ಕಲಬುರಗಿಯಲ್ಲಿ ಕೋವಿಡ್-19 ಮತ್ತೊಬ್ಬ ಬಲಿ: 6 ಜನರಿಗೆ ಸೋಂಕು ಪತ್ತೆ

ಕಲಬುರಗಿ: ಜಿಲ್ಲೆಯಲ್ಲಿ ಕೋವಿಡ್-19 ಸೋಂಕಿನಿಂದ ಸೋಮವಾರ ವ್ಯಕ್ತಿ ಮೃತಪಟ್ಟಿದ್ದಲ್ಲದೇ ಆರು ಹೊಸ ಪ್ರಕರಣಗಳು ದೃಢಪಟ್ಟಿವೆ. ಇದರೊಂದಿಗೆ ಒಟ್ಟು ಸೋಂಕಿತರ ಸಂಖ್ಯೆ 44ಕ್ಕೆ ಏರಿಕೆಯಾಗಿದೆ.

ಆಳಂದ ಪಟ್ಟಣದ ನಿವಾಸಿ 57 ವರ್ಷದ ವ್ಯಕ್ತಿ (ಪಿ-422) ಚಿಕಿತ್ಸೆ ಫಲಕಾರಿಯಾಗದೇ ಸಾವನ್ನಪ್ಪಿದ್ದಾರೆ. ಲಿವರ್ ಮತ್ತು ಉಸಿರಾಟದ ಸಮಸ್ಯೆಯಿಂದ ಬಳಲುತ್ತಿದ್ದ ಏ.7ರಿಂದ 10ರವರೆಗೆ ಈತ ಸೊಲ್ಲಾಪುರದಲ್ಲಿ ಚಿಕಿತ್ಸೆ ಪಡೆದಿದ್ದರು. ಏ.22ರಂದು ಕೋವಿಡ್-19 ಸೋಂಕು ಖಚಿತವಾಗಿತ್ತು.

ಈತನ ಸಂಪರ್ಕಕ್ಕೆ ಬಂದಿದ್ದ ಈತನ ತಾಯಿಗೂ‌ ಕೋವಿಡ್-19 ಸೋಂಕು ಪತ್ತೆಯಾಗಿದ್ದು, 49 ಜನರು ಪ್ರಥಮ ಹಾಗೂ 290 ಜನರನ್ನು ದ್ವಿತೀಯ ಸಂಪರ್ಕಿಯರನ್ನು ಗುರುತಿಸಲಾಗಿದೆ.

ಇನ್ನು,ಇಂದು ಒಂದೇ ದಿನ ಆರು ಪ್ರತ್ಯೇಕ ಹೊಸ ಪ್ರಕರಣಗಳು ಕಾಣಿಸಿಕೊಂಡಿವೆ.‌ ಈ ಬಗ್ಗೆ ಜಿಲ್ಲಾ ಹೆಲ್ತ್ ಬುಲೆಟಿನ್ ನಲ್ಲಿ‌ ಮಾಹಿತಿ ನೀಡಲಾಗಿದ್ದು, ಸೋಂಕಿತರ ವಿವರ ಇನ್ನೂ ಗೊತ್ತಾಗಿಲ್ಲ.‌