ಕಾರು ಖರೀದಿಸುವುದಾಗಿ ನಂಬಿಸಿ ವಂಚನೆ: ವಶಕ್ಕೆ

ಮೂಡುಬಿದಿರೆ: ರಿಟ್ಜ್ ಕಾರು ಮಾರಾಟಕ್ಕಿದೆ ಎಂದು ಸಾಮಾಜಿಕ ಜಾಲತಾಣ ಒಎಲ್‌ಎಕ್ಸ್‌ನಲ್ಲಿ ಹಾಕಿದ ಪ್ರಕಟನೆಯನ್ನು ಗಮನಿಸಿ ಮಾಲಕರನ್ನು ಸಂಪರ್ಕಿಸಿ ಕಾರು ಖರೀದಿಸುವುದಾಗಿ ನಂಬಿಸಿ ಹಣವನ್ನು ಮರುದಿನ ಪಾವತಿಸುವ ಮಾತು ಕೊಟ್ಟು ಕಾರು ಮತ್ತು ಕಾರಿನ ದಾಖಲೆಗಳನ್ನು ಪಡೆದು ಮಾಲಕರನ್ನು ವಂಚಿಸಿದ ಆರೋಪಿಯನ್ನು ಮೂಡುಬಿದಿರೆ ಪೊಲೀಸರು ಕಾರು ಸಹಿತ ವಶಪಡಿಸಿಕೊಂಡಿದ್ದಾರೆ.

ಅವಿನಾಶ್‌ ಶುಭನ್‌ ಕಲ್ಹೋ ಅವರು ಅವರ ರಿಟ್ಜ್ ಕಾರನ್ನು ಮಾರಾಟ ಮಾಡಲೆಂದು ಒಎಲ್‌ಎಕ್ಸ್‌ನಲ್ಲಿ ಹಾಕಿದ ಪ್ರಕಟನೆ ನೋಡಿದ್ದ ಆರೋಪಿ ಮಂಗಳೂರು ಬಂದರು ನಿವಾಸಿ ಟಿ.ಪಿ. ಮುನೀರ್‌ ಕಾರಿನ ಮಾಲಕರನ್ನು ಭೇಟಿ ಮಾಡಿ ಕಾರನ್ನು 2.80 ಲಕ್ಷ ರೂ.ಗೆ ಖರೀದಿಸುವುಗಾಗಿ ಹೇಳಿದ್ದ. ಮರುದಿನ ಹಣವನ್ನು ಬ್ಯಾಂಕ್‌ ಖಾತೆಯ ಮುಖಾಂತರ ವರ್ಗಾಯಿಸುವುದಾಗಿ ಹೇಳಿ ಕಾರು ಮತ್ತು ಕಾರಿಗೆ ಸಂಬಂಧಿಸಿದ ಮೂಲ ದಾಖಲಾತಿಗಳನ್ನು ಪಡೆದುಕೊಂಡು ಹೋಗಿದ್ದ. ಅನಂತರ ಆರೋಪಿ ಸಂಪರ್ಕಕ್ಕೆ ಸಿಗದೆ ನಾಪತ್ತೆಯಾಗಿದ್ದ.

ಬೇರೊಂದು ಪ್ರಕರಣಕ್ಕೆ ಸಂಬಂಧಿಸಿ ಉಪ್ಪಿನಂಗಡಿ ಪೊಲೀಸರು ಟಿ.ಪಿ. ಮುನೀರ್‌ನನ್ನು ಬಂಧಿಸಿದ್ದರು. ಈ ಪ್ರಕರಣದಲ್ಲಿ ಆರೋಪಿಗೆ ನ್ಯಾಯಾಂಗ ಬಂಧನ ನೀಡಲಾಗಿತ್ತು. ಕಾರಿನ ಪ್ರಕರಣಕ್ಕೆ ಸಂಬಂಧಿಸಿ ವಿಚಾರಣೆ ನಡೆಸಲು ಪೊಲೀಸರು ನ್ಯಾಯಾಲಯದ ಆದೇಶ ಪಡೆದು ಮುನೀರ್‌ನನ್ನು ಪೊಲೀಸ್‌ ಕಸ್ಟಡಿಗೆ ಪಡೆದುಕೊಂಡಿದ್ದು, ಈ ಸಂದರ್ಭ ಆರೋಪಿಯಿಂದ ಮಾರುತಿ ರಿಟ್ಜ್ ಕಾರನ್ನು ಆರೋಪಿ ಮಾರಾಟ ಮಾಡಿದ್ದ ಕುಂದಾಪುರದ ನಿವಾಸಿ ನಿಹಾಲ್‌ ಅವರಿಂದ ವಶಕ್ಕೆ ಪಡೆದುಕೊಳ್ಳಲಾಗಿದೆ.

ಆರೋಪಿಯ ವಿರುದ್ಧ ಮಂಗಳೂರಿನ ಹಲವು ಠಾಣೆಗಳಲ್ಲಿ ಗಾಂಜಾ ಮಾರಾಟ, ಮನೆಯಲ್ಲಿ ಕಳ್ಳತನ, ದರೋಡೆ, ಕೊಲೆ ಯತ್ನ ಪ್ರಕರಣಗಳು ದಾಖಲಾಗಿವೆ ಎಂದು ಪೊಲೀಸರು ಹೇಳಿದ್ದಾರೆ.