ಬನದಲ್ಲಿ ಮೊಸಳೆ ವಾಕಿಂಗ್‌!

ದಾಂಡೇಲಿ: ಇಲ್ಲಿನ ಕಾಳಿ ನದಿಯಲ್ಲಿ ಸಾಕಷ್ಟು ಮೊಸಳೆಗಳಿದ್ದು, ಆಗೊಮ್ಮೆ ಈಗೊಮ್ಮೆ ಕಾಣಿಸಿಕೊಳ್ಳುವುದು ಸಾಮಾನ್ಯ. ಆದರೆ ಗುರುವಾರ ಇಲ್ಲಿರುವ ಮೊಸಳೆಯೊಂದಕ್ಕೆ ಅದೇಕೋ ದಡದ ಮೇಲೆ ಬರುವ ಮನಸ್ಸಾದಂತಿದೆ. ಅಲ್ಲದೆ ಆಹಾರವೂ ಸಿಗದೆ ಹಸಿವಿನಿಂದ ಕಂಗಾಲಾಗಿತ್ತೋ ಏನೋ? ನದಿಯಿಂದ ಹೊರಬಂದಿದ್ದು ಸೀದಾ ನದಿ ಸಮೀಪದಲ್ಲೇ ಇರುವ ಕೋಗಿಲಬನ ಗ್ರಾಮದೊಳಕ್ಕೆ ಬಂದು ಗ್ರಾಮದ ರಸ್ತೆಯಲ್ಲಿ ವಾಕಿಂಗ್‌ ಮಾಡಿದೆ.

ಬೆಳ್ಳಂಬೆಳಗ್ಗೆ ಮನೆ ಬಾಗಿಲು ತೆರೆದು ಹೊರಬಂದವರು ಮೊಸಳೆ ಕಂಡು ಒಮ್ಮೆಲೆ ಬೆಚ್ಚಿ ಬಿದ್ದಿದ್ದಾರೆ. ಜನರನ್ನು ನೋಡಿದರೂ ಮೊಸಳೆ ಭಯವಿಲ್ಲದೆ ಓಡಾಡಿದೆ.

ಅದೃಷ್ಟವಶಾತ್‌ ಯಾರ ಮೇಲೂ ದಾಳಿ ಮಾಡಿಲ್ಲ. ಕೊನೆಗೆ ಜನ ಅರಣ್ಯ ಇಲಾಖೆಗೆ ವಿಷಯ ತಿಳಿಸಿದ್ದಾರೆ. ಸಿಬ್ಬಂದಿ ಸ್ಥಳಕ್ಕೆ ಬಂದು ಮೊಸಳೆಯನ್ನು ಸ್ವ ಸ್ಥಾನಕ್ಕೆ ಕಳುಹಿಸಿದ್ದು, ಜನ ನಿಟ್ಟುಸಿರು ಬಿಟ್ಟಿದ್ದಾರೆ.