ಮುಂದುವರಿದ ಪ್ರಜ್ವಲ್‌ ವಿಚಾರಣೆ ಕಳೆದ ಹೋದ ಮೊಬೈಲ್‌ಗಾಗಿ ಶೋಧ

ಬೆಂಗಳೂರು: ಹಾಸನದ ಅಶ್ಲೀಲ ಪೆನ್‌ಡ್ರೈವ್‌ ಪ್ರಕರಣದಲ್ಲಿ ವಿಶೇಷ ತನಿಖಾ ತಂಡವು (ಎಸ್‌ಐಟಿ) ಮಾಜಿ ಸಂಸದ ಪ್ರಜ್ವಲ್‌ ರೇವಣ್ಣ ವಿಚಾರಣೆಯನ್ನು ಮುಂದುವರಿಸಿದ್ದು, ಕಳೆದು ಹೋಗಿದೆ ಎನ್ನಲಾದ ಮೊಬೈಲ್‌ಗೆ ಶೋಧ ಮುಂದುವರಿಸಿದೆ.

ಎಸ್‌ಐಟಿಯಲ್ಲಿ ಪ್ರಜ್ವಲ್‌ ರೇವಣ್ಣ ವಿರುದ್ಧ ದಾಖಲಾಗಿರುವ 3ನೇ ಲೈಂಗಿಕ ದೌರ್ಜನ್ಯ ಪ್ರಕರಣದಲ್ಲಿ ವಿಚಾರಣೆಯನ್ನು ಮುಂದುವರಿಸಲಾಗಿದೆ. ಆದರೆ ತಾಂತ್ರಿಕ ಸಾಕ್ಷ್ಯ ಕಲೆ ಹಾಕುವುದೇ ದೊಡ್ಡ ಸವಾಲಾಗಿದೆ. ಅಶ್ಲೀಲ ವೀಡಿಯೋ ಸೆರೆ ಹಿಡಿದಿದ್ದಾರೆ ಎನ್ನಲಾದ ಮೂಲ ಮೊಬೈಲ್‌ಗಾಗಿ ಎಸ್‌ಐಟಿ ತಂಡ ತಲಾಶ್‌ ನಡೆಸುತ್ತಿದೆ. ಆ ಮೊಬೈಲ್‌ ಪತ್ತೆಯಾದರೆ ಅದನ್ನು ಎಫ್ಎಸ್‌ಎಲ್‌ಗೆ ಕಳುಹಿಸಿ ರಿಟ್ರೈವ್‌ ಮಾಡಿ ಅದರಲ್ಲಿರುವ ಮಾಹಿತಿಯನ್ನು ಸಾಕ್ಷ್ಯವಾಗಿ ಪರಿಗಣಿಸಲು ಎಸ್‌ಐಟಿ ಚಿಂತನೆ ನಡೆಸಿತ್ತು.

ಆದರೆ ಆ ಮೂಲ ಮೊಬೈಲ್‌ನ ಸುಳಿವು ಸಿಗದೇ ಇದೀಗ ಎಸ್‌ಐಟಿಯು ಮೊಬೈಲ್‌ ಕಂಪೆನಿಯ ಮೊರೆ ಹೋಗುವ ಸಾಧ್ಯತೆಗಳಿವೆ ಎನ್ನಲಾಗಿದೆ.

ಪ್ರಜ್ವಲ್‌ ಅವರನ್ನು ವಶಕ್ಕೆ ಪಡೆದ ಬೆನ್ನಲ್ಲೇ ಅವರ ಬಳಿಯಿದ್ದ ಮೊಬೈಲ್‌ ಅನ್ನೂ ಸಹ ಜಪ್ತಿ ಮಾಡಿ ಪರಿಶೀಲಿಸಲಾಗಿತ್ತು. ಅದರಲ್ಲಿ 2024ರ ಲೋಕಸಭೆ ಚುನಾವಣೆಯ ಚಿತ್ರಗಳು, ವೀಡಿಯೋಗಳನ್ನು ಹೊರತುಪಡಿಸಿದರೆ ಬೇರೆ ಯಾವುದೇ ಅಶ್ಲೀಲ ವೀಡಿಯೋಗಳು ಸಿಕ್ಕಿರಲಿಲ್ಲ. ಆ ವೇಳೆ ಇದು ಅಶ್ಲೀಲ ವೀಡಿಯೋ ಸೆರೆಹಿಡಿದ ಮೊಬೈಲ್‌ ಅಲ್ಲ ಎಂಬುದು ಎಸ್‌ಐಟಿ ಗಮನಕ್ಕೂ ಬಂದಿತ್ತು. ಅನಂತರ ಜಪ್ತಿ ಮಾಡಿದ ಮೊಬೈಲ್‌ ಅನ್ನು ವಿಧಿ ವಿಜ್ಞಾನ ಪ್ರಯೋಗಾಲಯಕ್ಕೆ (ಎಫ್ಎಸ್‌ಎಲ್‌) ಕಳುಹಿಸಿ ಪರಿಶೀಲಿಸಲಾಗಿದೆ.