ರಾಮಮಂದಿರ ನಿರ್ಮಾಣ ಆರಂಭ 

ಅಯೋಧ್ಯೆ.: ಶ್ರೀ ರಾಮಮಂದಿರ ನಿರ್ಮಾಣದ ಕನಸಿಗೆ ರೆಕ್ಕೆ ಮೂಡಲಾರಂಭಿಸಿದೆ.

ಮಂಗಳವಾರದಿಂದ ಪಾಯ ಅಗೆಯುವ ಕೆಲಸ ಆರಂಭವಾಗಿದ್ದು, ಫೆಬ್ರವರಿಯಲ್ಲಿ ಕಂಬ ಅಳವಡಿಕೆ ಕೈಗೆತ್ತಿಕೊಳ್ಳಲಾಗುತ್ತದೆ ಎಂದು ರಾಮಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್‌ ಮಹಾಸಚಿವ ಚಂಪತರಾಯ್‌ ಹೇಳಿದ್ದಾರೆ. ಈಗಾಗಲೇ ರಾಮಜನ್ಮಭೂಮಿಯ ಮಣ್ಣಿನ ಪರೀಕ್ಷೆಯನ್ನು ಮೂರು ಬಾರಿ ನಡೆಸಲಾಗಿದ್ದು, ಪರಿಣತರು ಬುನಾದಿಗಾಗಿ ಅತ್ಯುತ್ತಮ ವಿನ್ಯಾಸ ರೂಪಿಸಿದ್ದಾರೆ.

ಚಂಪತ ರಾಯ್‌ ಪ್ರಕಾರ ಫೆಬ್ರವರ ಯಿಂದ ಮುಖ್ಯ ನಿರ್ಮಾಣ ಕಾಮಗಾರಿಆರಂಭವಾಗಲಿದ್ದು, 39 ತಿಂಗಳುಗಳಲ್ಲಿ ನಿರ್ಮಾಣ ಪೂರ್ಣಗೊಳ್ಳಲಿದೆ.

ನಿಧಿ ಸಂಗ್ರಹ: ಉತ್ತಮ ಸ್ಪಂದನೆ :

ಮಂದಿರ ನಿರ್ಮಾಣಕ್ಕಾಗಿ ದೇಶಾದ್ಯಂತ ದೇಣಿಗೆ ಸಂಗ್ರಹ ಭರದಿಂದ ಸಾಗಿದೆ. ವಿಹಿಂಪವು ಆರಂಭಿಸಿರುವ ಸಮರ್ಪಣ ನಿಧಿ ಅಭಿಯಾನ ಆರಂಭವಾಗಿ ಕೆಲವೇ ದಿನ ಆಗಿದ್ದರೂ ಅನೇಕ ನಗರಗಳಲ್ಲಿ 10 ರೂ., 100 ರೂ. ಮತ್ತು 1,000 ರೂ. ಕೂಪನ್‌ಗಳು ಖಾಲಿಯಾಗುತ್ತಿವೆ. 1,000 ರೂ.ಗಳಿಂದ ತೊಡಗಿ ಲಕ್ಷಾಂತರ ರೂ.ವರೆಗೆ ನೀಡುವ ಭಕ್ತರ ಸಂಖ್ಯೆಯೂ ಹೆಚ್ಚಾಗಿದೆ.

ಗುಜರಾತ್‌ನ ವಜ್ರದ ವ್ಯಾಪಾರಿ ಗೋವಿಂದಭಾಯ್‌ ಡೋಲಾಕಿಯಾ ಅವರು 11 ಕೋ. ರೂ. ದೇಣಿಗೆ ನೀಡಿ ರಾಮಭಕ್ತಿ ಮೆರೆದಿದ್ದಾರೆ!