10 ಆ್ಯಪಲ್‌ ಫೋನ್‌ ಕದ್ದ ಕೊರಿಯರ್‌ ಡೆಲಿವರಿ ಬಾಯ್‌

ನವದೆಹಲಿ: ಹಿಂದೆಲ್ಲ ಕಳ್ಳರ ಮೂಲ ಟಾರ್ಗೆಟ್‌ ಚಿನ್ನ! ಆದರೀಗ ಕಳ್ಳರ ಕಣ್ಣಿರೋದು ಚಿನ್ನದಂಥ ಬೆಲೆ ಇರುವ ವಸ್ತುವಿನ ಮೇಲೆ ಅದೇ ಆ್ಯಪಲ್‌ ಐಫೋನ್‌. ಅಪಾರ ಬೇಡಿಕೆ ಇರುವ ಆ್ಯಪಲ್‌ ಗೆಜೆಟ್‌ಗಳ ಕಳ್ಳತನ ಹೆಚ್ಚುತ್ತಿರುವ ನಡುವೆಯೇ, ಡೆಲಿವರಿ ಬಾಯ್‌ ಒಬ್ಬ 10 ಆ್ಯಪಲ್‌ ಫೋನ್‌ಗಳನ್ನು ಕದ್ದು, ನಕಲಿ ಫೋನ್‌ಗಳನ್ನಿಟ್ಟಿರುವ ಪ್ರಕರಣ ಗುರುಗ್ರಾಮದಲ್ಲಿ ವರದಿಯಾಗಿದೆ. ಮ್ಯಾಟ್ರಿಕ್ಸ್‌ ಫೈನಾನ್ಶಿಯಲ್‌ ಸಲ್ಯೂಷನ್ಸ್‌ ಎನ್ನುವ ಕೊರಿಯರ್‌ ಸಂಸ್ಥೆಯೊಂದು ಗುರುಗ್ರಾಮದಲ್ಲಿ ಅಮೆಜಾನ್‌ನ ಪಾರ್ಸೆಲ್‌ಗ‌ಳನ್ನು ಡೆಲಿವರಿ ಮಾಡುತ್ತಿದೆ.

ಮಾ.27ರಂದು ಸಂಸ್ಥೆಯ ಡೆಲಿವರಿ ಉದ್ಯೋಗಿ ಲಲಿತ್‌ ಎಂಬವನ ಕೈನಲ್ಲಿ 10 ಆ್ಯಪಲ್‌ ಐಫೋನ್‌ ಹಾಗೂ ಒಂದು ಇಯರ್‌ಬಡ್ಸ್‌ಗಳನ್ನು ಗ್ರಾಹಕರಿಗೆ ತಲುಪಿಸಲು ಕಳುಹಿಸಿದೆ. ಆದರೆ ಲಲಿತ್‌ ಐಫೋನ್‌ಗಳನ್ನು ಕದ್ದು, ಅವುಗಳ ಬದಲಿಗೆ ನಕಲಿ ಫೋನ್‌ ಇರಿಸಿದ್ದಾನೆ. ನಂತರ ಆತನ ಸಹೋದರ ಗ್ರಾಹಕರನ್ನು ಸಂಪರ್ಕಿಸಲು ಸಾಧ್ಯವಾಗಿಲ್ಲವೆಂದು ತಿಳಿಸಿ, ಪಾರ್ಸೆಲ್‌ಗ‌ಳನ್ನು ಮರಳಿಸಿದ್ದಾನೆ. ಈ ವೇಳೆ ಪ್ಯಾಕಿಂಗ್‌ನಲ್ಲಿ ಬದಲಾವಣೆ ಗಮನಿಸಿ ಸಂಸ್ಥೆಯ ಮುಖ್ಯಸ್ಥರು ಪರೀಕ್ಷಿಸಿದಾಗ ಕಳ್ಳತನವಾಗಿರುವುದು ತಿಳಿದುಬಂದಿದೆ. ಲಲಿತ್‌ ತಲೆಮರೆಸಿಕೊಂಡಿದ್ದು, ಪೊಲೀಸರು ಆತನಿಗಾಗಿ ಹುಡುಕಾಟ ನಡೆಸುತ್ತಿದ್ದಾರೆ.