ಟ್ರಾಫಿಕ್‌ ಪೇದೆಗೂ ಕೋವಿಡ್ ಪಾಸಿಟಿವ್‌

ರಾಯಚೂರು: ಆರೋಗ್ಯ ಇಲಾಖೆ ಸಿಬ್ಬಂದಿಗೆ ಸೋಂಕು ತಗುಲಿದ ಬೆನ್ನಲ್ಲೇ ನಗರದ ಟ್ರಾಫಿಕ್‌ ಠಾಣೆ ಮುಖ್ಯ ಪೇದೆಗೆ ಕೋವಿಡ್ ಪಾಸಿಟಿವ್‌ ತಗುಲಿದ್ದು, ಶನಿವಾರ ಠಾಣೆಯನ್ನು ಸೀಲ್‌ಡೌನ್‌ ಮಾಡಲಾಗಿದೆ.

ಕೃಷಿ ವಿವಿಯಲ್ಲಿನ ಕ್ವಾರಂಟೈನ್‌ ಕೇಂದ್ರದ ಕರ್ತವ್ಯಕ್ಕೆ ನಿಯೋಜನೆ ಗೊಂಡಿದ್ದು, ಅಲ್ಲಿ ಸೋಂಕು ತಗುಲಿರಬಹುದೇ ಎಂದು ಅಂದಾಜಿಸಲಾಗಿದೆ. ಕಳೆದ ಕೆಲ ದಿನಗಳಿಂದ ಅನಾರೋಗ್ಯ ನಿಮಿತ್ತ ರಜೆ ತೆರಳಿದ್ದ ಮುಖ್ಯ ಪೇದೆ ಕೋವಿಡ್ ಪರೀಕ್ಷೆಗೆ ಒಳಪಟ್ಟಾಗ ಪಾಸಿಟಿವ್‌ ಇರುವುದು ದೃಢಪಟ್ಟಿದೆ ಎನ್ನಲಾಗುತ್ತಿದೆ. ಸೋಂಕಿತರನ್ನು ಈಗಾಗಲೇ ಕೋವಿಡ್‌ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಠಾಣೆಯನ್ನು ಶನಿವಾರ ಸಂಪೂರ್ಣ ಸ್ಯಾನಿಟೈಸ್‌ ಮಾಡುವ ಮೂಲಕ 48 ಗಂಟೆ ಮುಚ್ಚಲಾಗಿದೆ.

ಇನ್ನು ಇವರ ಜತೆ ಕೆಲಸ ಮಾಡಿದ ಎಂಟು ಜನ ಸಿಬ್ಬಂದಿಗೂ ಸೋಂಕು ಹರಡಿರುವ ಶಂಕೆ ಇದ್ದು, ಅವರ ಗಂಟಲಿನ ದ್ರವ ಮಾದರಿ ಸಂಗ್ರಹಿಸಿ ಪರೀಕ್ಷೆಗೆ ಕಳುಹಿಸುವ ಸಾಧ್ಯತೆಗಳಿವೆ. ಅಲ್ಲದೇ, ಅವರನ್ನು ಸದ್ಯಕ್ಕೆ ಹೋಮ್‌ ಕ್ವಾರಂಟೈನ್‌ ಮಾಡಲಾಗಿದೆ ಎಂದು ತಿಳಿದು ಬಂದಿದೆ.

ಪೊಲೀಸರ ಜನಸಂಪರ್ಕ: ಕೋವಿಡ್ ಸೋಂಕು ತಗುಲಿದ ಮುಖ್ಯಪೇದೆ ಕಳೆದ ಮೂರು ದಿನದಿಂದ ರಜೆ ಮೇಲಿದ್ದರು ಎನ್ನಲಾಗುತ್ತಿದೆ. ಆದರೆ, ಅದಕ್ಕೂ ಮುನ್ನ ಅವರಿಗೆ ಸೋಂಕು ತಗುಲಿದ್ದು, ಅದು ಉಳಿದ ಸಿಬ್ಬಂದಿಗೂ ಹರಡಿದ್ದರೆ ಸಮುದಾಯಕ್ಕೂ ವಿಸ್ತರಿಸಿದ ಭೀತಿ ಎದುರಾಗಿದೆ. ಕಳೆದೆರಡು ದಿನಗಳಿಂದ ಟ್ರಾಫಿಕ್‌ ಪೊಲೀಸರು ಸಾಕಷ್ಟು ವಾಹನಗಳನ್ನು ತಡೆದು ಮಾಸ್ಕ್ ಇಲ್ಲದಕ್ಕೆ ದಂಡ ವಿಧಿಸಿದ್ದಾರೆ. ಇದರಿಂದ ಜನರಲ್ಲೂ ಆತಂಕ ಶುರುವಾಗಿದೆ.