ವಿಡಿಯೋ ಕಾಲ್‌ನಲ್ಲೇ ಪುತ್ರನ ಕಾಣುವ ಕೋವಿಡ್ ವಾರಿಯರ್‌

ಕೊಪ್ಪಳ: ಹತ್ತಿರ ತೆರಳಿ ಕಂದಮ್ಮನ ಮುದ್ದಾಡಬೇಕೆಂಬ ಮನಸ್ಸಿದ್ದರೂ ಕೋವಿಡ್‌ ಚಿಕಿತ್ಸೆಯಲ್ಲಿ ತೊಡಗಿದ್ದರಿಂದ ಸಾಧ್ಯವಾಗುತ್ತಿಲ್ಲ.

ಹೌದು. ಕೊರೊನಾ ಸೋಂಕಿತರ ಚಿಕಿತ್ಸೆಗಾಗಿ ಆರು ತಿಂಗಳಿಂದ ಜಿಲ್ಲಾಸ್ಪತ್ರೆಯಲ್ಲಿ ನರ್ಸಿಂಗ್‌ ಆಫೀಸರ್‌ ಆಗಿ ಕರ್ತವ್ಯ ನಿರ್ವಹಿಸುತ್ತಿರುವ ಮಂಜುನಾಥ ಗಾಡಿ ಅವರ ಪತ್ನಿ ವಿಜಯಪುರದಲ್ಲಿ ಕಳೆದ ಏ.1ರಂದು ಎರಡನೇ ಗಂಡು ಮಗುವಿಗೆ ಜನ್ಮ ನೀಡಿದ್ದಾರೆ. ಹೀಗಾಗಿ ತಮ್ಮ ಒಂದು ತಿಂಗಳ ಮಗುವನ್ನು ವಿಡಿಯೋ ಕಾಲ್‌ನಲ್ಲಿಯೇ ನೋಡಿ ಖುಷಿ ಪಡುತ್ತಿದ್ದಾರೆ.

ಮೂಲತಃ ವಿಜಯಪುರ ಜಿಲ್ಲೆಯವರಾದ ಮಂಜುನಾಥ ಅವರು ಆರು ತಿಂಗಳಿಂದ ಕೊಪ್ಪಳ ಜಿಲ್ಲಾಸ್ಪತ್ರೆಯ ಕೋವಿಡ್‌ ವಿಭಾಗದಲ್ಲಿ ಕಾರ್ಯನಿರ್ವಹಿಸುತ್ತಿದ್ದು, ಕೋವಿಡ್‌ ಸೋಂಕಿತರಿಗೆ ಚಿಕಿತ್ಸೆ, ಶಸ್ತ್ರಚಿಕಿತ್ಸೆಯಲ್ಲಿ ವೈದ್ಯರಿಗೆ ನೆರವಾಗುತ್ತಿದ್ದಾರೆ. ಈ ಕುರಿತು “ಉದಯವಾಣಿ’ ಜತೆ ಮಾತನಾಡಿದ ಅವರು, ನನ್ನ ಕಂದ ಕಳೆದ ತಿಂಗಳಷ್ಟೇ ಜನಿಸಿದ್ದಾನೆ. ಮನೆಯಲ್ಲಿ ತಾಯಿ, ಪತ್ನಿ, ಮಗುವಿದೆ. ಇಂತಹ ಪರಿಸ್ಥಿತಿಯಲ್ಲಿ ನಾವು ಮನೆಗೆ ತೆರಳುವುದು ಒಳ್ಳೆಯದಲ್ಲ. ಅಲ್ಲದೇ ನನ್ನ ಪತ್ನಿಯೂ ಕೊರೊನಾ ವಾರಿಯರ್ಸ್‌. ಅವರೂ ಸಹ ಕೋವಿಡ್‌ ಬಗ್ಗೆ ಜಾಗೃತಿ ಹೊಂದಿದ್ದು, ಸೋಂಕು ನಿಯಂತ್ರಣ ಬಳಿಕ ತೆರಳಿದರಾಯ್ತು.

ಒಂದು ತಿಂಗಳ ಮಗುವನ್ನು ನಿತ್ಯ ವಿಡಿಯೋ ಕಾಲ್‌ನಲ್ಲಿಯೇ ನೋಡುತ್ತೇನೆ. ಹೆತ್ತವರೊಂದಿಗೆ ಕೆಲ ನಿಮಿಷ ಮಾತನಾಡಿ ಖುಷಿ ಪಡುತ್ತೇನೆ. ಜನರೂ ಸಹಿತ ಅನಗತ್ಯ ಸುತ್ತಾಡುವುದು ಒಳ್ಳೆಯದಲ್ಲ ಎಂದೆನ್ನುತ್ತಿದ್ದಾರೆ.