ವಿಜಯಪುರ: ಗುರುವಾರ ಬಿಡುಗಡೆಯಾದ ಹೆಲ್ತ್ ಬುಲಿಟಿನ್ ನಲ್ಲಿ ಜಿಲ್ಲೆಯ ಮೊದಲ ಸೋಂಕಿತೆಯ ಸಂಪರ್ಕದಿಂದ ಮತ್ತೆ ಇಬ್ಬರಿಗೆ ಸೋಂಕು ತಾಗಿರುವುದು ದೃಢಪಟ್ಟಿದೆ. ಇದರೊಂದಿಗೆ ಜಿಲ್ಲೆಯ ಸೋಂಕಿತರ ಸಂಖ್ಯೆ 43 ಕ್ಕೆ ಏರಿಕೆಯಾಗಿದೆ.
ಗುರುವಾರ ಪತ್ತೆಯಾದ ಸೋಂಕಿತರಲ್ಲಿ 62 ವರ್ಷದ ವ್ಯಕ್ತಿಯನ್ನು ಪಿ-537 ಹಾಗೂ 33 ವರ್ಷದ ಸೋಂಕಿತ ಪಿ-538 ವರ್ಷದ ಮಹಿಳೆ ಎಂದು ಗುರುತಿಸಲಾಗಿದೆ.
ಈ ಇಬ್ಬರು ಸೋಂಕಿತರು ಜಿಲ್ಲೆಯ ಮೊದಲ ಸೋಂಕಿತ ವೃದ್ಧೆ ಪಿ- 221 ಇವರ ಸಂಬಂಧಿಗಳಾಗಿದ್ದು, ನಗರದ ಸೀಲ್ ಡೌನ್ ಪ್ರದೇಶದ ಕ್ಲಸ್ಟರ್ ಝೋನ್ ನಲ್ಲಿರುವ ಪ್ರದೇಶದ ನಿವಾಸಿಗಳೇ ಆಗಿದ್ದಾರೆ.
ಈ ಇಬ್ಬರೊಂದಿಗೆ ಜಿಲ್ಲೆಯ ಮೊದಲ ಸೋಂಕಿತ ಪಿ-221 ವೃದ್ಧೆಯಿಂದಲೇ 26 ಜನರಿಗೆ ಸೋಂಕು ಹರಡಿದೆ.
ಜಿಲ್ಲೆಯ ಮೊದಲ ಸೋಂಕಿತ ವೃದ್ಧೆ ಸೇರಿದಂತೆ 43 ಸೋಂಕಿತರಲ್ಲಿ ಸಂಪೂರ್ಣ ಗುಣಮುಖರಾಗಿ 6 ಜನರು ಆಸ್ಪತ್ರೆಯಿಂದ ಬಿಡುಗಡೆಯಾಗಿ ಮನೆಗೆ ತೆರಳಿದ್ದಾರೆ.
ಸೋಂಕಿತ ಇಬ್ಬರು ಈಗಾಗಲೇ ಮೃತಪಟ್ಟಿದ್ದು, ಹೊಸ ಸೋಂಕಿತರು ಸೇರಿದಂತೆ ಸಕ್ರಿಯ 35 ರೋಗಿಗಳು ಕೋವಿಡ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ
