ಟೇಬಲ್‌ ಟೆನಿಸ್‌: ಪುರುಷರ ಮತ್ತು ಮಿಶ್ರ ಡಬಲ್ಸ್‌ನಲ್ಲಿ ಫೈನಲ್‌ಗೇರಿದ ಶರತ್‌ ತಂಡ

ಬರ್ಮಿಂಗ್‌ಹ್ಯಾಮ್‌: ತಾರಾ ಆಟಗಾರ ಅಚಂತ ಶರತ್‌ ಕಮಲ್‌ ಅವರ ಅಮೋಘ ಆಟ ಮುಂದುವರಿದಿದೆ. ಟೇಬಲ್‌ ಟೆನಿಸ್‌ ಸ್ಪರ್ಧೆಯಲ್ಲಿ ಭಾರತಕ್ಕೆ ಅವರು ಇನ್ನೆರಡು ಪದಕ ಖಚಿತಪಡಿಸಿದ್ದಾರೆ. ಅಚಂತ ಪುರುಷರ ಡಬಲ್ಸ್‌ ಮತ್ತು ಮಿಶ್ರ ಡಬಲ್ಸ್‌ ವಿಭಾಗದಲ್ಲಿ ಫೈನಲಿಗೇರಿದ ಸಾಧನೆ ಮಾಡಿದ್ದಾರೆ.

ಜಿ.ಸಥಿಯನ್‌ ಜತೆಗೂಡಿ ಡಬಲ್ಸ್‌ನಲ್ಲಿ ಆಡುತ್ತಿರುವ ಶರತ್‌ ಆಸ್ಟ್ರೇಲಿಯದ ನಿಕೋಲಾಸ್‌ ಲಮ್‌ ಮತ್ತು ಮಿನ್‌ಹ್ಯುಂಗ್‌ ಜೀ ಅವರನ್ನು 3-2 ಅಂತರದಿಂದ ರೋಮಾಂಚಕವಾಗಿ ಉರುಳಿಸಿ ಫೈನಲಿಗೇರಿದರು. ಚಿನ್ನದ ಪದಕಕ್ಕಾಗಿ ನಡೆಯುವ ಫೈನಲ್‌ ಹೋರಾಟದಲ್ಲಿ ಅವರು ಇಂಗ್ಲೆಂಡಿನ ಪಾಲ್‌ ಡ್ರಿಂಖಲ್‌ ಮತ್ತು ಲಿಯಮ್‌ ಪಿಚ್‌ಫೋರ್ಡ್‌ ಅವರನ್ನು ಎದುರಿಸಲಿದ್ದಾರೆ.

ಯುವ ತಾರೆ ಶ್ರೀಜಾ ಅಕುಲಾ ಅವರ ಜತೆಗೂಡಿ ಮಿಶ್ರ ಡಬಲ್ಸ್‌ನಲ್ಲಿ ಆಡಿದ ಶರತ್‌ ಆಸ್ಟ್ರೇಲಿಯದ ಜೋಡಿಯನ್ನು ಸೋಲಿಸಿದರು. ಫೈನಲ್‌ನಲ್ಲಿ ಅವರು ಮಲೇಷ್ಯಾದ ಕರೆನ್‌ ಲಿನ್‌ ಮತ್ತು ಚೂಂಗ್‌ ಜಯೆನ್‌ ಅವರ ಸವಾಲನ್ನು ಎದುರಿಸಲಿದ್ದಾರೆ.