ರಿಯೋ ಡಿ ಜನೈರೋ: ಭಾರೀ ಕುತೂಹಲ ಮೂಡಿಸಿದ್ದ ಮೆಸ್ಸಿ ವರ್ಸಸ್ ನೇಯ್ಮರ್ ಕಾಳಗದಲ್ಲಿ ಮೆಸ್ಸಿ ಜಯಭೇರಿ ಸಾಧಿಸಿದ್ದಾರೆ. ಕೊಪ ಅಮೆರಿಕಾ ಫೈನಲ್ ನಲ್ಲಿ ಬ್ರಝಿಲ್ ವಿರುದ್ಧ ಗೆದ್ದ ಅರ್ಜೆಂಟೀನಾ ತಂಡ 15ನೇ ಬಾರಿಗೆ ಚಾಂಪಿಯನ್ ಪಟ್ಟಕ್ಕೇರಿತು. ಈ ಗೆಲುವಿನೊಂದಿಗೆ ಫುಟ್ ಬಾಲ್ ದಿಗ್ಗಜ ಲಿಯೋನೆಲ್ ಮೆಸ್ಸಿಯ ಅಂತಾರಾಷ್ಟ್ರೀಯ ಕಪ್ ಎಂಬ ಮರೀಚಿಕೆ ಇಂದಿಗೆ ಕೊನೆಯಾಗಿದೆ.
ಇಲ್ಲಿನ ಮರಾಕನ ಸ್ಟೇಡಿಯಂ ನಲ್ಲಿ ನಡೆದ ಪಂದ್ಯದಲ್ಲಿ ಅರ್ಜೆಂಟೀನಾ ತಂಡ 1-0 ಅಂತರದ ಗೆಲುವು ಸಾಧಿಸಿತು. 22ನೇ ನಿಮಿಷಕ್ಕೆ ಏಂಜಲ್ ಡಿ ಮರಿಯಾ ಬಾರಿಸಿದ ಗೋಲು ಮೆಸ್ಸಿ ಬಳಗಕ್ಕೆ ಮೇಲುಗೈ ನೀಡಿತು.
ಇದನ್ನೂ ಓದಿ:ಆ್ಯಶ್ಲಿ ಬಾರ್ಟಿ ಐತಿಹಾಸಿಕ ಸಾಧನೆ : ಒಂದು ಕಾಲದ ಕ್ರಿಕೆಟರ್‌, ಇಂದು ವಿಂಬಲ್ಡನ್‌ ವಿನ್ನರ್‌
ಕೂಟದಲ್ಲಿ ನಾಲ್ಕು ಗೋಲುಗಳೊಂದಿಗೆ ಹೆಚ್ಚು ಗೋಲು ಹೊಡೆದವರ ಪಟ್ಟಿಯಲ್ಲಿ ಜಂಟಿಯಾಗಿ ಮೊದಲ ಸ್ಥಾನವನ್ನು ಮೆಸ್ಸಿ ಪಡೆದಿದ್ದಾರೆ. ಬ್ರಝಿಲ್ ನ ದಿಗ್ಗಜ ನೇಯ್ಮರ್ ಕೂಡಾ ನಾಲ್ಕು ಗೋಲು ಬಾರಿಸಿದ್ದಾರೆ.
ಪಂದ್ಯ ಮುಗಿಯುತ್ತಿದ್ದಂತೆ ಭಾವುಕರಾಗಿದ್ದ ಮೆಸ್ಸಿಯನ್ನು ಸಹ ಆಟಗಾರರು ಎತ್ತಿಕೊಂಡು ಸಂಭ್ರಮಾಚರಣೆ ಮಾಡಿದರು. ವೈಯಕ್ತಿಕವಾಗಿ ಮತ್ತು ಕ್ಲಬ್ ಪರವಾಗಿ ಸಾಕಷ್ಟು ಹೆಸರು ಮಾಡಿರುವ ಲಿಯೋನೆಲ್ ಮೆಸ್ಸಿಗೆ ಅರ್ಜೆಂಟೀನಾ ಜೆರ್ಸಿಯಲ್ಲಿ ಇದು ಮೊದಲ ಕಪ್.
